Էլիսոն Փորթեր

Էլիսոն Փորթերը ծնվել է 1981 թվականի հունիսի 20-ին, Միացյալ Նահանգների Մասաչուսեթս նահանգի Վուսթեր քաղաքում՝ հրեական ընտանիքում։ 3 տարեկան հասակում Նյու Յորքում նկարահանվել է գովազդում։ Շուտով նրան հրավիրել են «Star Search» շոու։ 5 տարեկանում դարձել է այդ հաղորդման ամենակրտսեր «Լավագույն պատանի վոկալիստը»։

Դերասանուհին տեղափոխվել է Հոլիվուդ և 1987 թվականին նկարահանվել «Ես կնվաճեմ Մանհեթենը» մինի սերիալում, որտեղ խաղացել է փոքրիկ Մաքսիի դերը։ 1989 թվականին նկարահանվել է «Ծնողներ» ֆիլմում՝ խաղալով Թեյլորի դերը։ 1991 թվականին «Գանգրահեր Սյու» ֆիլմում խաղացել է Սյուի դերը։ 1994 թվականին դադարեցրել է դերասանական գործունեությունը և ծնողների հետ տեղափոխվել Միացյալ Նահանգների Կոնեկտիկուտ նահանգի Ուեսթփորթ քաղաքը։ Այնտեղ նա խաղացել է դպրոցի թատրոնում և որոշել, որ ցանկանում է խաղալ ոչ թե ֆիլմերում, այլ բեմում։

18 տարեկանում Էլիսոնը տեղափոխվել է Նյու Յորք և երեք ամիս անց նրան ներգրավել են «Footloose» ներկայացման մեջ, որտեղ դերասանուհին կերտել է Ուռլինի կերպարը։ Որոշ ժամանակ անց Փորթերը տեղափոխվել է Միացյալ Նահանգների Կալիֆոռնիա նահանգի Լոս Անջելես քաղաքը։

2003 թվականին կազմավորվել է «Raz» երաժշտական խումբը, որտեղ Էլիսոն Փորթերը հանդես է եկել որպես վոկալիստ և երգերի հիմնական հեղինակ։ «Raz» խումբը լուծարվել է 2004 թվականին։ 2005 թվականի մարտին Փորթերը հայտարարել է «Alisan Porter Project» անվամբ նոր խմբի ստեղծման մասին։ 2006 թվականին Էլիսոնը հանդես է եկել Նյու Յորքի «Gerald Schoenfeld Theatre» թատրոնի «A Chorus Line» ներկայացման մեջ՝ խաղալով Բեբե Բենսոնհեյմերի դերը։

2008 թվականի դեկտեմբերից Փորթերը ամերիկյան «Movmnt» ամսագրի համագործակցող տեսաբանն է^[2]։

2016 թվականի մայիսի 23-ին դարձել է «Ձայնը» շոուի ամերիկյան տարբերակի 10-րդ եթերաշրջանի հաղթողը՝ եզրափակչում կատարելով «Վեսթսայդյան պատմություն» մյուզիքլից «Somewhere» երգը և այսպիսով դառնալով առաջին եթերաշրջանից մասնակիցների մարզիչ Քրիստինա Ագիլերայի թիմից առաջին հաղթողը^[3]։

2012-2018 թվականներին Էլիսոնն ամուսնացած է եղել մրգերի արտահանող և «օճառային օպերաների» (տնային տնտեսուհիների համար նախատեսված սերիալներ) նախկին դերասան Բրայան Օթենրիթի հետ։ Ունեցել են երկու երեխա՝ որդին՝ Մեյսոն Բլեյզ Օթենրիթը (ծնված 2012 թվականի հուլիսի 7-ին)^[4], և դուստրը՝ Արիա Սեյջ Օթենրիթը (ծնված 2014 թվականի մայիսի 8-ին)^[5]։

2014 թվականի սեպտեմբերին Էլիսոնն իր բլոգում խոստովանել է, որ երկար ժամանակ կախվածություն է ունեցել ալկոհոլից և թմրադեղերից, բայց 2007 թվականի հոկտեմբերի 28-ից պահպանում է ժուժկալություն, մինչև 2011 թվականն այցելել է «անանուն հարբեցողների» ակումբ^[6]։

• 2009՝ Alisan Porter^[7]

• 1993՝ «Երիտասարդ դերասան» մրցանակ` «Ֆիլմում գլխավոր դերի լավագույն երիտասարդ դերասանուհի»՝ «Գանգրահեր Սյու» ֆիլմի համար։

• 1992՝ «Երիտասարդ դերասան» մրցանակ` «Սերիալում երկրորդական դերի լավագույն երիտասարդ դերասանուհի»՝ «Ոսկե աղջիկներ» սերիալի համար։

• «Портер исполняет первую свою песню в финале четырёх шоу Голос - Down That Road» (իտալերեն). YouTube. Վերցված է 2016 թ․ հուլիսի 8-ին.

Վիքիպահեստն ունի նյութեր, որոնք վերաբերում են «Էլիսոն Փորթեր» հոդվածին։