Bilhorod-Dnistrowskyj

**Bilhorod-Dnistrowskyj**
swójske mjeno	Бiлгород-Днiстровський
	Bilhorod-Dnistrowskyj na karće Ukrainy
	Bilhorod-Dnistrowskyj na karće Ukrainy
Wopon a chorhoj
wopon	chorhoj
Zakładne daty
stat	Ukraina
oblasć	Odesa
wysokosć	28 metrow n.m.hł.
přestrjeń	31 km²
wobydlerstwo	50.131 (2016)
hustosć zasydlenja	1.617,1 wob./km²
póstowe čisło	67700 — 67719
předwólba	(+380) 4849

Bilhorod-Dnistrowskyj (ukrainsce Бiлгород-Днiстровський; rusce Белгород-Днестровский/Bjelgorod-Dnjestrowskij; rumunsce Cetatea Albă; turkowsce Akkerman; do 1944 – Akkerman) je město w Odesaskej oblasći na juhu Ukrainy. Leži něhdźe 45 kilometrow juhozapadnje Odesy při zapadnym brjoze Dnjesterskeho limana, zaliwa Dnjestra. Přistawne město nadeńdźe so 18 kilometrow zdalene wot Čorneho morja a ma něhdźe 50 tysac wobydlerjow.^[1]

46.18333333333330.333333333333

Koordinaty: 46° 11′ S, 30° 20′ W

Stawizny

Hižo w šestym lětstotku do Chrystusa załoži so na tutym městnje kolonija ioniskeho města Milet pod mjenom Tyras, kotraž wobsteješe hač do štwórteho lětstotka do Chrystusa. Wokolina bě wobsydlena wot thrakiskich, sarmatiskich a skythiskich kmjenow. W lěće 105 dobychu Romjenjo tutu kónčinu a załožichu prowincu Dacia. Pozdźišo sta so město při wuliwje Dnjestra ze zepěranišćom romskeje floty. Za čas pućowanja ludow so město zniči. Pozdźišo so wot wuchodosłowjanskich Tiwercow pod mjenom Bjelgorod zaso natwari, bu pak wot Tatarow znowa zničene. Po lěće 1261 załoži Genua tu wikowanski přistaw Maurocastro, kotryž bu w 14. lětstotku wot moldawskich wjerchow do twjerdźizny wutwarjeny. 1484 přińdźe hromadźe z Kiliju při Dunaju pod kontrolu Osmanow a rěkaše nětko Akkerman.

Hakle 1812 přińdźe twjerdźizna po Bukarestskim měrje k Ruskemu carstwu a steješe hač do lěta 1918 pod ruskim knjejstwom. Wot 1918 do 1940 a znowa za čas Druheje swětoweje wójny słušeše do Rumunskeje.