Դենի Լևան

Լևանը ծնվել է Փարիզի Նյոյի-սյուր-Սեն արվարձանում (Օ-դը-Սեն դեպարտամենտ)։ 1982 թվականին սկսել է նկարահանվել կինոյում։ 1983 թվականին նրան նկատել է ռեժիսոր Լեոս Կարաքսը, ով փնտրում էր դերասան իր առաջնաելույթային՝ «Տղան հանդիպում է աղջկան» ֆիլմի գլխավոր դերում նկարահանելու համար։ Լևանը նաև խաղացել է ռեժիսորի հաջորդ երկու ֆիլմերում՝ «Վատ արյուն» (1986) և «Սիրեկանները Նոր կամրջից» (1991). երկու ֆիլմերում էլ նրա խաղընկերը եղել է Ժյուլիետ Բինոշը։ «Սիրեկաններ Նոր կամրջից» ֆիլմում դերակատարման համար ներկայացվել է Եվրոպական կինոակադեմիայի մրցանակի լավագույն դերասանի համար։ Կարաքսի երեք ֆիլմերում Լևանը կրել է Ալեքս անունը, որ ռեժիսորի իրական անունն է^[3]։

1999 թվականին Լևանը կատարել է Կլեր Դենիի «Գեղեցիկ աշխատանք» ֆիլմի գլխավոր դերը, որը կարելի է համարել 90-ականների ֆրանսիական կիեմատոգրաֆիայի գագաթնակետը^[4]։ 2007 թվականին խաղացել է Չարլի Չապլինի նմանակի դերը ամերիկացի ռեժիսոր Հարմոնի Կորինայի «Պարոն Մենակություն» ֆիլմում։ Այդ ֆիլմի համար դերասանն ստիպված է եղել անցնել անգլերենի դասընթացներ^[5]։ 2008 թվականին Լևանը նկարահանվել է Լեոս Կարաքսի «Տոկիո» ֆիլմում։ Լևանի կերպարը խոսում էր անհայտ լեզվով և ապրում էր քաղաքային կոյուղում, որտեղից հազվադեպ էր դուրս գալիս, որպեսզի հարձակվի մարդկանց վրա։

Քանի որ Դենի Լևանը նախկինում եղել է ակրոբատ և ունի ճկուն մարմին, նա ֆիլմերում հաճախ կատարում է պարային համարներ^[5][6]։ «Սիրեկանները նոր կամրջից» ֆիլմի համար նա սովորեց ոչ միայն ակրոբատիկ շարժումներ, այլ նաև կրակ կուլ տալ^[7][8]։

Դենի Լևանը նաև ելույթ է ունեցել թատրոնի բեմում և արժանացել է բավականին շատ դրական գնահատականների։