Բորիս Լավրենկո

Բորիս Միխայլովիչ Լավրենկոն ծնվել է 1920 թվականի մայիսի 6-ին Դոնի Ռոստովում։ 1936 թվականին միջնակարգ դպրոցի 8-րդ դասարանն ավարտելուց հետո ընդունվել է Ռոստովի գեղարվեստի ուսումնարան։ 1940 թվականին հինգերորդ կուրսից զորակոչվել է Կարմիր բանակ։ Ավարտելով հրետանավորների դասընթացները՝ մասնակցել է 1941 թվականին Մոսկվայի պաշտպանությանը։ Կռվել է Կենտրոնական և 1-ին Բելառուսական ճակատներում։ Պատերազմը Բեռլինում ավարտել է ավագ սերժանտ կոչումով։ Պարգևատրվել է Հայրենական պատերազմի երկրորդ աստիճանի շքանշանով, «Մոսկվայի պաշտպանության համար», Բեռլինի գրավման համար», «Գերմանիայի նկատմամբ տարած հաղթանակի համար» մեդալներով։

1952 թվականին Բորիս Լավրենկոն ավարտել է Լենինգրադի Ի. Ե. Ռեպինի անվան գեղանկարչության, քանդակագործության և ճարտարապետության ինստիտուտը պրոֆեսոր Ռուդոլֆ Ֆրենցի արվեստանոցում։ Սովորել է Միխայիլ Ավիլովի, Իվան Ստեպաշկինի, Պյոտր Բելոուսովի, Բորիս Յոգանսոնի մոտ։

Լավրենկոն մասնակցել է ցուցահանդեսների 1936 թվականից։ Նկարել է դիմանկարներ, ժանրային և թեմատիկ նկարներ, բնանկարներ, նատյուրմորտներ։ Նկարչի անհատական ցուցահանդեսներն անցկացվել են Լենինգրադում (1972, 1986), Մոսկվայում (1972), Դոնի Ռոստովում (1972), Սանկտ Պետերբուրգում (1996)։

Բորիս Լավրենկոն 1954 թվականից դասավանդել է Լենինգրադի Ի. Ե. Ռեպինի անվան գեղանկարչության, քանդակագործության և ճարտարապետության ինստիտուտում։ Արվեստագիտության թեկնածու (1983)։ Լենինգրադի Ի. Ե. Ռեպինի անվան գեղանկարչության, քանդակագործության և ճարտարապետության ինստիտուտիի պրոֆեսոր (1985)։

Բորիս Լավրենկոն եղել է Սանկտ Պետերբուրգի նկարիչների միության անդամ (մինչև 1992 թվականը՝ ՌԽՖՍՀ նկարիչների միության Լենինգրադի կազմակերպության) 1953 թվականից։ ՌՍՖՍՀ վաստակավոր նկարիչ (1976), Ռուսաստանի ժողովրդական նկարիչ (1994)։ ԽՍՀՄ մշակույթի նախարարության և ԽՍՀՄ Նկարիչների միության Մ. Գրեկովի անվան արծաթե մեդալի դափնեկիր (1980)։ 1989-1992 թվականներին նկարչի աշխատանքները հաջողությամբ ներկայացվել են Ֆրանսիայում L' Ecole de Leningrad ռուսական գեղանկարչության ցուցահանդեսներում և աճուրդներում^[3]։

Մահացել է 2001 թվականի հունիսի 7-ին Սանկտ Պետերբուրգում 82 տարեկան հասակում։ Թաղվել է Սանկտ Պետերբուրգի Սերաֆիմովյան գերեզմանատանը։

Բ. Մ. Լավրենկոյի ստեղծագործությունները գտնվում են Ռուսական պետական թանգարանի, Տրետյակովյան պատկերասրահի հավաքածուներում, բազմաթիվ թանգարաններում և մասնավոր հավաքածուներում Ռուսաստանում, Ֆրանսիայում^[4], Մեծ Բրիտանիայում^[5], Չինաստանում, ԱՄՆ-ում, Ճապոնիայում^[6], Գերմանիայում, Իտալիայում և այլ երկրներում։

• Дмитренко, А. Ф. Утверждая благородные идеалы добра, справедливости, патриотизма... // Художник Петербурга, №16, 2010. С. 8.
• Лавренко Борис Михайлович (1920—2001). Биография, библиография.
• Хронология Ленинградской школы живописи.

Վիքիպահեստն ունի նյութեր, որոնք վերաբերում են «Բորիս Լավրենկո» հոդվածին։