Rauðvín
Rauðvín er búið til í víngerðarhúsum þar vínberjaþrúgum er breytt í vín eftir ákveðnum aðferðum. Þegar þrúgurnar koma inn í víngerðarhúsið fara þær í gegnum vél sem hreinsar stilkana frá og rýfur hýðið svo safinn geti flætt út.
![](http://upload.wikimedia.org/wikipedia/commons/thumb/a/a8/Glass_of_unidentified_red_wine.jpg/300px-Glass_of_unidentified_red_wine.jpg)
Þegar rauðvín er gert eru þrúgurnar ekki pressaðar eins og þegar hvítvín er búið til heldur eru þær settar heilar í stóra tanka eða ámur. Við rauðvínsgerð er eingöngu hægt að nota dökkar þrúgur og er hýði þeirra látið gerjast með safanum og vínið tekur í sig lit úr hýðinu. Því lengri tíma sem hýðið er í snertingu við safann, því dekkra verður vínið. Þegar gerjuninni er lokið er vínlögurinn pressaður og safinn þannig skilinn frá hýðinu.
Víngerðin
![](http://upload.wikimedia.org/wikipedia/commons/thumb/2/27/Grgich_Hills_wine_tanks_-_Stierch.jpg/200px-Grgich_Hills_wine_tanks_-_Stierch.jpg)
Á hýði þrúgnanna er náttúrlegur gerill sem setur gerjun vínsins af stað við rétt hitastig og þegar hann kemst í snertingu við þrúgusykur. Sumir víngerðarmenn kjósa þó frekar að nota ræktaða gerla þar sem þeir eru stöðugri en náttúrlegu gerlarnir og því auðveldara að hafa áhrif á bragð vínsins. Hitastig vínblöndunnar er mjög mikilvægur þáttur við víngerð en ef blandan verður of köld er hætta á að gerjun stöðvist og ef hún verður of heit missa vínin ferskleika. Þróaðar hafa verið leiðir til að hafa áhrif á hitastigið við gerjun m.a með því að láta vatn streyma um rör í víntönkunum.Styrkleiki vínsins fer eftir magni þrúgusykurs í þrúgunum og sætleiki vínsins fer eftir því hversu áfengt vínið verður. Vínið þarf alltaf að bíða í nokkra mánuði fyrir átöppun. Fyrst er það sett í stóra tanka þar sem það er geymt við mjög lágt hitastig svo engin hætta sé á að gerjun fari af stað á nýjan leik. Sum víngerðarhús geyma vínið á eikartunnum í nokkra mánuði fyrir átöppun. Það er til þess gert að fá eikarbragð í vínið en margir tengja eikarbragð við betri vín.Eftir geymslu er vín úr mörgum tönkum eða tunnum sett saman í endanlega blöndu. Hún getur verið blanda úr nokkrum tegundum af þrúgum eða þrúgum af mismunandi svæðum vínekrunnar.
![](http://upload.wikimedia.org/wikipedia/commons/thumb/9/94/Douro_Wineyard_Terraces_%2810247850404%29.jpg/300px-Douro_Wineyard_Terraces_%2810247850404%29.jpg)
Vínið þarf að hreinsa fyrir átöppun og algengasta aðferðin er sú að eggjahvítum er hellt yfir vínið í ámunni. Þær síga til botns og taka með sér óhreinindi úr víninu. Súlfíðum er bætt í flest vín áður þau eru sett á flöskur. Það er gert til að gerjun stöðvist örugglega alveg og til þess að koma í veg fyrir að vínið oxist með tímanum. Flöskunum er ýmist lokað með skrúfuðum tappa eða korktappa. Þegar vínið er komið á flöskur geymist það best ef flaskan er látin liggja á hliðinni.
Vínþrúgur
![](http://upload.wikimedia.org/wikipedia/commons/thumb/9/9d/Kelowna_Wine_grapes_growing_in_the_Okanagan.jpg/300px-Kelowna_Wine_grapes_growing_in_the_Okanagan.jpg)
Vínþrúgur sem notaðar eru í rauðvín:
- Cabernet Franc
- Cabernet Sauvignon
- Canaiolo
- Corvina
- Grenache
- Merlot
- Nebbiolo
- Pinotage
- Pinot Noir
- Sangiovese
- Syrah/Shiraz.
- Tempranillo
- Zinfandel
Framleiðslulönd
Frægustu og elstu rauðvínshéruð veraldar eru í Frakklandi, Spáni og Ítalíu. Þessi rótgrónu víngerðarlönd Evrópu eru gjarnan kölluð "Gamli heimurinn" en víngerðarsvæði utan Evrópu nefnd "Nýi heimurinn". Mjög mörg lönd út um allan heim hafa á síðustu öldum bæst í hóp landa sem framleiða rauðvín en hér að neðan er getið þeirra helstu.
Helstu rauðvínsframleiðslulönd:
![](http://upload.wikimedia.org/wikipedia/commons/thumb/f/f0/World_Wine_Areas.jpg/500px-World_Wine_Areas.jpg)
Heimildir
- Steingrímur Sigurgeirsson. 2013. Vín - frá þrúgu í glas. Forlagið, Reykjavík
- Matur og vín, af vef vínbúðarinnar
- Fróðleikur um vín á vef vínskólanns Geymt 24 febrúar 2015 í Wayback Machine
- Upplýsingar um vínþrúgur á vefnum vin.is