Միքայել Մալունցյան
Միքայել Մովսեսի Մալունցյան (ապրիլի 25 (մայիսի 8), 1903[1], Բաքու, Ռուսական կայսրություն[1] - փետրվարի 20, 1973[1], Երևան, Հայկական ԽՍՀ, ԽՍՀՄ[1]), հայ խորհրդային դիրիժոր, մանկավարժ։ ՀԽՍՀ ժողովրդական արտիստ (1956)։ Հայաստանի պետական սիմֆոնիկ նվագախմբի հիմնադիր և գլխավոր դիրիժոր (1945-1960, 1966-1967)։
| Միքայել Մալունցյան | |
|---|---|
 | |
| Հիմնական տվյալներ | |
| Ծնվել է | ապրիլի 25 (մայիսի 8), 1903[1] Բաքու, Ռուսական կայսրություն[1] |
| Երկիր |  Ռուսական կայսրություն և  ԽՍՀՄ |
| Մահացել է | փետրվարի 20, 1973[1] (69 տարեկան) Երևան, Հայկական ԽՍՀ, ԽՍՀՄ[1] |
| Մասնագիտություն | դիրիժոր և երաժշտության ուսուցիչ |
| Աշխատավայր | Երևանի Կոմիտասի անվան պետական կոնսերվատորիա[1] և Հայաստանի պետական սիմֆոնիկ նվագախումբ[1] |
| Կրթություն | Թբիլիսիի Վանո Սարաջիշվիլիի անվան պետական կոնսերվատորիա (1925)[1] և Մոսկվայի կոնսերվատորիա (1935) |
| Պարգևներ |  |
Կենսագրություն
1921-1925 թվականներին սովորել է Թիֆլիսի կոնսերվատորիայի լարային (թավջութակ, ուսուցիչ՝ Կ. Մինյար), 1931-1935 թվականներին՝ Մոսկվայի կոնսերվատորիայի դիրիժորական (ուսուցիչ՝ Լ. Գինզբուրգ) բաժիններում։ Դասավանդել է Երևանի (1927-1931, 1944-1973, 1962 թվականից՝ պրոֆեսոր) և Մոսկվայի (1934-1945) կոնսերվատորիաներում։ 1932 թվականին ղեկավարել է Համամիութենական ռադիոյի սիմֆոնիկ նվագախումբը։ Մեծ ուշադրություն է նվիրել հայ հեղինակների գործերի պրոպագանդմանը։ Մալունցյանի կատարմանը բնորոշ էր գեղարվեստական ճշմարտացիությունը, արտիստական զսպվածությունը, անսամբլային կատարելությունը։ Նրա աշակերտներից են Ռաֆայել Մանգասարյանը, Դավիթ Խանջյանը, Գ. Տերտերյանը։ 1945-1960 թվականներին և 1966-1967 թվականներին եղել է Հայաստանի պետական սիմֆոնիկ նվագախմբի հիմնադիր գեղարվեստական ղեկավարն ու գլխավոր դիրիժորը։ Վերականգնել է Երկրորդ համաշխարհային պատերազմի տարիներին նահանջ ապրած նվագախումբը (հավաքել է նոր կազմ) և նպաստել այդ կոլեկտիվի անհատական ստեղծագործական դեմքի ձևավորմանը[2]։ Իրականացրել է հայ կոմպոզիտորների բազմաթիվ գործերի պրեմիերաներ[3]։
Հիշատակ
1993 թվականին Միքայել Մալունցյանի անունով է կոչվել Երևանի թիվ 2 արվեստի դպրոցը։
Գրականություն
- Պետրոսյան Մ., Երեքը հայ դիրիժորներից, Ե., 1976:
Ծանոթագրություններ
Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից (հ․ 7, էջ 165)։  |