Strollad Broadel Saoz (1997-2002) ha Strollad an Demokrated Saoz (abaoe 2002)
E 1997 e voe savet gant Robin Tilbrook ar Strollad Broadel Saoz, oc'h adkemer anv ur Strollad Broadel Saoz kent, dezhañ da bal reiñ da Vro-Saoz da vihanañ gwirioù kevatal da re Skos, a-drugarez d'un Dael emren pergen, ha marteze zoken dizalc'hidigezh leun Bro-Saoz.
E Gwengolo 2002 e kemeras an anv Strollad an Demokrated Saoz, goude bezañ kendeuzet gant strolladoù bihan all. E Here 2004 e kendeuzas gant Strollad Adreizhañ ar Rouantezh-Unanet, a oa un disrann eus UKIP. E C'hwevrer 2007 e kendeuzas er wezh-mañ gant Strollad Bro-Saoz Nevez
Daoust d'ar Strollad na vezañ enebet ouzh dizalc'hidigezh Broioù keltiek ar Rouantelezh-Unanet ez sav diaesterioù gant :
- Ar vroadelouriezh kembreat, pa embann an Demokrated Saoz ez eo Sir Fynwy ul lodenn eus Bro-Saoz. Evel-se e voe kinniget ur roll a-berzh ar strollad da geñver an dilennadeg da vodadenn Kembre e 2007.
- Ar vroadelouriezh kerneveurat, pa embann an Demokrated Saoz ez eo Kernev-Veur ul lodenn eus Bro-Saoz. Evel-se e kinnigas ar strollad un emstriver da zilennadeg da Guzul Kernev-Veur d'ar Yaou 4 Mezheven 2009 e Pastell Dilennel Tewynn Pleustri-Pentire, Keith Robert Riley, a bakas 8 % ar mouezhioù.
Da geñver Dilennadeg da Zael Unaniezh Europa 2009 e kinnigoù rolloù e 9 fastell dilennel Bro-Saoz. Paket eo bet gant an Demokrated Saoz:
- Yorkshire hag an Humber : 2,6 %
- Gwalarn : 2,4 %
- Reter Midlands : 2,3 %
- Kornôg Midlands : 2,3 %
- Biz : 2,2 %
- Gevred : 2,2 %
- Reter : 2 %
- Mervent : 1,6 %
- Londrez : 1,4 %
D'an hevelep deiz, d'ar Yaou 4 a viz Even 2009, e voe dilennet Peter Davies, ezel eus ar Strollad, da vaer nevez Doncaster (Su Yorkshire) gant 22,6 % ar mouezhioù.