Shigella sonnei

Esta especie polimeriza a actina da célula hóspede.

Esta especie é clonal e está espallada por todo o mundo. Unha análise de 132 cepas mostrou que se orixinaron dun antepasado común en Europa arredor do ano 1500 d.C.^[8]

As bacterias do xénero Shigella do "grupo D" causan shigelose. As persoas que se infectan con estas bacterias libérana nas súas feces, causando así a posibilidade de que se espalle pola auga ou por contacto directo cunha persoa por vía oral. As condicións hixiénico-sanitarias malas ou a comida ou auga contaminada contribúen a contraer esta doenza.^[9]

Os meniños e nenos, anciáns, viaxeiros e persoas enfermas son susceptibles de sufrir os síntomas máis graves da enfermidade causada por S. sonnei. A shigelose padécena comunmente individuos con síndrome de inmunodeficiencia adquirida (SIDA) e complexos relacionados coa SIDA, así como homes homosexuais sen SIDA. A shigelose pode transmitirse tamén por persoas con SIDA que contraeron previamente unha shigelose grave e prolongada, incluíndo os que teñen a infección espallada polo torrente circulatorio, o cal pode ser mortal.^[10][11]

As infeccións oden orixinar febre aguda, dores abdominais agudos, dores rectais, náusea, diarrea acuosa ou feces con sangue, moco ou pus, que poden aparecer nun período de 1 a 7 días despois de estar en contacto coas bacterias.^[9] A maioría das infeccións por Shigella adoitan desaparecer sen complicacións, pero se se deixa sen tratar ou se atrasa a diagnose pode orixinar algunhas complicacións graves como deshidración (algunhas poden orixinar un shock e a morte), convulsións, síndrome hemolítico-urémico, megacolon tóxico e artrite reactiva.^[12]As persoas con diarrea adoitan recuperarse completamente, aínda que poden pasar varios meses ata que os seus hábitos intestinais sexan totalmente normais. Unha vez que se tivo shigelose, xa non é probable infectarse de novo co mesmo tipo de microbio polo menos durante varios anos. Porén, poden infectarse con outros tipos de Shigella.^[13]

• Deshidración
• As convulsións aparecen máis a miúdo en nenos, aínda que non se coñece como a Shigella causa estas complicacións.
• As infeccións no sangue poden orixinarse nas infeccións por Shigella, que dana os intestinos, o que permite que este e outros xermes viaxen polo torrente circulatorio.
• O prolapso rectal pode darse pola tensión durante os movementos intestinais.
• O megacolon tóxico paraliza os movementos intestinais ou causa o paso de gas.
• Artrite reactiva, que é a inflamación das articulacións^[14]
• A síndrome hemolítica-urémica é unha complicación que aparece cando as bacterias entran no sistema dixestivo e produce toxinas para destruír as células sanguíneas que poden causar como síntoma diarrea sanguinolenta.

Non se dispón de vacinas contra a Shigella. A mellor prevención contra a shigelose é o lavado de mans coidadoso e frecuente con xabón e auga antes e despois de usar o váter e antes de maniplar alimentos; ademais, é importante aterse estritamente ás precaucións de seguridade estándar coa comida e auga. Evitar ter relacións sexuais con persoas con diarrea ou que se acaban de recuperar dunha diarrea. Tamén é importante evitar beber ou tragar auga de lagoas, lagos ou piscinas non tratadas.^[15][16]

Informouse de resistencia a antibióticos nesta bacteria.^[17]

Pode cultivarse en ágar MacConkey e TSA, a 37 °C como temperatura óptima, pero tamén pode crecer a 25 °C. É un organismo anaerobio facultativo e quimioorganótrofo e produce ácido cando cataboliza carbohidratos.

• Shigella sonnei Arquivado 28 de xaneiro de 2022 en Wayback Machine. at MicrobeWiki Arquivado 06 de febreiro de 2015 en Wayback Machine.
• Shigella sonnei no NCBI Taxonomy Browser
• Type strain of Shigella sonnei en BacDive – the Bacterial Diversity Metadatabase