Woodstock (muzykfestival)

It Woodstock Music and Art Festival wie in rockfestival dat op 15, 16 en 17 augustus 1969 ta stân kaam op in greide fan de greidboer Max Yasgur yn Bethel, New York, sa'n 65 km bûten Woodstock. It hast legindaryske festival, ûnder it motto "three days of peace and music" (Trije dagen fan frede en muzyk), wurdt troch in soad minsken beskôge as it wichtichste muzykfeest ea.

Hoewol't tsien- oant tweintichtûzen minsken ferwachte waarden, kamen der úteinlik tsjin de 500.000 besikers, dêr't de measten gjin yntreejild foar betelle hiene. (Ek wiene der noch sa'n trije miljoen minsken ûnderweis nei it festival.) Dêrom moasten de organisatoaren der earst op tajaan, mar troch de plateferkeap en de ynkomsten fan de Woodstockfilm koe it langelêst dochs noch út.