1940-åra

1940-åra var eit tiår på 1900-talet. Det var sterkt prega av andre verdskrigen, som herja i bortimot heile verda i fyrste halvdelen av tiåret. Krigen hadde store menneskelege og politiske verknadar, og førte med seg opprettingar av fleire nye land og internasjonale organisasjonar. Det blei også innført nye sosiale system, som statleg velferd og det økonomiske Bretton Woods-systemet. Ny teknologi og vitskap utvikla under krigen blei vidareutvikla i etterkrigstida, som ballistiske missil, kjernekraft, datamaskinar, radar og jetmotorar.

Hendingar i utlandet

Krigar

Andre verdskrigen

Nazi-Tyskland invaderte Polen, Danmark, Noreg, Benelux og Frankrike frå 1939 til 1941.
Sovjetunionen invaderte Polen og Finland og okkuperte Latvia, Estland, Litauen og dden rumenske regionen Bessarabia frå 1939 til 1941.
USA gjekk inn i krigen etter det japanske åtaket på Pearl Harbor 7. desember 1941.
Holocaust, også kjend som sjoah, viser vanlegvis til folkemordet på rundt seks millionar europeiske jødar i løpet av andre verdskrigen i eit målretta program drive av Nazi-Tyskland, allierte og kollaboratørar.^[1] Nokre forskarar meiner at Holocaust-omgrepet også bør omfatta dei systematiske drapa på millionar av andre grupper, som etniske polakkar, romfolk, sovjetiske krigsfangar og sivile, folk med funksjonshemmingar, homofile og politiske og religiøse motstandarar.^[2] Etter denne definisjonen er talet på Holocaust-offer mellom 11 og 17 millionar menneske.^[3]
Manhattanprojektet; utviklinga av den fyrste atombomba og bruken av slike våpen over Hiroshima og Nagasaki
Nürnbergprosessane blei gjennomførte etter krigen.

Andre

Den greske borgarkrigen frå 1946 til 1949
Borgarkrigen i Palestinamandatet frå 1947 til 1948
Krigen mellom India og Pakistan i 1947–1948
Den arabisk-israelske krigen i 1948
Den kalde krigen byrja med Berlin-blokaden i 1948-1949

Internasjonale organisasjonar

1945 – Opprettinga av Dei sameinte nasjonane (SN)
1949 – Opprettinga av NATO og Europarådet

Sjølvstende og nye land

1944 – Island erklærte sjølvstende frå Danmark.
1945 – Indonesia erklærte sjølvstende frå Nederland, og oppnådde sjølvstende i 1949 etter ein bitter militær og diplomatisk strid.
1945 – Korea blei frigjort etter at Japan overgav seg
1946 – Det franske mandatet for Syria og Libanon blei oppløyst til dei sjølvstendige statane Syria og Libanon.
1947 – Delinga av Britisk India førte til eit sjølvstendig, sekulært India og eit hovudsakleg muslimsk Pakistan.
1948 – Det britiske styret i Burma tok slutt.
1948 – Staten Israel blei etablert.
1949 – Folkerepublikken Kina blei offisielt erklært.
1949 – Forbundsrepublikken Tyskland og Den tyske demokratiske pepublikken blei begge grunnlagde i 1949.