Еўрапейская кінапрэмія найлепшай еўрапейскай актрысе

Еўрапе́йская кінапрэ́мія найле́пшай еўрапе́йскай актры́се (англ.: European Film Award for Best European Actress) — адна з галоўных узнагарод Еўрапейскай кінапрэміі, якая была ўпершыню прысуджана на 1-й цырымоніі ў 1988 годзе і ўручаецца еўрапейскай кінаакадэміяй штогод па сённяшні дзень, за выключэннем 1994 і 1995 гадоў, калі ўзнагарода ў гэтай намінацыі не ўручалася.

Еўрапейская кінапрэмія найлепшай еўрапейскай актрысе European Film Award for Best European Actress
Еўрапейская кінапрэмія, статуэтка
Тып	Еўрапейская кінапрэмія, прэмія за галоўную жаночую ролю[d] і катэгорыя кінапрэміі[d]
Заснавальнік	Еўрапейская кінаакадэмія
Заснаванне	1988

Колькасць намінацый у катэгорыі «Найлепшая еўрапейская актрыса» на працягу існавання кінапрэміі няраз змянялася, застаючыся ў межах ад 3 да 7. Аднак, у 1996 годзе пераможца абіраўся без папярэдняга вызначэння намінантаў. Апроч таго, часам у склад адной намінацыі ўваходзіла адразу некалькі акцёраў, у тым ліку ў 2002 годзе быў намінаваны цэлы акцёрскі ансамбль з 8 актрыс.

Па стане на канец 2023 года найбольшую колькасць перамог у намінацыі «Найлепшая еўрапейская актрыса», а менавіта 2, маюць актрысы Кармен Маўра (1988, 1990), Жульет Бінош (1992, 1997), Ізабэль Юпэр (2001, 2002), Шарлота Рэмплінг (2003, 2015) і Сандра Хюлер (2016, 2023). Па колькасці намінацый першынства трымае Пенелопа Крус, якая намінавалася 5 разоў (1999, 2004, 2006, 2009, 2022).