Das blaue Licht
| Das blaue Licht | |
| Filmdata | |
|---|---|
| Titl orin | Das blaue Licht |
| Bro produiñ | Alamagn |
| Deuet er-maez | 24 a viz Meurzh 1932 en Alamagn |
| Yezh orin | alamaneg |
| Padelezh (PAL-DVD) : | 86 munutenn |
| Pare | |
| Filmaozer | Leni Riefenstahl |
| Produer | Leni Riefenstahl Harry R. Sokal |
| Skrivagner | Leni Riefenstahl Béla Balázs Carl Mayer |
| Sonerezh | Giuseppe Becce |
| Rener al luc'hskeudenniñ | Hans Schneeberger Walter Riml |
| Frammer | Leni Riefenstahl |
| Aktourien | |
Leni Riefenstahl | |
| Liammoù diavaez | |
kemmañ  | |
Das blaue Licht (alamaneg a dalvez Ar gouloù glas) a zo ur film romantel alaman sevenet ha skrivet ar senario anezhañ gant Leni Riefenstahl, Béla Balázs ha Carl Mayer. E 1932 e teuas er-maez.
Awen
Diazezet eo senario ar film war meur a istor : ur vojenn alaman kozh, ur gontadenn gant ar vreudeur Grimm hag an danevell Bergkristall skrivet gant Gustav Renker e 1930. Ne voe ket meneg an danevell-se gant sevenerien ar film avat.
Senario
Junta (Leni Riefenstahl) a vev asambles gant Vigo (mêsaer, c'hoariet e berzh gant Mathias Wieman) pell diouzh ar gêriadenn dostañ. Hi eo an den nemetañ a c'hall krapañ gant ar memezioù tost d'ar gêriadenn ha tizhout ur vougev er Menez Cristallo, ma luc'h ur gouloù glas souezhus da vare loargann. Kas o deus annezidi ar gêriadenn outi, rak soñjal a ra dezho ez eo ur sorserez. Maouezed ar gêriadenn eo o deus ar muiañ a gas outi, peogwir ez eus marvet paotred yaouank pa glaskjont krapañ gant ar menez. Degouezhout a ra ul livour anvet Tonio (Beni Führer), hag eñ dedennet gant Junta koulz ha gant ar gouloù glas.
Filmañ
Filmet e voe ar film e Sarentino (alamaneg Sarntal) en Italia hag e Tisino e Suis.
Doareoù all
- E 1937 e teuas ar film er-maez en-dro. Tennet e voe anvioù Carl Mayer, Béla Balázs ha Harry R. Sokal rak Yuzevien e oant.
- En miz Du 1951 e voe savet ar film en-dro : kemmet ar sonerezh anezhañ ha kinniget e voe e Roma. Berraet e voe ivez gant Leni Riefenstahl : 73 munutenn e-lec'h 86 munutenn. Tennañ a reas ar senenn ziwezhañ ha skignet e voe ar film gant an titl Ur vojenn eus ar menezioù gant Leni Riefenstahl. En Alamagn hag en Aostria e voe skignet gant an titl Die Hexe von Santa Maria, (Sorserez Santa Maria).
Priz
- 1932 : Medalenn argant e Festival filmoù Venezia