Boris Becker

Becker is 1974 in den Tennisclub Blau-Weiß in Leimen inpeddt un keem dor in de Trainingsgrupp vun Boris Breskvar. Al dree Johr later is he in den Jöögdkader vun’n Badischen Tennisbund opnahmen worrn. He hett de Süüddüütschen Meesterschoppen un dat 1. düütsche Jüngsten-Tennisturneer wunnen. Dat Johr dorop, 1978, weer he in de düütsche Jöögd-Utwahlmannschop vun’n DTB un 1981 in de eerste Mannschop vun de Mannslüüd opnahmen. In’t Johr 1982 hett he in’t Dubbelt bi’n Orange Bowl wunnen – dat is en inoffizielle Jöögd-Weltmeesterschop in Miami.

Dree Johren later, 1985, weer he Juniorweltmeester un harr sien eersten Turneerspood in London. Gau bekannt worrn is Becker in’t Öller vun söventeihn Johren, as he an’n 7. Juli 1985 as eerste Speler, de nich sett weer, as eerste Düütsche un as jüngste Speler bi dat weltwiet bedüdenste Tennisturneer in Wimbledon mit dree to een Sätz gegen Kevin Curren dat Endspeel wunnen hett. Mit dissen Sieg weer he bit dorhen ok de jüngste Winner vun en GRand-Slam-Turneer överhaupt. För Becker sien Tennisloopbahn weer dat de Dörbrook, de ok den düütschen Tennissport gau na vörn bröcht hett. In korter Tiet is Tennis to’n populärsten Tokiekersport na’n Football worrn.

Becker is denn ok to’n düütschen Sportler vun’t Johr wählt worrn un wunn gau an Bekanntheit. Ok sien Trainer Günther Bosch (bit 1987) un sien Manager Ion Țiriac (bit 1993) weern dör em bekannt. Ok dat Nächste Johr weer Becker wedder Juniorweltmeester un hett butendem de Turneren in Toronto, Sydney, Tokio un Paris wunnen. Gegen Ivan Lendl hett he 1986 bito sien tweeten Triumph in Wimbledon hatt. Ok dat Johr weer he to’n Sportler vun’t Johr wählt. 1987 harr he in’n Davis Cup in Hartford sien legendär Duell gegen John McEnroe, dat he as Winner to Enn bringen de.

In’t Johr 1988 hett he söven Grand-Prix-Turneren wunnen. Ünner sien Föhren güng ok to’n eersten mol de Davis Cup an en düütsche Mannschop. Wimbledon hett he in’t Endspeel aver verloren. Dat nächste Johr hett he gegen Ivan Lendl dat Endspeel vun de US Open in New York City wunnen, wat na em noch keen Düütschen henkregen hett. Gegen Stefan Edberg hett he to’n drüdden mol dat Turneer vun Wimbledon mit Spood afslaten un mit de Mannschop künn he den Davis-Cup verdeffenderen. 1989 weer he denn ok to’n drüdden mol to’n Sportler vun’t Johr wählt.

Sien Spood hett de nächsten Johren anhollen: Ok 1990 hett he vele Turneren wunnen un weer ok wedder Sportler vun’t Johr. 1991 hett he denn to’n eersten mol de Spitz vun de Tennis-Weltranglist övernahmen, de he in dat Johr twölf Weken lang innahmen hett. 1992 hett he in’t Dubbelt tosamen mit Michael Stich de Goldmedaille bi de Olympischen Spelen in Barcelona wunnen. De ATP-Weltmeesterschop hett he ok 1992 wunnen un noch mol wedder 1995. In de Johren harr he noch en poor mol Spood bi grote Turneren, bit he 1999 in’t Öller vun 31 Johren denn vun’n Profisport torüchpeddt is.

Becker sien Vördeel leeg vör allen op sien gauen Opslag un sien goot Nettspeel. Disse offensive Speelwies hett em tosamen mit Stefan Edberg to’n besten Serve-and-Volley-Speler in de tweten Hälft vun de 1980er Johren maakt. Stark weer he ok mit sien harde Vörhand.

Sien gau Offensivspeel hett em gliek to Anfang vun sien Loopbahn den Ökelnaam „Bumm-Bumm-Boris“ inbröcht. Sien tyypsch Speel, bi dat he veel wesseln un Druck maken de, künn he vör allen op gaue Belääg – sünners in de Hall (Supreme Court un Teppich) un op Rasen – entwickeln.

Kennteken vun Becker sien Speel weer butendem de „Becker-Heek“ oder „Becker-Rull“ – en Volleyball, den he in’n Heeksprung slahn hett. He weer weltwiet geern sehn, vunwegen dat he sien Speel bannig emotschonal maken de. Es Speler harr he en bannig starken Willen un teken sik dör starle Nerven ut. Typpsch weern ok de „Becker-Fuust“, also de ballte Fuust, de he na wunnene Big Points wiesen de, un de „Becker-Blocker“ – sien Return-Slag, den he mitünner meist ahn uttohalen hard un platzeert mit de Rüchhand speelt un to’n direkten Punktgewinn nütt hett.

As Becker mit dat Tennisspelen anfüng, weer Boris Breskvar sien Trainer. Mit Anfang vun de Profiloopbahn hett 1984 Günther Bosch disse Funkschoon övernahmen, vun em hett sik Becker aver 1987 wedder scheedt un Ion Țiriac hett övergangswies wietermaakt. För korte Tiet weer Frank Dick denn Trainer, de aver blots för Becker sien Fitness tostännig weer. Twüschen 1987 un 1991 keem Bob Brett in den Posten, de denn tietwies vun Niki Pilić för dree Maanden aflööst worrn is. Dorna weer bit 1992 Tomas Smid Becker sien Trainer. Övergangswies kenn denn Eric Jelen un dorna bit Mai 1993 Günther Bresnik.^[1] Vun August 1995 an weer Becker vun Mike DePalmer traineert.^[2]

Becker künn bi’t Masters (bit 1989) un de ATP-Weltmeesterschop (af 1990), dat letzte grote Turneer in de Saison, acht mol bit in’t Endspeelkamen un hett dor 1988, 1992 und 1995 wunnen. Bi’t Rasen-turneer in Wimbledon hett he dreemol wunnen un weer wietere veer mol in’t Endspeel. Dat letzte Endspeel vun sien leefst Turneer hett he 1995 gegen Pete Sampras verloren. Wunnen hett he ok bi annere Grand-Slam-Turneren as 1989 bi de US Open un 1991 un 1996 bi de Australian Open. Blots bi de French Open hett he dat nich bit in’t Endspeel maken künnt. Jüst so hett he ok nie en ATP-Turneer op ro’e Asch winnen künnt.

#	Datum	Turneer	Belag	Endspeelgegner	Endresultat
1.	16. Juni 1985	London / Queen’s Club	Rasen	Johan Kriek	6:2, 6:3
2.	7. Juli 1985	Wimbledon	Rasen	Kevin Curren	6:3, 6:7, 7:6, 6:4
3.	25. August 1985	Cincinnati	Hardplatz	Mats Wilander	6:4, 6:2
4.	30. März 1986	Chicago	Teppich	Ivan Lendl	7:6, 6:3
5.	6. Juli 1986	Wimbledon	Rasen	Ivan Lendl	6:4, 6:3, 7:5
6.	17. August 1986	Toronto	Hardplatz	Stefan Edberg	6:4, 3:6, 6:3
7.	19. Oktober 1986	Sydney Indoor	Hardplatz	Ivan Lendl	3:6, 7:6, 6:2, 6:0
8.	26. Oktober 1986	Tokio Indoor	Teppich	Stefan Edberg	7:6, 6:1
9.	2. November 1986	Paris Indoor	Teppich	Sergio Casal	6:4, 6:3, 7:6
10.	22. Februar 1987	Indian Wells	Hardplatz	Stefan Edberg	6:4, 6:4, 7:5
11.	5. April 1987	Mailand	Teppich	Miloslav Mečíř	6:4, 6:3
12.	15. Juni 1987	London / Queen’s Club	Rasen	Jimmy Connors	6:7, 6:3, 6:4
13.	6. März 1988	Indian Wells	Hardplatz	Emilio Sánchez	7:5, 6:4, 2:6, 6:4
14.	2. April 1988	Dallas WCT	Teppich	Stefan Edberg	6:4, 1:6, 7:5, 6:2
15.	12. Juni 1988	London / Queen’s Club	Rasen	Stefan Edberg	6:1, 3:6, 6:3
16.	7. August 1988	Indianapolis	Hardplatz	John McEnroe	6:4, 6:2
17.	23. Oktober 1988	Tokio Indoor	Teppich	John Fitzgerald	7:6, 6:4
18.	6. November 1988	Stockholm	Hardplatz	Peter Lundgren	6:4, 6:1, 6:1
19.	5. Dezember 1988	Masters	Teppich	Ivan Lendl	5:7, 7:6, 3:6, 6:2, 7:6
20.	19. Februar 1989	Mailand	Teppich	Alexander Wolkow	6:1, 6:2
21.	26. Februar 1989	Philadelphia	Teppich	Tim Mayotte	7:6, 6:1, 6:3
22.	9. Juli 1989	Wimbledon	Rasen	Stefan Edberg	6:0, 7:6, 6:4
23.	10. September 1989	US Open	Hardplatz	Ivan Lendl	7:6, 1:6, 6:3, 7:6
24.	5. November 1989	Paris Indoor	Teppich	Stefan Edberg	6:4, 6:3, 6:3
25.	18. Februar 1990	Brüssel	Teppich	Carl-Uwe Steeb	7:5, 6:2, 6:2
26.	25. Februar 1990	Stuttgart Indoor	Teppich	Ivan Lendl	6:2, 6:2
27.	19. August 1990	Indianapolis	Hardplatz	Peter Lundgren	6:3, 6:4
28.	7. Oktober 1990	Sydney Indoor	Hardplatz	Stefan Edberg	7:6, 6:4, 6:4
29.	28. Oktober 1990	Stockholm	Teppich	Stefan Edberg	6:4, 6:0, 6:3
30.	27. Januar 1991	Australian Open	Hardplatz	Ivan Lendl	1:6, 6:4, 6:4, 6:4
31.	27. Oktober 1991	Stockholm	Teppich	Stefan Edberg	3:6, 6:4, 1:6, 6:2, 6:2
32.	16. Februar 1992	Brüssel	Teppich	Jim Courier	6:7, 2:6, 7:6, 7:6, 7:5
33.	1. März 1992	Rotterdam	Teppich	Alexander Wolkow	7:6, 4:6, 6:2
34.	4. Oktober 1992	Basel	Hardplatz	Petr Korda	3:6, 6:3, 6:2, 6:4
35.	8. November 1992	Paris Indoor	Teppich	Guy Forget	7:6, 6:3, 3:6, 6:3
36.	22. November 1992	ATP-Weltmeesterschop	Teppich	Jim Courier	6:4, 6:3, 7:5
37.	10. Januar 1993	Doha	Hardplatz	Goran Ivanišević	7:6, 4:6, 7:5
38.	14. Februar 1993	Mailand	Teppich	Sergi Bruguera	6:3, 6:3
39.	13. Februar 1994	Mailand	Teppich	Petr Korda	6:2, 3:6, 6:3
40.	7. August 1994	Los Angeles	Hardplatz	Mark Woodforde	6:2, 6:2
41.	21. August 1994	New Haven	Hardplatz	Marc Rosset	6:3, 7:5
42.	30. Oktober 1994	Stockholm	Teppich	Goran Ivanišević	4:6, 6:4, 6:3, 7:6
43.	12. Februar 1995	Marseille	Teppich	Daniel Vacek	6:7, 6:4, 7:5
44.	19. November 1995	ATP-Weltmeesterschop	Teppich	Michael Chang	7:6, 6:0, 7:6
45.	28. Januar 1996	Australian Open	Hardplatz	Michael Chang	6:2, 6:4, 2:6, 6:2
46.	16. Juni 1996	London / Queen’s Club	Rasen	Stefan Edberg	6:4, 7:6
47.	13. Oktober 1996	Wien	Teppich	Jan Siemerink	6:4, 6:7, 6:2, 6:3
48.	27. Oktober 1996	Stuttgart Indoor	Teppich	Pete Sampras	3:6, 6:3, 3:6, 6:3, 6:4
49.	8. Dezember 1996	Grand Slam Cup	Teppich	Goran Ivanišević	6:3, 6:4, 6:4

#	Datum	Turneer	Belag	Partner	Endspeelgegners	Endresultat
1.	20. Mai 1984	München	Sand	Wojciech Fibak	Florin Segărceanu Eric Fromm	6:4, 4:6, 6:1
2.	23. März 1986	Brüssel	Teppich	Slobodan Živojinović	John Fitzgerald Tomáš Šmíd	7:6, 7:5
3.	19. Oktober 1986	Sydney Indoor	Hardplatz	John Fitzgerald	Peter McNamara Paul McNamee	6:4, 7:6
4.	29. März 1987	Brüssel	Teppich	Slobodan Živojinović	Chip Hooper Mike Leach	7:6, 7:6
5.	5. April 1987	Mailand	Teppich	Slobodan Živojinović	Sergio Casal Emilio Sánchez	3:6, 6:3, 6:4
6.	15. November 1987	Frankfort an’n Main	Teppich	Patrik Kühnen	Scott Davis David Pate	6:4, 6:2
7.	21. Februar 1988	Mailand	Teppich	Eric Jelen	Miloslav Mečíř Tomáš Šmíd	6:3, 6:3
8.	6. März 1988	Indian Wells	Hardplatz	Guy Forget	Jorge Lozano Todd Witsken	6:4, 6:4
9.	19. März 1989	Indian Wells	Hardplatz	Jakob Hlasek	Kevin Curren David Pate	7:6, 7:5
10.	11. März 1990	Indian Wells	Hardplatz	Guy Forget	Jim Grabb Patrick McEnroe	4:6, 6:4, 6:3
11.	16. Februar 1992	Brüssel	Teppich	John McEnroe	Guy Forget Jakob Hlasek	6:3, 6:2
12.	26. April 1992	Monte Carlo	Sand	Michael Stich	Petr Korda Karel Nováček	6:4, 6:4
13.	8. August 1992	Olympische Spelen	Sand	Michael Stich	Wayne Ferreira Piet Norval	7:6, 4:6, 7:6, 6:3
14.	10. Januar 1993	Doha	Hardplatz	Patrik Kühnen	Shelby Cannon Scott Melville	6:2, 6:4
15.	19. Februar 1995	Mailand	Teppich	Guy Forget	Petr Korda Karel Nováček	6:2, 6:4

¹ weern in Delray Beach
² weern in Boca West
³ weern in Essen
⁴ weern in Stuttgart

Becker hett an’n 17. Dezember 1993 de Schauspelersche un Designersche Barbara Feltus heiraat. Ut disse Eh stammt de beiden Söhnen Noah Gabriel un Elias Balthasar. In’n Janjuar 2001 weer de Eh aver wedder scheedt. Sien Dochter Anna Ermakova stammt vun en Affär, de he mit dat russ’sch-afrikaansche Model Angela Ermakova harr, wat eerst later rutkamen is un vun Becker eerst nich recht an de Apentlichkeit bröcht weer.^[3] Dorna weer he jümmer blots för korte Tiet Sabrina Setlur, Heydi Núñez Gómez, Patricia Farameh un Caroline Rocher tosamen. Mit dat nedderlännsche Model Sharlely „Lilly“ Kerssenberg weer he twee Johren (bit 2007) tosamen, un 2008 he vun August bit November mit Alessandra „Sandy“ Meyer-Wölden, de DOchter vun sien fröheren Manager, verloovt.

An’n 12. Juni 2009 hett he denn de negen Johr jüngere Sharlely Kerssenberg heiraat, de in’n Februar 2010 jemehrn Söhn Amadeus Benedict Edley Luis to Welt bröcht hett.^[4]

As Ünnernehmer is Becker Besitter vun dree Mercedes-Autohüüs in Stralsund, Griepswohld un Ribnitz-Damgorn. Bito hett de Warf-Verdrääg mit Mercedes-Benz. He is Sellschopper vun de Völkl Tennis GmbH un Mitgrünner un Sellschopper vun de Boris Becker GmbH in’t Swiezer Küsnacht. Butendem maakt he Warf för de Beermarke König Pilsener, för dat Ünnernehmen DAS Rechtsschutzversicherung un verschedene annere Ünnernehmen.

As Manager för sien Gewarfssaken harr he vun 1984 bit 1993 Ion Țiriac anstellt, dorna hett dat bit 1996 Axel Meyer-Wölden övernahmen.

Na sien Profiloopbahn hett Becker veel in de Medien maakt. He is Tennis-Fackmann un Kommentater bi de BBC in Grootbritannien un weer butendem Reporter för PREMIERE un bi DSF. 2004 hett he de Talkshow Becker 1:1 modereert, de aver gau afsett worrn is. As Kolumnist arbeit he ok för dat Hannelsblatt (Düütschland), för Blick (Swiez) un för The Times (Grootbritannien).

In’t Johr 2003 hett he sien Autobiografie „Augenblick, verweile doch“ publizeert. Allgemeen weer Becker ok na sien Profi-Loopbahn noch wieter in de Medien – nich blots wegen sien Privatlevebn, wat vele intresseren de, man ok wegen sien Arbeiten un de Warfspots, in de he to sehn weer.

In’n November 2007 hett he noch en Book rutbröcht ünner den Titel „Was Kinder stark macht“. Dat Book is en Raatgever för Öllern, de jemehr Kinner in Patchwork-Familien grootteht.

Mit Boris-Becker.TV hett Becker 2009 en egen Videoplattform in’t Internett bröcht. Sien Anliggen is dorbi ünner annern, de egene Sichtwies o pprivate, gewarfliche oder sellschoppliche Themen to transporteren, ahn dat drüdde Medien dorbi inwirken doot.^[5]

An’n 24. Oktober 2002 is Becker vun’t Landgericht München I to en Haftstraaf vun twee Johren (op Bewähren) veroordeelt worrn. Butendem weer he in de Plicht, 300.000 € Geldstraaf to betahlen un 200.000 € Geldbööt an verschedene karitatoive Inrichten to överwiesen.

Becker harr in sien Stüerberichten afsichtlich verkehrte Angaven maakt, üm 3,3 Millionen Mark to sporen. To Anfang vun de Verhanneln harr de ehmolige Sportler togeven, dat he twüschen 1991 un 1993 in München wahnt harr, ofschoonst he offiziell in Monaco mellt weer. He geev to, dat he över de Gefohren Bescheed weten hett un dat ok in Koop nahmen harr. Liekers segg he, dat man em nich naseggen künn, dat he Innahmen ünnerslahn harr oder kriminelle Saken bedreven harr. Straafminnern weer vör den Staatsafkaat aver, dat Becker ruchweg dree Millionen Euro to’n Betahlen vun de Stüerschuld betahlt harr. Butendem harr dat Verfohren acht Johren duert un weer för Becker en grote Belasten wesen.

Becker is Mitgrünner vun de Cleven-Becker-Stiftung un he is Chairman vun de Laureus Sports for Good Foundation. Wieter is he Grünnenliddmaat vun de Laureus World Sports Awards. Bi’n FC Bayern München is Becker in’n Weertschopsbiraat. As Bottschopper vun’n Welt-Aids-Dag weer he 2005 ünner dat Motto „Gemeensom gegen Aids“ aktiv- Wieter is Becker Board Member vun de Elton-John-Aids-Stiftung.

In’t Johr 1996 is na em en Seesnick nöömt worrn: Bufonaria borisbeckeri Parth, 1996 (Mollusca: Gastropoda: Bursidae). As Wassfigur kann een Boris Becker bi Madame Tussauds in Berlin un London ankieken.

• 1985 jüngste Wimbledon-Winner un to sien Tiet ok jüngste Winner vun en Grand-Slam-Turneers överhaupt (1989 is disse Rekord an Michael Chang gahn)
• 1985 jüngste Matchwinner in en Davis-Cup-Endspeel un dor ok gliek Dubbeltwinner^[6]
• hett in 14 Daag (19. Oktober bit 2. November 1986) dree Turneren op dree verschedene Eerddeelen wunnen.

• Sportler vun’t Johr: 1985, 1986, 1989, 1990
• Europa-Sportler vun’t Johr: 1986, 1989
• Sülvern Lorbeerblatt: 1985
• Bambi: 1985
• Düütsch Feernsehpries – Sünnerpries: 1999, tosamen mit Steffi Graf
• Steiger Award 2006
• Opnahm in de International Tennis Hall of Fame in Newport, Rhode Island (USA): 2003
• „Legenn vun’n Sport“ op den Düütschen Sportpresseball 2008
• Superbrands 2009/2010
• Geneter vun’t Johr 2011 (Utteken vun de Busche Verlagssellschop)
• Upnahm in de Hall of Fame vun den Düütschen Sport, 2015

• Augenblick, verweile doch …, Bertelsmann, München 2003, ISBN 3-570-00780-4 (Autobiografie)
• Was Kinder stark macht, Zabert Sandmann, München 2007, ISBN 3-89883-194-9 (Raatgever)

Boris Becker. Mehr Biller, Videos oder Audiodateien to’t Thema gifft dat bi Wikimedia Commons.

• Becker sien ATP-Profil
• Becker sien DAvis-Cup-Statistik
• Becker sien Profil op de ATP Champions Websteed
• Literatur vun un över Boris Becker in’n Katalog vun de Düütschen Natschonalbökeree