Лагішынскі сельсавет

Лагі́шынскі сельсавет — адміністрацыйна-тэрытарыяльная адзінка ў складзе Пінскага раёна Брэсцкай вобласці. Цэнтр — гарадскі пасёлак Лагішын.

Лагішынскі сельсавет
Краіна	Беларусь
Уваходзіць у	Пінскі раён
Уключае	6 населеных пунктаў
Адміністрацыйны цэнтр	Лагішын
Дата ўтварэння	12 кастрычніка 1940, 25 лістапада 2014
Дата скасавання	22 снежня 1959
Насельніцтва (2019)	2 675
Код аўтам. нумароў	1

Утвораны 12 кастрычніка 1940 года ў складзе Лагішынскага раёна Пінскай вобласці БССР. Цэнтр — вёска Лагішын. З 8 студзеня 1954 года ў Брэсцкай вобласці. 16 ліпеня 1954 года да сельсавета далучана тэрыторыя скасаванага Дуброўскага сельсавета, вёска Іванісаўка пералічана ў склад Ставоцкага сельсавета Пінскага раёна^[1]. 31 сакавіка 1959 года далучана тэрыторыя скасаванага Хвароснаўскага сельсавета^[2]. 22 снежня 1959 года вёска Лагішын набыла статус гарадскога пасёлка, Лагішынскі сельсавет скасаваны, яго тэрыторыя перададзена ў падпарадкаванне Лагішынскаму гарадскому пасялковаму Савету. Пасля скасавання Лагішынскага раёна 25 снежня 1962 года Лагішынскі пассавет увайшоў у склад Пінскага раёна. У 1976 годзе скасаваны хутары Казлоўка і Расоха^[3]. У 1980 годзе ў склад пассавета вернута вёска Іванісаўка^[4]. 25 лістапада 2014 года пассавет рэарганізаваны ў Лагішынскі сельсавет^[5].

Насельніцтва паводле перапісу 2009 года (5 населеных пунктаў, без Лагішына) — 959 чалавек^[6], з іх 94,1 % — беларусы, 2,1 % — палякі, 1,8 % — рускія, 1,8 % — украінцы^[7]; паводле перапісу 2019 года (6 населеных пунктаў) — 2675 чалавек^[8].