ബൈസിക്കിൾ തീവ്‌സ്

മുഖ്യ കഥാപാത്രമായ റിച്ചി അന്തോണിയോക്ക് എംപ്ലോയ്‌മെന്റ്‌ എക്സ്ചേഞ്ചിനു മുന്നിലുള്ള മാസങ്ങളുടെ കാത്തിരിപ്പിനുശേഷം ഒരു താൽക്കാലിക ജോലി ലഭിക്കുന്നു. മതിലുകളിൽ പോസ്റ്റർ പതിക്കുന്ന ആ ജോലിയിൽ ചേരണമെന്നുണ്ടെങ്കിൽ സ്വന്തമായി ഒരു സൈക്കിൾ ഉണ്ടാവേണ്ടതുണ്ട്. അന്തോണിയോവിന്റെ സൈക്കിൾ പണയം വച്ചിരിക്കുകയുമാണ്. അയാളുടെ ഭാര്യ പെട്ടെന്ന് ഒരു പ്രതിവിധി കണ്ടത്തുന്നു. വീട്ടിലെ കിടക്കവിരികൾ പണയമായി ഏൽപ്പിച്ച് സൈക്കിൾ തിരിച്ചെടുക്കുന്നു. സൈക്കിളുമെടുത്ത് ജോലി ആരംഭിച്ച് അധികം താമസിയാതെ തന്നെ സൈക്കിൾ മോഷ്ടിക്കപ്പെടുന്നു.

മകൻ ബ്രൂണോയുമൊത്ത് അയാൾ സൈക്കിൾ തിരഞ്ഞുനടക്കുന്ന ദൃശ്ശ്യങ്ങൾ ഹൃദയഭേദകമാണ്. പോലിസ്‌ സ്റ്റേഷനിൽ പരാതിബോധിപ്പിക്കാനായി പോകുമ്പോൽ അയാൾക്കുണ്ടാവുന്ന അനുഭവം ജീർണമായിക്കഴിഞ്ഞ ഒരു ഭരണ- ഔദ്യോഗിക സംവിധാനത്തിന്റെ ലക്ഷണമാണ്. തന്റെ സൈക്കിൾ മോഷ്ടിക്കപ്പെട്ടിരിക്കുന്നു എന്നയാൾ പറയുമ്പോൾ ക്യാമറ കെട്ടുകെട്ടായി കൂട്ടിവെച്ചിരിക്കുന്ന അത്തരം നിരവധി പരാതികളിലേക്കാണ് തിരിയുന്നത്. അധികാരികളുടെ മനോഭാവമാകട്ടെ കടുത്ത നിസ്സംഗതയോടെയുള്ളതും.

എല്ലാ പ്രതീക്ഷയും അറ്റുപോയ ഒരു നേരത്ത്‌ കൈയിലുള്ള ചില്ലിക്കാശുകൊണ്ടയാൾ ബ്രൂണോയ്ക്ക് ഒരു പീസ്സ വാങ്ങിക്കൊടുക്കാൻ ഹോട്ടലിലെത്തുന്നു. തൊട്ടടുത്ത മേശയിൽ, മൃഷ്ട്ടാന്ന ഭക്ഷണം കഴിക്കുന്ന ഒരു കുടുംബത്തിലേക്ക് കണ്ണുപായിക്കുന്ന മകനോട്‌ അയാൾ പറയുന്നു, അത്രയും ഭക്ഷണം വാങ്ങണമെന്നുണ്ടെങ്കിൽ ഒരു മാസത്തിൽ പത്ത് ലക്ഷം ലിറ (ഇറ്റാലിയൻ കറൻസി) എങ്കിലും വരുമാനം വേണ്ടിവരും.

മോഷ്ടാവിനെ അവർക്ക് കണ്ടെത്താനാവുന്നുണ്ടെങ്കിലും പോലീസിനു മുമ്പിൽ വിശ്വസനീയമായ തെളിവുകൾ കാണിച്ചുകൊടുക്കാനാവത്തതിനാൽ ആ ശ്രമവും വിഫലമാകുന്നു. മാത്രമല്ല, കള്ളനായി സംശയിക്കപ്പെടുന്നവന്റെ വീട്ടുകാരും അയൽക്കാരും അവന് നല്ല സർട്ടിഫിക്കറ്റ് കൊടുക്കുന്നതോടെ കാര്യങ്ങൾ അന്തോണിയോവിനു എതിരെ തിരിയുന്നു. ആകെ പ്രതിസന്ധിയിലാവുന്ന അന്തോണിയോ ഫുട്ബോൾ മൽസരം നടക്കുന്ന സ്റ്റേഡിയത്തിന് പുറത്ത് നിർത്തിയിട്ടിരിക്കുന്ന നിരവധി സൈക്കിളുകളിലൊന്ന് മോഷ്ടിച്ചു സ്വന്തമാക്കാൻ ശ്രമിക്കുന്നു. പക്ഷെ ആ കാര്യത്തിലും പ്രാപ്തനല്ലാത്ത അയാൾ പെട്ടെന്ന് പിടിക്കപ്പെടുകയും ആൾക്കൂട്ടത്തിന്റെ മർദ്ദനത്തിനും അവഹേളനത്തിനും പാത്രമാകുകയും ചെയ്യുന്നു. അനിശ്ചിതമായ ഭാവിയുടെ ഇരുളിലേക്ക് നടന്നു നീങ്ങുന്ന നായകന്റെയും കുടുംബത്തിന്റെയും പ്രതീക്ഷാരാഹിത്ത്യത്തിലാണ് സിനിമ അവസാനിക്കുന്നത്.

ലാമ്പർട്ടോ മാഗ്ഗിയോറനി- അന്തോണിയോ റിച്ചി
എൻസോ സ്റ്റായിയോള- ബ്രൂണോ റിച്ചി
ലിയനെല്ലാ കാരെൽ- മരിയ റിച്ചി
വിറ്റോറിയോ ആന്റോനുസ്സി- കള്ളൻ

^[2][3][4]

• ബൈസിക്കിൾ തീവ്‌സ് ഇന്റർനെറ്റ് മൂവി ഡാറ്റാബേസിൽ
• ബൈസിക്കിൾ തീവ്‌സ് Internet Archive ൽ നിന്നും സൌജന്യമായി ഡൌ​ൺലോഡ് ചെയ്യാം
• ബൈസിക്കിൾ തീവ്‌സ് The Criterion Collection ൽ ഗോട്ഫ്രെ ചെഷയരുടെ ഉപന്യാസം ("Bicycle Thieves: A Passionate Commitment to the Real")
• ബൈസിക്കിൾ തീവ്‌സ് എ. ഒ. സ്കോട്ടിന്റെ അവലോകനം (The New York Times) യൂട്യൂബിൽ
• ബൈസിക്കിൾ തീവ്‌സ് ട്രൈലെർ YouTube