Giltzurruneko azidosi tubularra[1]azidoen kanporatze normala eragozten duen giltzurrunetako akatsa da. Azidoak iraizten ez badira, egoera horrek hezurretako ahultasuna, giltzurrunetan harriak sortzea eta umeen garapena atzeratzea ekar dezake.[2] Nahasmendua sortzetikoa (jaiotzen denetik) edo helduaroan hartutakoa izan daiteke. Sintoma bakarrekoa izan daiteke edo beste sintoma batzuekin lotu daiteke, Fanconiren sindromearekin gertatzen den bezala. Gaixotasunaren hainbat azpimota bereizten dira: 1 motakoa edo giltzurruneko azidosi tubular distala, hidrogeno-ioien jariaketa distalari eragiten diona; giltzurruneko azidosi tubular proximala edo 2 motakoa, bikarbonatoaren berrxurgapen proximalari eragiten diona; eta 4 motakoa, odoleko potasioa handitzearekin (hiperpotasemia) lotzen dena. Lehen 3. motakoa zena desagertu egin da terminologia medikotik, ez baita entitate independentetzat hartzen.[3][4]
