Кејлеб Јуан

Јуан е роден во Нов Јужен Велс во семејство на корејска мајка и австралиски татко. На осум години започнал да вози, поттикнат од неговиот татко, кој исто така бил велосипедист.^[5] Јуан започнал со трки во велосипедизам на десет години. Во 2010 година станал национален јуниорски друмски првак. Следната година освоил повеќе дисциплини на националните јуниорски велодромски првенства и станал светски првак во омниум на Светското јуниорско велодромско првенство.

Во 2013 година, Јуан започнал да вози за Џајко-АИС Академија. Таа година ја освоил првата етапа како и генералниот пласман на Заливскиот класик. Исто така, победил на Ла Кот Пикард, Гран Премио Палио дел Речото и етапи на Тур Алзас, Трката околу Тирингија и Тур де л’Авенир. На крајот на годината завршил четврти на друмската трка под 23 години на Светското друмско првенство.

Јуан потпишал преддоговор со екипата Орика-ГринЕЏ во октомври 2013 година, приклучувајќи се на екипа од Светската турнеја како стажант од август 2014 година и како професионален од октомври.^[6][7] На почетокот на август, пред да се приклучи на екипата, Јуан учествувал на друмската трка на Комонвелтските игри 2014, настапувајќи за Австралија. Австралиската репрезентација се обидела да ја контролира трката за спринт на Јуан, но не успеале во тоа. Откако се обидел да стигне сам до тројцата предводници, се повлекол назад и бил последен кој ја поминал целта; завршил на 12. место, над 11 минути зад освојувачот на златниот медал Герајнт Томас (Велс).^[8]

Негови први професионални победи биле втората и третата етапа на Хералд Сан Тур 2015. Еден месец подоцна, на Тур де Лангкави ја освоил втората професионална победа и водството во генералниот пласман. Иако го загубил водството на трката, Јуан ја освоил втората етапа (трета победа во кариерата) и бодовниот пласман. Бил вклучен во почетниот состав за Вуелта а Еспања 2015,^[9] каде ја освоил петтата етапа,^[10] но се повлекол од трката на десеттата етапа.^[11]

Во 2016 година, Јуан учествувал на Тур Даун Андер и ја освоил првата етапа во масовен спринт.^[12] Стигнал со втора победа и на шестата етапа.^[13] Победил и на втората етапа на Хералд Сан Тур, уште една австралиска трка.^[14] Бил вклучен во почетниот состав за Џиро д’Италија 2016.^[15] Возел на Џиро д’Италија 2017, каде што ја освоил седмата етапа во групен спринт.^[16]

Во јули 2019 година учествувал на Тур де Франс 2019 и на единаесеттата етапа го поразил Дилан Груневеген во тесен спринт во Тулуза.^[17][18] Ја освоил етапата 16 на Тур де Франс во Ним, тесно поразувајќи го Елија Вивијани, а победил и на познатата завршна етапа во Париз на Шанзелизе, повторно тесно победувајќи го Груневеген.

Тој бил последен на Тур де Франс 2022, завршувајќи над 5 часа позади крајниот победник Јонас Вингегор.^[19]

Голема трка	2015	2016	2017	2018	2019	2020	2021	2022
Џиро	—	СО	СО	—	СО	—	СО	СО
Тур	—	—	—	—	132	144	СО	135
Вуелта	СО	—	—	—	—	—	—	—

СО = се откажал; — = не учествувал; НСО = не се одржала

• „Достигнувања на Кејлеб Јуан“. Cycling Archives.
• „Достигнувања на Кејлеб Јуан“. Cycling Quotient.
• „Достигнувања на Кејлеб Јуан“. ProCycling.