New-York Tribune

Foi fundado por Horace Greeley como un xornal de centavos do Partido Whig o 10 de abril de 1841.^[1] Entre 1842 e 1866, o xornal chamouse New-York Daily Tribune^[1] mais, posteriormente, recuperou o nome orixinal. O Tribune non só daba a coñecer as noticias de sucesos diarios, senón que abarcaba tamén temas como a opinión política, obras literarias, reformismo social e diversos logros intelectuais.^[2]

Tivo como colaboradores, entre outros, ao caricaturista de charge política Thomas Nast e ao filósofo e economista comunista Karl Marx. Durante a década de 1850 e comezos da década de 1860, Marx escribiu unha serie de artigos para este diario desde Londres. Estes artigos abordaban cuestións europeas e análises políticas, entre elas os artigos recollidos en Revolutionary Spain onde menciona a Galiza en diversas ocasións.^[3][4] Outra colaboradora destacada foi Margaret Fuller, a primeira muller en exercer a crítica literaria nun medio de comunicación de masas.

Horace Greeley, a través do Tribune, apoiou os inicios do Partido Republicano.^[5] En 1860 o Tribune apoiou a Abraham Lincoln como presidente dos Estados Unidos e durante a Guerra civil estadounidense. Porén, o xornal opúxose á súa reelección en 1864.^[1] Durante algún tempo o xornal tivo a maior tirada nos Estados Unidos.^[5] Os editoriais do Tribune foron moi lidos e axudaron a dar forma á opinión pública nos Estados Unidos.

En 1924, baixo a dirección do fillo do fundador, Ogden Mills Reid, fusionouse co seu rival New York Herald para formar o New York Herald Tribune. que seguiu sendo dirixido por Ogden Mills até a súa morte en 1947. Seguiu sendo un importante diario dos Estados Unidos até que rematou a súa publicación en 1966.^[7]

• O New York Tribune Building foi a primeira casa da Universidade Pace. O lugar onde estaba o edificio eestá ocupado nestes momentos polo complexo One Pace Plaza do campus de Nova York da Universidade de Pace. A residencia e hospital privado do doutor Choate, onde morreu Horace Greeley, forman hoxe parte do campus da Universidade Pace en Pleasantville, Nova York.
• O 15 de decembro de 1921, The New York Tribune comprou dous terreos nos 219 e 220 West 40th Street. A sede que The New York Tribune construíu nese lugar é agora a sede da facultade de periodismo da Universidade de Nova York.

AS copias dos números do New-York Tribune están dispoñibles en microfilme en moitas bibliotecas grandes dos Estados Unidos e tamén está en liña na Biblioteca do Congreso,^[1] onde tamén están os índices de anos determinados de finais do século XIX.Os artigos orixinais se conservan no Centro de Historia Americana da Universidade de Texas en Austin.

• Schwarzlos, Richard Allen (1989). The Nation's Newsbrokers (en inglés). Volume I (The Formative Years: From Pretelegraph to 1865). Evanston, IL: Northwestern University Press. ISBN 978-0-8101-0818-9.