Սամի Նասերի
Սամի Նասերի (ֆր.՝ Samy Naceri, իրական անունը` Սաիդ Նասերի, հուլիսի 2, 1961[1][2], Փարիզի 4-րդ շրջան, Փարիզ, Ֆրանսիա), բերբերական ծագումով ֆրանսիացի դերասան և ռեփեր։ 2006 թվականին Կաննի կինոփառատոնում տղամարդու լավագույն դերի համար արժանացել է արծաթե մրցանակի։
 ֆր.՝ Samy Naceri | |
|---|---|
 | |
| Ծնվել է | հուլիսի 2, 1961[1][2] (62 տարեկան) |
| Ծննդավայր | Փարիզի 4-րդ շրջան, Փարիզ, Ֆրանսիա |
| Քաղաքացիություն | .svg){kind=small} Ֆրանսիա |
| Կրոն | իսլամ |
| Մասնագիտություն | դերասան, կինոպրոդյուսեր և կինոդերասան |
| Պարգևներ և մրցանակներ | |
Կենսագրություն
Սամի Նասերին ծնվել է Փարիզում։ Մայրը ֆրանսուհի էր Նորմանդիայից, իսկ հայրը բերբերական կաբիլների ցեղից էր և Ֆրանսիա էր տեղափոխվել Ալժիրից` մինչ Ալժիրի անկախանալը։ Սամի Նասերին մեծացել է համեստ ապրող ընտանիքում` իր վեց եղբայրների և քույրերի հետ միասին։ Նրա եղբայրներից մեկը` Բիբի Նասերին, նույնպես դերասան է։
16 տարեկանում Սամի Նասերին լքել է դպրոցը և հետագա տարիներին վաստակում էր` պատահական աշխատանքներ կատարելով։ 18 տարեկանում սկսել է թմրանյութ օգտագործել։ 1984 թվականին դատապարտվել է հինգ տարվա ազատազրկման` կողոպուտ կատարելու համար (բանտում անցկացրել է չորս տարի)։
Մի քանի տարի անընդմեջ Սամի Նասերին փորձել է իր տեղը գտնել բեմի վրա, սակայն նրա ճիգերն սպասված արդյունքը չէին տալիս, և նա մասնակցում էր ընդամենը խմբակային տեսարաններին։ Նրա առաջին իրական դերը ռեժիսոր Թոմաս Ժիլուի «Ճաղ» (1995) կինոնկարում խաղացած դերն էր, որի արդյունքում Սամի Նասերին տպավորություն գործեց քննադատների վրա և Փարիզի կինոփառատոնում, ինչպես նաև Լոկարնոյի միջազգային կինոփառատոնում շահեց մրցանակներ։
Սամի Նասերիին մեծ հաջողություն բերեց հանդիպումը ռեժիսոր և պրոդյուսեր Լյուկ Բեսոնի հետ։ Նրանք հանդիպել էին 1994 թվականին՝ «Լեոն» ֆիլմի նկարահանումների ժամանակ։ Նրանց ճանապարհները կրկին խաչվել են մի քանի տարի անց` IAM խմբի «Nés sous la même étoile» տեսահոլովակի նկարահանումների ժամանակ։
Իր «Տաքսի» (1998) ֆիլմում Լյուկ Բեսոնը Սամի Նասերիին նկարահանել էր Դանիելի` մարսելցի երիտասարդ տաքսիստի դերում, ով թուլություն ուներ հզոր ավտոմեքենաների և արագության նկատմամբ։ Կինոնկարն արժանացավ սառը ընդունելության, սակայն կոմերցիոն տեսակետից հաջողված էր։ Այդ հանգամանքը ստիպեց պրոդյուսերներին նկարահանել ֆիլմի շարունակությունը` «Տաքսի 2» (2000), «Տաքսի 3» (2003) և «Տաքսի 4» (2007թ.), որոնցում Սամի Նասերիի կերպարը, հակառակ իր կամքին, ծառայում է կառավարությանը։
2006 թվականին Սամի Նասերին «Հայրենասերները» ֆիլմում խաղացած դերի համար Կաննի կինոփառատոնում արժանացել է մրցանակի` տղամարդու լավագույն դերակատարման համար։ 2015 թվականին հիմնականում հանդես է եկել թատրոնում։
Խնդիրներ օրենքի հետ
2000 թվականից Սամի Նասերիի անունը հաճախակի հայտնվում է դատական հաշվետվություններում այնպիսի օրինախախտումների համար, ինչպիսիք են կռիվները, վիրավորանք հասցնելը և ալկոհոլ օգտագործած վիճակում ավտոմեքենա վարելը։ 2003 թվականին նա ձերբակալվել է` ճանապարհին ագրեսիվ վարք դրսևորելու համար, երբ ծեծի էր ենթարկել այլ ավտոմեքենայի վարորդի։ Դրա համար դատապարտվել էր ութամսյա պայմանական պատժի, 6000 եվրո տուգանքի և վարորդական իրավունքի զրկման` երեք տարի ժամկետով։ Հաջորդ միջադեպը տեղի է ունեցել 2005 թվականին, երբ ռեստորանում ծեծի էր ենթարկել Von Dutch ֆիրմայի ոճաբանին։ Դրա համար դատապարտվել էր երկամսյա կալանքի։
2007 թվականին գիշերային ակումբներից մեկի պահապանի վրա հարձակվելու համար, դատապարտվել է 9-ամսյա կալանքի, որից վեց ամսվա համար կիրառվել էր պայմանական պատժաչափ[3]։ Դերասանի համար նշանակվել էր նաև երեքամյա փորձաշրջան` հարկադրաբար բուժման կուրս անցնելու պայմանով։ Այդ նույն դատավարության ընթացքում դատարանը որոշում է կայացրել նաև ոստիկաններին վիրավորանք հասցնելու համար, ովքեր ներկայացել էին Նասերիին` այն բանից հետո, երբ վերջինս ընդունել էր դեղանյութերի վտանգավոր չափաբաժին։ Դատարանը դերասանին տուգանել էր 5000 եվրոյով և դատապարտել մեկամսյա կալանքի։
2008 թվականին Սամի Նասերին, վարորդական իրավունքից զրկված լինելով հանդերձ, անուշադրության պատճառով վրաերթի էր ենթարկել Փարիզի ոստիկանության աշխատակցուհուն։ Վրաերթի ենթարկվածը լուրջ վնասվածքներ չէր ստացել։ Այդ միջադեպի համար Սամի Նասերին դատապարտվեց վեցամսյա խիստ օրակարգի և 7500 եվրո տուգանքի, նաև պարտավորվեց ալկոհոլամոլության դեմ բուժման կուրս անցնել[4]։
2009 թվականին նա կրկին հսկողության տակ առնվեց` այս անգամ դանակահարության համար[5][6]։ 2011 թվականին 16 ամսով հայտնվեց բանտում` փորձաշրջանը խախտելու համար[7]։ Որոշ ժամանակ անց նրան տեղափոխել են բանտային հիվանդանոցի հոգեբուժական բաժանմունք` ինքնասպանության փորձ կատարելու համար։ Նա փորձել էր կտրել իր կոկորդը։ Բանտի աշխատակիցների հայտարարության համաձայն՝ Նասերին ինքնասպանության փորձ չէր կատարել, այլ հոսպիտալացվել էր երիկամի փոխպատվաստման վիրահատության ենթարկվելու համար[8]։
2013 թվականին Սամի Նասերին ձերբակալվել է թմրավաճառների հետ կռվելու համար[9]։ 2014 թվականին կռվել էր իր ընկերուհիներից մեկի հետ։ Նրանք երկուսով կանգնել են դատարանի առջև[10]։ Նույն թվականին ձերբակալվել է` կնոջը դանակով սպառնալու համար[11], իսկ մի քանի ամիս անց` ընտանեկան բռնության համար[12]։ 2016 թվականի մայիսին ոստիկանությունը նրան Կաննում կանգնեցրել է ուկրաինական վարորդական վկայականի համար[13]։
Անձնական կյանքը
Սամի Նասերին ունի որդի` ծնված 1995 թվականին։ 2005 թվականին Սամի Նասերին ամուսնացել է դերասանուհի Մարի Գիյարի հետ։ Այժմ նրանք ամուսնալուծված են։
Մասնակի ֆիլմագրությունը
| Թվական | Անվանում | Բնօրինակ անվանում | Կերպար |
|---|---|---|---|
| 1989 | Ֆրանսիական հեղափոխություն | La révolution française | - |
| 1991 | Նեստոր Բուրմա | Nestor Burma | Ֆարիդի օգնականը |
| 1993 | Իր տարիքի բոլոր տղաներն ու աղջիկները | Tous les garçons et les filles de leur âge | Սամի |
| 1994 | Լեոն | Léon | ոստիկան |
| 1994 | Եղբայրներ. Կարմիր ոլորակ | Frères: La roulette rouge | Սամի |
| 1995 | Ճաղ | Rai | Նորդին |
| 1996 | Զույգ գագաթ | Double peine | Սամի |
| 1996 | Անիծյալ Մալիկը | Malik le maudit | - |
| 1996 | Մի փոքր անբարոյականություն | Coup de vice | Զեֆ |
| 1996 | Ինչու՞ մեկնել | Pourquoi partir? | Թերրի |
| 1997 | Հիմա կամ երբեք | Maintenant ou jamais | Ահմեդ |
| 1997 | Սերը Փարիզում | Love in Paris | թմրավաճառ |
| 1997 | Ինչ-որ բան, բացի սիրուց | Autre chose à foutre qu'aimer | Մանու |
| 1997 | Դու շեշտակի դիպար | Bouge! | Զեն |
| 1997 | Քրեական ոստիկանություն | P.J. | Ռաշիդ |
| 1997 | Կանանց ոտքերի տակ | Sous les pieds des femmes | Մոհամեդ |
| 1998 | Վերջին ռոմանտիկներից մեկը | La dernière des romantiques | Մալիկ |
| 1998 | Տաքսի | Taxi | Դանիել Մորալես |
| 1998 | Գողախմբի երգերը | Cantique de la racaille | Ժոել |
| 1998 | Մունիրն ու Անիտան | Mounir et Anita | - |
| 1999 | Բարի գիշեր | Bonne Nuit | Յանիս |
| 1999 | Ռոքնռոլի մաքուր ակնթարթը | Un pur moment de rock'n roll | Կամել |
| 1999 | Բոլորից մեկը | Une pour toutes | Սեմ Մորվան |
| 2000 | Տաքսի 2 | Taxi 2 | Դանիել Մորալես |
| 2000 | Այնտեղ իմ երկիրն է | Là-bas... mon pays | Իսամ |
| 2000 | Փոքրիկ Բենը | Petit Ben | Բեն |
| 2001 | Ազատ անկում | L'aîné des Ferchaux | Մայք Մոդե |
| 2001 | Մատնաչափը | Le petit poucet | զինվոր |
| 2001 | Փիլիսոփան | Philosophale | - |
| 2002 | Կրետի բույնը | Nid de guêpes | Նասեր |
| 2002 | Անխիղճը (Լիգա) | Féroce | Ալեն |
| 2002 | Ապաշխարանք | La repentie | Քարիմ |
| 2002 | Բրիգադան ֆրանսիական ձևով | La mentale | Յանիս |
| 2003 | Տաքսի 3 | Taxi 3 | Դանիել Մորալես |
| 2003 | Կրկնակի հաջողություն | Coup double | - |
| 2005 | Երկրորդ հնարավորություն | Seconde chance | Թեո |
| 2005 | Բաբ էլ Վեբ | Bab el web | Կամել |
| 2006 | Հայրենասերները | Indigènes | Յասիր |
| 2007 | Տաքսի 4 | Taxi 4 | Դանիել Մորալես |
| 2008 | Աղջիկներ և հրեշտակներ | Des poupées et des anges | հայր |
| 2009 | Համախտանիշ ԱյԴի | Cas ID | Պիեռո |
| 2012 | Անվերադարձ ճամփորդություն | Voyage sans retour | տեսուչ Ժոա |
| 2013 | Տիպ Տոպ | Tip Top | Ջերալդ |
| 2016 | Անատոլիական պատմություն | Anatolian Story | Սուլեյման Գազի |
| 2016 | Ռոքը և ճանապարհը | Рок и дорога | - |
Ծանոթագրություններ
 | Վիքիպահեստն ունի նյութեր, որոնք վերաբերում են «Սամի Նասերի» հոդվածին։ |