Դիլեք թերակղզու և Մեծ Մենդերես գետի հովտի ազգային պարկ

Ազգային պարկը ունի բուսական և կենդանական հարուստ աշխարհ։ Պարկի տարածքը պահպանվում է Ռամսարի համաժողովի, Կենսաբանական բազմազանության կոնվենցիայի և Բարսելոնայի կոնվենցիայի շրջանակներում^[2][3]։

Կլիմայական և ջերմային զանազանության պատճառով, պարկում ներկայացված են ոչ միայն էգեյան ֆլորան, այլ նաև Թուրքիայի մերձափնյա շրջաններին՝ Միջերկրածովյան տարածաշրջանին, Մարմարածովյան տարածաշրջանին և Սևծովյան տարածաշրջանին բնորոշ բնություն^[4]։ Բույսերի ավելի քան 800 տեսակներ են հանդիպում պարկում, որոնցից 6-ը էնդեմիկ են, իսկ 30-ը աբորիգեն տեսակի^[2]։ Բուսականության գերակշռող տեսակը համարվում է Մաքվիսը։ Պարկում ամենատարածված ծառերից են տանձենին (Pyrus elaeagnifolia), Սոճի էլդարյանը (Pinus brutia) և աղտոր դաբաղայինը (Rhus coriaria)^[2]։

Վայրի վարազները (Sus scrofa), որոնք բնակվում են պարկում, կարող են հանդիպել լողափերում, որտեղ սնվում են զբոսաշրջիկների թողած թափոններով^[5]։ Թերակղզու անտառներում հանդիպում են շրջանին բնորոշ կենդանատեսակներ, հատկապես սովորական շնագայլ (Canis aureus) և սովորական լուսան (Lynx lynx), ինչպես նաև հազվադեպ հանդիպող կարակալ (Caracal caracal)^[2]։

Պարկում հանդիպում են թռչունների 250 տեսակներ, հատկապես փոքր ձկնկուլ (Microcarbo pygmeus), տափաստանային հողմավոր բազե (Falco naumanni), ծովային քարադր (Charadrius alexandrinus), սպիտակապոչ արծիվ (Haliaeetus albicilla) և գանգրափետուր հավալուսն (Pelecanus crispus)։ Պարկի ծովային ֆաունան տիպիկ է Էգեյան ծովի ֆաունային^[2][4]։