Ռուտինա Ուեսլի

Ուեսլին ծնվել և մեծացել է Նևադա նահանգի Լաս Վեգաս քաղաքում^[3]։ Նրա հայրը՝ Այվերի Ուիլերը, պրոֆեսիոնալ չեչոտկա պարող է, իսկ մայրը՝ Կասանդրա Ուեսլին, վիճակագիր^[4]։ Ռուտինան հաճախել է Լաս Վեգասի միջազգային կրթության ակադեմիային կից Լաս Վեգասի ակադեմիայի կատարողական և վիզուալ արվեստների դպրոցը։ Simba Studios and the West Las Vegas Arts Center-ում սովորել է պարել^[5]։ Հետո Ինդիանայում ընդունվել է University of Evansville։ Բեմական արվեստի ոլորտում բակալավրի աստիճան ստանալուց հետո Ռուտինայի տատը նրան առաջարկել է ավարտել բուժքույրական դասընթացները, բայց նա որոշել է այնուամենայնիվ շարունակել իր կրթությունը^[6]։ 2001 թվականին Ուեսլին ընդունվել է Ջուլիարդի դպրոցը և ավարտել է այն 2005 թվականի մայիսին, մեկ ամառ անց ընդունվել է Դրամատիկական արվեստի թագավորական ակադեմիա^[3]։

2006 թվականի դեկտեմբերին Ուեսլին հրավիրել են Դեյվիդ Հեայի «The Vertical Hour» բրոդվեյական բեմադրությանը մասնակցելու^[4]։ 2007 թվականին նաև հայտնվել է Նյու Յորքի The Public Theater-ի բեմում՝ Ուինթերա Միլլերի «In Darfur» պիեսում, որտեղ խաղացել են նաև Հիզեր Ռաֆֆոն, Աարոն Լորը և այլք^[7]։

2005 թվականին Ուեսլին փոքրիկ դեր է ունեցել «Հիթչի մեթոդը» ֆիլմում, բայց նրան ի վերջո հեռացրել են^[5]։

2007 թվականին տեղի է ունեցել Ռուտինայի առաջնաելույթը մեծ էկրանին՝ բրիտանացի ռեժիսոր Իեն Իկբալ Ռաշիդի «Ինչպես է նա շարժվում» ֆիլմում խաղացած Ռայի գլխավոր դերով։ Ֆիլմը աղջկա մասին է, որը չի կարող իրեն թույլ տալ մասնավոր բժշկական դպրոց հաճախել և մասնակցում է պարային մրցույթին՝ մեծ դրամական մրցանակ շահելու համար։ Այս ֆիլմում նկարահանվելուց առաջ Ուեսլին հինգշաբաթյա պարային պատրաստություն է անցել^[5]։

2007 թվականին Ալան Բոլլի «Իրական արյուն» նոր սերիալում Թարա Թարնմոնի դերում նկարահանվելու համար անցել է փորձեր։ Ալան Բոլլը ընտրել է նրան, քանի որ «նա առաջին մարդն էր, որը ցուցադրել է Թարայի խոցելի կողմերը»^[4]։ Ի սկզբանե Թարայի դերը պետք է խաղար Բրուք Քերը։ Դրան զուգահեռ Ռուտինան խաղացել է «Թվեր» սերիալի էպիզոդում և հնչյունավորել է «Գեներատոր Ռեքս» և «Քլիվլենդի շոուն» մուլտսերիալների մի քանի էպիզոդներ։ 2011 թվականին Ուեսլի նկարահանվել է «California Winter» դրամատիկական ֆիլմում։ Երկու անգամ «Իրական արյուն» սերիալի թիմի կազմում առաջադրվել է որպես լավագույն դերասանուհի. 2009 թվականին՝ «Scream» մրցանակ, 2010 թվականին՝ «ԱՄՆ կինոդերասանների գիլդիա մրցանակ»։

2016 թվականին Ուեսլին հրավիրվել է «Oprah Winfrey Network» հեռուստաընկերության Ավա Դյուվերնեյի և Օփրա Ուինֆրիի արտադրած «Շաքարի տնկարկների թագուհին» սերիալի գլխավոր դերակատարմանը^[8][9]։

2005-2014 թվականներին Ուեսլին ամուսնացած է եղել դերասան Ջեյքոբ Ֆիշելի հետ^[10][11]։