As treuva s'ën brich an sla còsta ossidental ëd la bassa val dël torent Cròu, ant la region dij Còj Tortonèis ch'a fan part dël pre-Apenin lìgur-piemontèis.
A l'é nen ciair s'ël topònim ëd Volpièj a peula derivé da col ëd Volped o se a l'abia n'orìgin indipendent: as propend pì për costa sconda possibilità dal moment ch'ël pais a l'é nominà tanme Vulpidinus ant un registr ëd l'abassìa 'd San Colomban ëd Beubi ant l'àuta Età 'd Mès, quand ch'ël topònim ëd Volped a l'era nen ancora atestà. Dël sécol ch'a fa XII, Volpièj a l'é documentà antra ij borgh fortifià ch'a fasìo part dël feod ëd la famija Guidbòu. Aparten a la giurisdission ëd Torton-a ma as costituiss Lìbera Comun-a dël 1245. Dël Tërzent, ël Contà 'd Torton-a a finiss ant l'area d'influensa dël Ducà 'd Milan dij Viscont. Ai 9 ëd novèmber 1412 Flip Maria Viscont a conced an feod ël pais ëd Volpièj al tortonèis Perin Càmeri, General djë Stat Militar dl'Oltrapò, ch'a l'avìa servilo an guèra. D'apress a passerà torna an feod a la famija Guidbòu Cavalchin.
Dël Setsent ël pais, tanme tut ël Tortonèis, a passa sota la protession dël re Carl Emanuel III ëd Savòja. D'apress a la fin dla dominassion fransèisa dl'Imperi 'd Napoleon Bon-a-part, Volpièj a intra definitivament ant ël Regn ëd Sardëgna, ant la Divison (peui Provinsa) ëd Lissandria, ant la Provinsa (peui Sircondari) ëd Torton-a e ant ël Mandament ëd Vigseu. Dël 1928 ël comun ëd Volpièj a ven ancorporà a col ëd Volped ma a oten torna soa indipendensa aministrativa dël 1947.