კავკაზსკაია სტარინა

„კავკაზსკაია სტარინა“ (რუს. „Кавказская старина“) — ყოველთვიური ისტორიული, არქეოლოგიური, ეთნოგრაფიული ჟურნალი რუსულ ენაზე. გამოდიოდა თბილისში 1872 წლის ნოემბრიდან 1873 წლის ივნისის ჩათვლით. რედაქტორი-გამომცემელი — ალექსანდრე ერიცოვი.

ჟურნალში იბეჭდებოდა ისტორიული დოკუმენტები, კავკასიის ხალხთა მემატიანეების თხზულებათა თარგმანები, წერილები არქეოლოგიისა და ისტორიის საკითხებზე, ძეგლთა აღწერა და ბიბლიოგრაფია. თანამშრომლობდნენ რაფიელ ერისთავი, პლატონ იოსელიანი, დიმიტრი ბაქრაძე და სხვა.