Яўген Барсукоў

Выхаванец гомельскага футболу. У 2006 годзе пачаў выступаць за дубль «Гомлю». З 2008 году пачаў таксама прыцягвацца да асноўнай каманды, але працягваў гуляць пераважна за клюбны дубль. У сэзонах 2008—2009 гадоў згуляў ў Найвышэйшай лізе 9 матчаў. Паводле вынікаў сэзону 2009 году «Гомель» вылецеў у Першую лігу, пасьля чаго Барсукоў быў пераведзены ў асноўны склад і дапамог камандзе вярнуць месца ў эліце. У сьнежні 2010 году падоўжыў кантракт з «Гомлем», але на яго ўжо не разьлічвалі ў асноўным складзе, таму нападнік быў аддадзены ў гадавую арэнду ў рэчыцкі «Ведрыч-97». У рэчыцкім клюбе здолеў замацавацца ў галоўнай камандзе, а пазьней арэнда гульца была падоўжаная.

У ліпені 2013 году вярнуўся з арэнды ў «Гомель», аднак згуляў за каманду толькі адзін матч, якім была сустрэча 21 ліпеня супраць менскага «Дынама», калі выйшаў на замену ў пачатку другога тайму, але праз паўгадзіны быў заменены. Ужо ў жніўні канчаткова зышоў з гомельскага клюбу, зноў далучыўшыся да «Ведрыча-97» у якасьці свабоднага агента. У 2014 годзе дапамог рэчыцкаму клюбу, які зьмяніў назву на «Рэчыца-2014» заняць высокае пятае месца ў Першай лізе, але на наступны год у сувязі зь фінансавымі праблемамі клюбу пакінуў яго і стаў гульцом «Гомельчыгунтрансу».

У пачатку 2016 году праходзіў прагляд у «Віцебску», але беспасьпяхова. Пазьней зноў стаў гульцом «Гомлю»^[3]. У сэзоне 2016 году з 10 галамі стаў найлепшым бамбардзірам каманды і дапамог ёй атрымаць перамогу ў Першай лізе. У сьнежні 2016 году падоўжыў кантракт з клюбам^[4]. У першай палове сэзону 2017 году пераважна зьяўляўся на полі, выходзічы на замену. У выніку ў 11 матчах забіў два галы.

У ліпені 2017 году пакінуў гомельскі клюб^[5] і неўзабаве стаў гульцом магілёўскага «Дняпра»^[6], дзе замацаваўся ў пачатковым складзе. У студзені 2018 году на год падоўжыў кантракт з магілёўцамі^[7]. У сэзоне 2018 году быў трывалым гульцом першай адзінаццатцы, але ня здолеў выратаваць магілёўскую каманду ад вылету ў Першую лігу. У сьнежні 2018 году далучыўся да «Смалявічаў»^[8]. Замацаваўся ў стартавым складзе каманды, з 15 галамі стаў ейным найлепшым бамбардзірам у сэзоне і дапамог вярнуцца ў Найвышэйшую лігу. У студзені 2020 году падоўжыў кантракт з клюбам зь Менскай вобласьці^[9].

У чэрвені 2020 году далучыўся да мазырскай «Славіі»^[10], дзе таксама хутка замацаваўся ў складзе. У сэзоне 2021 году з шасьцю галамі стаў другім бамбардзірам каманды. У сьнежні 2021 году падоўжыў кантракт з мазырчукамі^[11]. У сэзоне 2022 году быў капітанам каманды. У сьнежні 2023 году пакінуў клюб^[12] і ў студзені 2024 году вярнуўся ў «Гомель»^[13].

Гуляў за юніёрскую зборную Беларусі ў кваліфікацыі чэмпіянату Эўропы. У 2010 годзе правёў таксама чатыры матчы за зборную Беларусі (да 20 гадоў).

• Профіль на сайце «Гомелю» (рас.)
• Статыстыка «ПБ-Инфо» (рас.)