Ragazzi fuori
MiranduléśC'l artìcul chè 'l è scrit inMiranduléś |
 Ragazzi fuori | ||
 Salvatore Termini in na figùra dal film | ||
| Ragàs fóra 1990 | ||
|---|---|---|
| Regìa: Marco Risi | ||
| Scritōr: Aurelio Grimaldi • Marco Risi | ||
| Atōr: Francesco Benigno • Alessandra Di Sanzo Filippo Genzardi • Roberto Mariano • Alfredo Li Bassi Maurizio Prollo • Salvatore Termini • Tano Cimarosa | ||
| Müsica: Giancarlo Bigazzi | ||
| Léngua: Itagliàṅ • Sicigliàṅ • Napulitàṅ • Àrab | ||
| Dürä dal film: 110 minüt | ||
| Nasiōṅ: Itàglia | ||
Ragazzi fuori (Ragàs fóra) 'l è 'n film dramàtic itagliàṅ dal 1990, séguit dal film Mary per sempre d'l an prima. 'L è stâ scrit e senegiâ insém a Aurelio Grimaldi mént'r al mùśichi i èṅ ad Giancarlo Bigazzi.
La pelìcula l'à purtâ a cà dū Dàvid ad Dunatèl dal 1991, qvél par la regìa e qvél p'r al prudutōr, Claudio Benivento.
Sunt
Soquànt ragàs dla parśòṅ par śōvan Malaspina ad Palèrum i èṅ mandâ lìbar ma la vita par lōr l'è dimóndi dura.
Natale Sperandeo (Francesco Benigno) al vrév tacàr a lauràr cuma muradōr in dal cantēr ad Giuseppe (Tano Cimarosa) ma chi lò al s tira indrē a 'l ùtim minùt dòp ch'l iva prumìs un pòst par lò a sò fradèl Salvo. La Mery (Alessandra Di Sanzo) l'è andàda a vìvar cun na sò culéga trans e par scampàr la fà sès par bèsi anc se sò màdar (Aurora Quattrocchi) la vrév ch'la cambìs vita. Antonio Patané (Roberto Mariano), ch'al gh'à dū putèṅ pìcui da tiràr sù, al vénd dal patàchi a 'l marcâ sénsa licénsa, ma anc dla dròga. Claudio Catalano (Maurizio Prollo) 'l à catâ lavōr cuma mecànig ma la sò ragàsa Vita (Enza Attardo) la spéta 'n putèṅ da lò e la 'l custrìnś a spuśàr-la. Inóltar chi lò al gh'à Carmelo Vella (Alfredo Li Bassi) in di garét parchè al gh la vōl far pagàr da quànd in rifurmatòri Claudio al gh'iva mulâ na sprangàda in cô faghénd-ag pèrdar 'n òć esénd-'s arvultâ sèg parchè al n à minga vlû far-as dar da lò.
Di àtar ragàs i tórn'n incóra a rubàr cuma Matteo Mondello (Filippo Genzardi) e Giovanni Trapani dit King Kong (Salvatore Termini) dòp ch'l iva pruâ, sénsa sucès, a far-as tōr cuma marangòṅ ad butéga finénd par far al camarēr.