കിയോഷി ഷിഗ

ജപ്പാനിലെ മിയാഗി പ്രിഫെക്ചറിലെ സെൻഡായിയിലാണ് കിയോഷി ഷിഗ ജനിച്ചത്. സടോ എന്ന യഥാർത്ഥ കുടുംബപ്പേരുണ്ടായിരുന്ന അദ്ദേഹം മാതൃ കുടുംബത്തിന്റെ സംരക്ഷണയിൽ വളർന്നശേഷം മാതാവിന്റെ ആദ്യനാമമായ ഷിഗ തന്റെ പേരിനോട് ചേർത്തു.^[1] ജപ്പാനിലെ വ്യാവസായിക യുഗത്തിലും പുനരുദ്ധാരണം കാലഘട്ടത്തിലുമാണ് ഷിഗ വളർന്നത്. കാലം മാറിക്കൊണ്ടിരിക്കവേ അദ്ദേഹത്തിന്റെ കുടുംബം സാമ്പത്തിക പ്രയാസങ്ങൾ നേരിട്ടു.^[2] 1900 ൽ ഇച്ചിക്കോ ഷിഗയെ വിവാഹം കഴിച്ച കിയോഷി ഷിഗയ്ക്ക് തുടർന്നുള്ള വർഷങ്ങളിൽ എട്ട് മക്കളുണ്ടാകുകയും ചെയ്തു.^[3] ഇക്കാലത്ത് കുടുംബത്തിൽ നിരവധി ബുദ്ധിമുട്ടുകളെ അദ്ദേഹം നേരിട്ടു. 1944 ൽ വയറ്റിലെ ക്യാൻസർ ബാധയാൽ ഭാര്യയെ നഷ്ടപ്പെട്ട ഷിഗയുടെ മൂത്തപുത്രനെ ഒരു നാവിക യാത്രയ്ക്കിടെ പ്രക്ഷുബ്ധമായ കടൽ കവർന്നപ്പോൾ മറ്റൊരു മകൻ ക്ഷയരോഗത്താലും മരണമടഞ്ഞിരുന്നു.^[4]

കിയോഷി ഷിഗ ഹൈസ്കൂൾ പഠനത്തിന് ശേഷം 1896 ൽ ടോക്കിയോ ഇംപീരിയൽ സർവകലാശാലയിലെ മെഡിക്കൽ സ്കൂളിൽ ചേർന്നു.^[5] സർവ്വകലാശാലയിൽവച്ച് റോബർട്ട് കോച്ചിന്റെ പിൻഗാമികളിലൊരാളും ബാക്ടീരിയോളജി, രോഗപ്രതിരോധശാസ്ത്രം എന്നിവയെക്കുറിച്ച് പഠനം നടത്തുകയും ചെയ്തിരുന്ന ലോകപ്രശസ്ത ജാപ്പനീസ് ശാസ്ത്രജ്ഞൻ കിറ്റാസാറ്റോ ഷിബാസാബുറയെ പരിചയപ്പെട്ടു.^[6] കിറ്റാസാറ്റോയോടും അദ്ദേഹത്തിന്റെ ജോലിയോടുമുള്ള ഷിഗയുടെ ആകർഷണം കിറ്റാസറ്റോ ഷിബാസബുറയുടെ നിയന്ത്രണത്തിലുള്ള പകർച്ചവ്യാധി സംബന്ധമായ വിഷയങ്ങൾ പഠിപ്പിക്കുന്ന ഇൻസ്റ്റിറ്റ്യൂട്ടിൽ ഒരു ജോലിയിൽ തുടരാൻ അദ്ദേഹത്തെ പ്രേരിപ്പിച്ചു.^[7] ഇൻസ്റ്റിറ്റ്യൂട്ടിൽ ജോലി ചെയ്യുന്നതിനിടയിൽ, 1897 ൽ ഏകദേശം 90,000 ത്തിലധികം കേസുകൾ റിപ്പോർട്ട് ചെയ്യപ്പെട്ടതും മരണനിരക്ക് 30 ശതമാനം വരെ എത്തിയതുമായ ഒരു കടുത്ത പകർച്ചവ്യാധിയുടെ സമയത്ത്, വയറിളക്കത്തിന് കാരണമാകുന്ന സൂക്ഷ്മജീവിയായ ഷിഗെല്ല ഡിസന്റീരിയയെ കണ്ടെത്തിയതിലൂടെ അദ്ദേഹം പ്രശസ്തനായി.^[8][9] ബാക്ടീരിയയ്ക്ക് ഷിഗെല്ല എന്ന് അദ്ദേഹത്തിന്റെ പേരും അത് ഉൽ‌പാദിപ്പിക്കുന്ന ജൈവിക വിഷത്തിന് ഷിഗാ ടോക്സിൻ എന്ന പേരും നൽകി. ഷിഗെല്ല ബാക്ടീരിയ കണ്ടെത്തിയതിനുശേഷം, 1901 മുതൽ 1905 വരെയുള്ള കാലത്ത് അദ്ദേഹം ജർമ്മനിയിൽ പോൾ എർലിചിനൊപ്പം പ്രവർത്തിച്ചു.^[10] ജപ്പാനിലേക്ക് മടങ്ങിയെത്തിയ അദ്ദേഹം കിറ്റാസാറ്റോയുമായി പകർച്ചവ്യാധികളെക്കുറിച്ചുള്ള തന്റെ പഠനം പുനരാരംഭിച്ചു.^[11] 1920 ൽ കിയോ സർവ്വകലാശാലയിൽ അദ്ദേഹം പ്രൊഫസറായി നിയമിതനായി.^[12] 1929 മുതൽ 1931 വരെ, കെയ്‌ജോയിലെ (സിയോൾ) കെയ്‌ജോ ഇംപീരിയൽ യൂണിവേഴ്‌സിറ്റി പ്രസിഡന്റും കൊറിയയിലെ ജാപ്പനീസ് ഗവർണർ ജനറലിന്റെ മുതിർന്ന മെഡിക്കൽ ഉപദേഷ്ടാവായിരുന്നു ഷിഗ.^[13] 1944 ൽ ഓർഡർ ഓഫ് കൾച്ചർ പുരസ്കാരത്തിന്റെ സ്വീകർത്താവായിരുന്നു ഷിഗ. 1957-ൽ മരണമടഞ്ഞ അദ്ദേഹത്തിന് ഫസ്റ്റ് ക്ലാസ് ഓർഡർ ഓഫ് സേക്രഡ് ട്രെഷർ ബഹുമതിയും ലഭിച്ചു. നിരവധി നേട്ടങ്ങൾക്കൊപ്പം 1957-ൽ മരണശേഷം പോലും വ്യാപകമായി പ്രചാരത്തിലുണ്ടായിരുന്ന ബാക്ടീരിയോളജി, ഇമ്മ്യൂണോളജി എന്നിവയെക്കുറിച്ചുള്ള പാഠപുസ്തകങ്ങളും ഷിഗ എഴുതിയിട്ടുണ്ട്.^[14]