Filmes propostos ó mellor filme internacional na 92ª edición dos Óscar

Esta é unha lista dos filmes propostos na 92ª edición dos Óscar para o mellor filme internacional.^[1] A Academia das Artes e das Ciencias Cinematográficas (AMPAS) convidou ás industrias cinematográficas de varios países a presentar o seu mellor filme para o Óscar ó mellor filme internacional cada ano dende que o premio foi creado na edición de 1956.^[2] O premio é presentado anualmente pola Academia para un filme producido fóra dos Estados Unidos cun diálogo maioritariamente en lingua non inglesa.^[2][3] O Comité do Premio Internacional de Longametraxes supervisa o proceso e revisa todos os filmes enviados.^[3] A categoría foi anteriormente chamada mellor filme en lingua non inglesa, mais foi cambiado en abril de 2019 a mellor filme internacional, logo de que a academia considerase a anterior denominación como desfasada.^[4]

Os filmes presentados teñen que ser estreados nos cinemas dos respectivos países entre o 1 de outubro de 2018 e o 30 de setembro de 2019.^[5] A data límite para presentar as propostas foi o 1 de outubro de 2019, e a Academia anunciou a lista de filmes elixibles o 7 de outubro de 2019. Un total de 94 países presentaron un filme, cun número récord de 93 propostas aceptadas.^[6][7] Tres países presentaron un filme por vez primeira. Ghana enviou Azali,^[8] Nixeria enviou Lionheart,^[9] e Uzbekistán enviou Issiq non.^[10] Porén, o 4 de novembro de 2019, a Academia descualificou a proposta de Nixeria xa que a maioría do diálogo estaba en inglés.^[11]

De toda a lista, só dez filmes pasaron á lista curta,^[12] que foron anunciados o 16 de decembro de 2019,^[13] cos cinco nomeados finais sendo anunciados o 13 de xaneiro de 2020.^[14][15] Gisaengchung de Bong Joon-ho gañou o Premio para Corea do Sur,^[16] así como o Óscar ó mellor filme, converténdose no primeiro filme en lingua non inglesa en conseguilo.^[17]