ಅಶೋಕ ಬಾದರದಿನ್ನಿ

ರುದ್ರಗೌಡ- ಗೌರಮ್ಮ ದಂಪತಿಗೆ 1951ರಲ್ಲಿ ಜನಿಸಿದ ಅಶೋಕ ಮಿತ್ರಮಂಡಳಿ ರಚಿಸಿಕೊಂಡು ನಾಟಕವಾಡಲು ಶುರುಮಾಡಿದ್ದು ಶಾಲಾ ದಿನಗಳಿಂದಲೆ. ವಿಜಯಪುರಕ್ಕೆ ಹೊಸ ನಾಟಕಗಳನ್ನು ಪರಿಚಯಿಸುತ್ತಿದ್ದ ರಂಗಪರಿಚಾರಕ ಶ್ರೀನಿವಾಸ ತಾವರಗೇರಿ ಅವರಿಗೆ ಕೆಲಕಾಲ ಹೆಗಲೆಣೆಯಾಗಿ ನಿಂತರು. ನಂತರ ದೆಹಲಿ ನಾಟಕ ಶಾಲೆ ಸೇರಿದರು. ವಾಪಸ್ ಬಂದ ಮೇಲೆ ರಾಜ್ಯದ ಹಲವು ಹಳ್ಳಿ ಪಟ್ಟಣಗಳಲ್ಲಿ ತಿಂಗಳುಗಟ್ಟಲೆ ಕ್ಯಾಂಪ್ ಮಾಡಿ ರಂಗಶಿಬಿರ ನಡೆಸಿಕೊಟ್ಟರು. ಹೊಸ ಹೊಸ ನಾಟಕ ಕಲಿಸಿದರು. ನಾಟಕ ಶಾಲೆಗಳಿಗೆ ಮೇಷ್ಟ್ರಾಗಿ ಕೆಲಸ ಮಾಡಿದರು.

1981 ರಲ್ಲಿ ಬೆಂಗಳೂರಿನ ಅಭಿನಯ ತರಂಗದಲ್ಲಿ ಎ.ಎಸ್.ಮೂರ್ತಿ, ಪುಟ್ಟಣ್ಣ ಕಣಗಾಲ್, ಡಾ.ವಿಜಯಾ, ರಾಜೀವ ತಾರಾನಾಥ ಅವರೊಂದಿಗೆ ಭಾನುವಾರದ ಶಾಲೆ ಆರಂಭಿಸಿದರು. ಒಂದು ವರ್ಷ ಪ್ರಾಂಶುಪಾಲರಾಗಿ ದುಡಿದರು.

ಶಿವಮೊಗ್ಗ, ಉಡುಪಿ, ಮೈಸೂರು, ಕೋಲಾರ, ಮಂಡ್ಯ, ಮಾಲೂರು, ಭದ್ರಾವತಿ -ಹೀಗೆ ರಾಜ್ಯದ ಮೂಲೆ ಮೂಲೆಗಳಲ್ಲಿ ಸುತ್ತಿ ರಂಗಶಿಬಿರ ನಡೆಸಿಕೊಟ್ಟರು. ಮ್ಯಾಕ್‌ಬೆತ್, ಟಿಂಗರ ಬುಡ್ಡಣ್ಣ, ಕುಂಟ ಕುಂಟ ಕುರುವತ್ತಿ, ಮರಣವೇ ಮಹಾನವಮಿ, ಉದ್ಭವ, ದುರ್ಗಾಸ್ತಮಾನ, ಈಡಿಪಸ್, ಸಿರಿಸಂಪಿಗೆ, ಮಹಾಬೆಳಗು ಮುಂತಾದ ನಾಟಕಗಳನ್ನು ನಿರ್ದೇಶಿಸಿದರು. ರೂಪಕಗಳನ್ನು ಸಾಲು ಸಾಲಾಗಿ ರಚಿಸಿ ನಿರ್ದೇಶಿಸಿದರು. ಮುರುಘಾಮಠ, ವಿಜಯಮಹಾಂತ ಕಲಾಲೋಕದಿಂದ ಶುರುವಾದ ರೂಪಕಗಳ ಅಭಿಯಾನ ರಾಜ್ಯದ ಹಲವಡೆ ಜೈತ್ರಯಾತ್ರೆ ನಡೆಸಿತು. ರೂಪಕಗಳ ಜನಕ ಎಂದೇ ಹೆಸರಾದರು.

ಈ ಮಧ್ಯೆ ಸಿನಿಮಾ ಹಾಸ್ಯನಟರಾಗಿ ಜನಪ್ರಿಯರಾದರು. ನಾಟಕಗಳಲ್ಲಿ ಪಳಗಿದ ಕಲಾವಿದನಿಗೆ ಸಿನಿಮಾ ನಟನೆ ಸಲೀಸು ಎಂಬುದಕ್ಕೆ ಬಾದರದಿನ್ನಿಯವರ ಲೀಲಾಜಾಲ ಅಭಿನಯವೇ ನಿದರ್ಶನ.

ತನ್ನ ಅನಾರೋಗ್ಯ ಉಪೇಕ್ಷಿಸಿ ರಂಗಭೂಮಿ ಆರೋಗ್ಯಕ್ಕೆ ಶ್ರಮಿಸಿದ ಅಶೋಕ ಬಾದರಿದಿನ್ನಿ ಅವರಿಗೆ ರಾಜ್ಯೋತ್ಸವ, ಸಾಣೇಹಳ್ಳಿ ಶಿವಸಂಚಾರದ ಶ್ರೀ ಶಿವಕುಮಾರ ಪ್ರಶಸ್ತಿ ಸೇರಿದಂತೆ ಹಲವು ಪ್ರಶಸ್ತಿಗಳು ಮುಡಿಗೇರಿವೆ.

‘ರಂಗಸಂಪನ್ನರು’ ಮಾಲಿಕೆಯಡಿ ಕರ್ನಾಟಕ ನಾಟಕ ಅಕಾಡೆಮಿಯು ವಿಶ್ವನಾಥ ವಂಶಾಕೃತಮಠ ಅವರಿಂದ ‘ಅಶೋಕ ಬಾದರದಿನ್ನಿ’ ಪುಸ್ತಕ ಬರೆಸಿದೆ.

ದೀರ್ಘಕಾಲ ಅನಾರೋಗ್ಯದಿಂದ ಬಳಲಿದ್ದ ರಂಗಕರ್ಮಿ, ಚಿತ್ರನಟ ಅಶೋಕ ಬಾದರದಿನ್ನಿ (65) ಚಿತ್ರದುರ್ಗದ ಖಾಸಗಿ ಆಸ್ಪತ್ರೆಯಲ್ಲಿ 2016ರ ನವೆಂಬರ್ 24 ಗುರುವಾರ ಬೆಳಗಿನ ಜಾವ ನಿಧನರಾದರು.^[೧].ಮೃತರಿಗೆ ಪತ್ನಿ ಅನಸೂಯಾ, ಪುತ್ರಿ ಶಿಲ್ಪಾ, ಶುಭಾಂಗಿ ಮತ್ತು ಪುತ್ರ ಪ್ರಕಾಶ ಇದ್ದಾರೆ. 2016ರ ನವೆಂಬರ್ 24 ಗುರುವಾರ ಮಧ್ಯಾಹ್ನ ನಗರದ ಖಾಸಗಿ ಬಸ್ ನಿಲ್ದಾಣ ಸಮೀಪದ ರುದ್ರಭೂಮಿಯಲ್ಲಿ ಅಂತ್ಯಕ್ರಿಯೆ ನಡೆಯಿತು.