Bernard Lyot

Bernard Ferdinand Lyot (27. februar 1897–2. april 1952) var ein fransk astronom.

Frå 1920 var han astronom ved Paris-Meudon-observatoriet. Han utførte ei rekkje arbeid over polarisasjonen av lyset frå månen og planetane, og er internasjonalt kjent for undersøkingane sine av sola. Han konstruerte to instrument som no er i bruk ved dei fleste solobservatorium: koronagrafen, som gjer det mogeleg å observere og fotografere den indre solkorona utanfor totale solformørkingar (fotografert første gong i fullt dagslys av Lyot 21. juli 1931 på Pic du Midi i Frankrike), og polarisasjons-interferensfilteret (1933) for observasjon og fotografering av sola i lys frå eit særs smalt spektralområde.