Зимовка
| Зимовка | |
|---|---|
.jpg) | |
| Pyrrhulas (mas, fem) | |
| Научна класификација | |
| Царство: | Животни |
| Колено: | Хордови |
| Класа: | Птици |
| Ред: | Врапчевидни |
| Семејство: | Ѕвингалки |
| Род: | Pyrrhula |
| Вид: | Зимовка |
| Научен назив | |
| Pyrrhula pyrrhula (Linnaeus, 1758) | |
Зимовката (науч. Pyrrhula pyrrhula) е мала врапчевидна птица од семејството на ѕвингалките (Fringillidae). Распространета е низ Европа, вклучувајќи ја и Македонија и низ умерена Азија. Таа е претежно постојан жител, но многу од птиците од посеверните краишта се селат понајуг зиме.
Подвидови
Зимовката има неколку подвида:[2]
- P. p. pileata W. MacGillivray, 1837 – Британските Острови;
- P. p. europoea Vieillot, 1816 – западна и централна Европа;
- P. p. iberiae Voous, 1951 – планините на југозападна Франција, северна Португалија и северна Шпанија;
- P. p. pyrrhula (Linnaeus, 1758) – северна, јужниот дел од централна и источна Европа, низ Сибир и централна Азија;
- P. p. rossikowi Derjugin & Bianchi, 1900 – Турција, Кавказ и северозападен Иран;
- P. p. caspica Witherby, 1908 – Азербејџан и северен Иран;
- P. p. cineracea Cabanis, 1872 – Сибир, североисточен Казахстан, Монголија и Кина;
- P. p. cassinii S. F. Baird, 1869 – далеку на исток во Русија и североисточна Кина;
- P. p. griseiventris Lafresnaye, 1841 – далеку на исток во Русија, Кина, Кореја и Јапонија.
Опис
Зимовката е гломазна, робусна птица, со голема глава, долга 14.5-16 см. Горните делови на телото се сиви; пердувите за летање се црни, како и краткиот дебел клун, капата и лицето (кај возрасните) и опашката. Кај младенчињата овие делови се сивкавокафеави. Бело има на задникот и линија на крилјата, а одоздола, возрасните мажјаци се црвенопортокалови, а женките и младенчињата посветли кремавопортокалови.
Пеењето на оваа ненаметлива птица содржи мешавина од течни свирежи.
Поведение
Живеалиштето на зимовката се мешаните шуми со некои иглолисни дрвја за гнездење, како и парковите и градините. Вон сезоната на парење не формира големи јата, и обично се гледаат во пар или семејна група.
Исхрана
Зимовката се храни главно со семиња и пупки од овошните дрвја, што може да го направи штетник во овоштарниците. Наесен и зиме ги фаворизира јасенот и глогот.[3]
Размножување
Оваа птица своето гнездо го гради во грмушка, (по можност повеќе од четири метри висока и широка), голем џбун или дрво (смрека или елка). Сезоната на парење трае од мај до средината на јули кога еден пар може да има и до три легла. Во секое од нив женката несе 4-5 светлосини јајца со ситни темноцрвени точки. Ги инкубира 13-15 дена, а за тоа време мажјакот ја храни. Потоа обата родитела ги хранат пилињата со инсекти и семиња.
Наводи
Надворешни врски
- Возраст и пол (PDF; 2.2 MB) од Javier Blasco-Zumeta & Gerd-Michael Heinze Архивирано на 12 ноември 2013 г.