Llwyd Owen
Nofelydd arobryn a dadleuol Cymreig yw Llwyd Owen (ganwyd 4 Ionawr 1977).
| Llwyd Owen | |
|---|---|
| Geni | Llwyd Owen 4 Ionawr 1977 Ysbyty'r Mynydd Bychan, Caerdydd |
| Galwedigaeth | Awdur, cyfieithydd |
| Cenedligrwydd | Cymro |
| Addysg | Ysgol y Wern, Ysgol Glantaf, Caerdydd;, Prifysgol Bangor |
| Gwaith nodedig | Ffawd, Cywilydd a Chelwyddau, Ffydd Gobaith Cariad, Yr Ergyd Olaf, Mr Blaidd, Un Ddinas Dau Fyd, Y Ddyled |
| Gwobrau nodedig | Enillydd Gwobr Llyfr y Flwyddyn 2007 |
| Priod | Annalisa Jane Owen |
| Plant | Elian Sgarlad, Syfi Nona |
| Llofnod |  |
| [www.llwydowen.co.uk Gwefan swyddogol] | |
Bywgraffiad
Cafodd ei eni yn Ysbyty'r Mynydd Bychan yng Nghaerdydd ar 4 Ionawr, 1977. Aeth i Ysgol y Wern ac yna Ysgol Gyfun Glantaf cyn mynychu Prifysgol Bangor. Mae'n parhau i fyw yng Nghaerdydd heddiw, gyda'i wraig a'i ferched. Pan nad yw'n ysgrifennu nofelau, mae'n gweithio fel cyfieithydd.
Gweithiau llenyddol
Cyhoeddwyd ei nofel gyntaf, Ffawd, Cywilydd a Chelwyddau gan Y Lolfa ym Mawrth 2006, a'i ail, Ffydd Gobaith Cariad yn Nhachwedd 2006. Enillodd Ffydd Gobaith Cariad wobr Llyfr y Flwyddyn 2007. Cyhoeddwyd ei drydedd nofel, Yr Ergyd Olaf, yn Nhachwedd 2007 a chafodd ei chynnwys ar restr hir Llyfr y Flwyddyn 2009. Dywedodd Owen mewn erthygl ar gyfer Wales Online fod un o brif gymeriadau'r nofel hon wedi ei seilio ar ddyn o Ddinas Powys roedd wedi cyfarfod ag ef tra'n teithio o amgylch Awstralia[1]
Cafodd ei bedwaredd nofel, Mr Blaidd, ei chyhoeddi yn Hydref 2009, a'i lansio fel rhan o Ŵyl Sŵn y DJ Huw Stephens yn y Toucan Club ar 24 Hydref. Cyhoeddodd ei nofel Saesneg gyntaf ym Mai 2010, sef "Faith Hope & Love" (addasiad o'i ail nofel, "Ffydd Gobaith Cariad"). Gwerthodd y nofel hon fwy o gopiau yn yr Unol Daleithiau nag a wnaeth yng Nghymru[2]. Ei bumed nofel Gymraeg oedd "Un Ddinas Dau Fyd" a ryddhawyd ym Mawrth 2011; a'i nofel "Heulfan", yn Nhachwedd 2012. Yn Hydref 2014, cyhoeddwyd ei nofel Y Ddyled.
Yn ogystal â'i nofelau, mae Llwyd wedi cyhoeddi straeon byrion, barddoniaeth a ffotograffau ac wedi cyflwyno rhaglen ddogfen ynghylch artistiaid Caerdydd ar S4C yn 2008.
Llyfryddiaeth
Nofelau Cymraeg
- Ffawd, Cywilydd a Chelwyddau, Mawrth 2006 (Y Lolfa)
- Ffydd Gobaith Cariad, Tachwedd 2006 (Y Lolfa)
- Yr Ergyd Olaf, Tachwedd 2007 (Y Lolfa)
- Mr Blaidd, Hydref 2009 (Y Lolfa)
- Un Ddinas Dau Fyd, Mawrth 2011 (Y Lolfa)
- Heulfan, Tachwedd 2012 (Y Lolfa)
- Y Ddyled, 1 Hydref 2014 (Y Lolfa)
- Taffia, 2016 (Y Lolfa)
- Pyrth Uffern, 2018 (Y Lolfa)
- Iaith y Nefoedd, 2019 (Y Lolfa)
Nofelau Saesneg
- Faith, Hope and Love, Mai 2010 (Alcemi)
- The Last Hit, 2013 (Y Lolfa)