P-47 Thunderbolt

Dit artikel is gesjreve (of begós) in 't Oeals. Laes hie wie v'r mit de versjillende saorte Limburgs ómgaon.

De Republic P-47 Thunderbolt, ouch bekindj onger de naam "Jug", waas 't grootste en duurste gevegsvleegtuug van vleegtuugboewwer Republic. 't Waas es jager ontworpe en waerdje tiedes de Tweede Waereldoorlog later ouch gebroektj es jagbommewerper. De eerste vluch waerdje oetgeveurdj op 6. mei 1941. Tiedes de oorlog waerdje ongeveer 15.600 Thunderbolts gemaaktj, die in eder oorlogsgebied waerdje ingezatj.

De P-47 waas de opvolger van ein lien vleegtuge en doorontwikkeldj vanoet de Seversky P-35, de XP-41, P-43 Lancer en de XP-44 Rocket. 't P-47 ontwerpteam aangeveurdj door Alexander Kartveli, prizzenteerdje ein ontwerp det aangedreve waerdje mit eine 1150 pk Allison V-1710-39 motor with en allein twee 0.50 inch mitrailleurs. Nao de berichte vanoet Europa euver, sjneller, baeter jagers waerdje 't vleegtuug opnuuj ontworpe en oetgeröstj mit eine 2000 pk Pratt & Whitney Double Wasp XR-2800-21, op det moment de sjterkst besjikbare vleegtuugmotor in Amerika. Hae rösdje 't vleegtuug ouch nog oet mit eine supercharger, woveur hae de romp mos aanpasse, zodet dae supercharger veur de gewichsverdeiling achter in 't vleegtuug kos waere geboewdj. Daodoor kreeg de jager monsterlikke aafmaetinge en waas 't bienao twee keer zo zjwaor es de anger bekindje jagers van'ne geallieerde, de Supermarine Spitfire, de Hawker Hurricane, de Dewoitine D.520. Om 't vermoge vanne nuje grote motor kwiet te kinne waerdje de drieblajige propellor vervange door eine veerblajige. Toch waerdje 't ein vanne drie béste jagers vanne USAAF naeve de North American P-51 Mustang enne Lockheed P-38 Lightning.