Cóppa Itàlia de balón

O tornêo da Cóppa Itàlia o l'é stæto inandiòu pi-â prìmma vòtta into córso da stagión do 1983. In prinçìpio o coinvolgéiva ségge de squàddre da-a Série A che da-a Série B ma, co-a creaçIón do tornêo de Cóppa Itàlia de Série B, òua ògni categorîa a l'à 'n pròpio tornêo pi-â cóppa.

Dòppo o 1983, a Cóppa Itàlia a no l'é stæta asegnâ inte stagioìn 1996, 1997 e 2004, óltre che inte quélla do 2020, co-o canpionòu ch'o l'é stæto scancelòu aprêuvo a-o sccéuppo da pandemîa de COVID-19. In particolâ, inte l'ediçiòn do 1996, l'êa acapitòu ch'a foîse zugâ sôlo a prìmma de dôe semifinâle, co-e segónda ch'a l'é stæta rimandâ a l'ànno a vegnî. A ògni mòddo, aprêuvo a di càngi de squàddra di zugoéi, a vàrri infortunæ e pe 'n ricórso da Subalcuneo cóntra a manêa no goæi regolâre de ricuperâ a partîa, a Cóppa Itàlia 1996 a l'é restâ sénsa 'n vincitô^[1].

Pe còntra, inte l'ànno dòppo, a Cóppa Itàlia a no l'é stæta asegnâ dæto aprêuvo a-a decixón de tentâ 'n nêuvo scistêma pe l'asegnaçión da cóppa, inandiâ cómme 'n tornêo a-o cordìn con zugoéi da tùtte dôe e série magioî e con partîe a-i 15 zêughi. A ògni mòddo sta fórmola chi a l'à avûo coscì pöco sucèsso da êse fîto abandonâ, sénsa asegnâ dónca o trofêo de quéllo ànno^[1]. In sciâ fìn, l'ediçión do 2004 a l'é stæta anulâ aprêuvo a-a prezénsa do canpionòu mondiâle di spòrt sferìstichi in Itàlia, dónde gh'êa vàrie partîe de balón ascì^[2].

O regolaménto da Cóppa Itàlia o l'é bén bén cangiòu co-o pasâ di ànni^[2]; segóndo a sò fórmola d'ancheu, pe qualificâse a-o tornêo da Cóppa Itàlia, 'na squàddra da màscima série a se dêve trovâ inte unn-a de prìmme éutto poxiçioìn da clascìfica a-a fìn do gîón d'andâta da regular season.

E squàddre coscì seleçionæ vêgnan dónca inserîe inte 'n tabelón con partîe a eliminaçión dirétta. I quàrti de finâle e-e dôe semifinâle són da zugâ into cànpo da squàddra mêgio clasificâ, pe cóntra a finâle a se dêve tegnî inte 'n cànpo neótro.

• Wikimedia Commons a contêgne di files in sce Cóppa Itàlia de balón

• (IT) Scîto ofiçiâ da Federaçión Italiànn-a Balón, in sce fipap.it. URL consultòu o 29 zùgno 2022.
• (IT) Lo Sferisterio - cóppa Itàlia, in sce losferisterio.it. URL consultòu o 29 zùgno 2022.