Дзяніс Шчарбіцкі

Выхаванец дзіцячай школы менскага МТЗ-РІПА. Пазьней трапіў у структуру барысаўскага БАТЭ. З 2014 году пачаў выступаць за дубль, а таксама ў 2014 і 2015 гадах выступаў за барысаўскі клюб у Юніёрскай лізе УЭФА.

З 2015 году пачаў прыцягвацца да асноўнай каманды. 7 ліпеня 2016 году дэбютаваў у асноўным складзе БАТЭ ў матчы Найвышэйшай лігі супраць «Іслачы» (3:1). Да канца сэзону 2016 году згуляў яшчэ ў чатырох матчах чэмпіянату. У верасьні 2016 году падпісаў новы кантракт з БАТЭ^[4]. У сэзоне 2017 году стаў асноўным брамнікам БАТЭ, правёўшы за каманду 23 матчы ў чэмпіянаце Беларусі, 4 у Лізе чэмпіёнаў і 8 у Лізе Эўропы. Паводле вынікаў сэзону 2017 году быў прызнаны найлепшым брамнікам чэмпіянату Беларусі. У студзені 2019 году падоўжыў кантракт з барысаўчанамі^[5]. Пачынаў сэзон 2019 году ў якасьці асноўнага брамніка, аднак у чэрвені атрымаў траўму і да канца году на полі не зьяўляўся. Траўмы перасьледвалі футбаліста і ў наступныя гады, гэтак у сэзоне 2020 году ён чаргаваўся ў браме з Антонам Чычканам, а ў 2021 годзе ўвогуле не зьяўляўся на полі.

У лютым 2022 году яшчэ на год падоўжыў пагадненьне з БАТЭ^[6]. Толькі зь лета пачаў пачаў трапляць у заяўку каманды на матчы. У сэзоне 2022 годзе правёў дзьве гульні ў Найвышэйшай лізе. У пачатку 2023 году праз забарону Міністэрства спорту і турызму ня трапіў у заяўку БАТЭ на сэзон і ня браў удзелу ў афіцыйных матчах. У ліпені 2023 году перайшоў у екацярынбурскі «Ўрал»^[7]. У студзені 2024 году падпісаў новы доўгатэрміновы кантракт з клюбам^[8].

У 2012—2013 гадах гуляў за зборную Беларусі (да 17 гадоў) ў кваліфікацыі чэмпіянату Эўропы. 17 студзеня 2015 году дэбютаваў у зборнай Беларусі (да 21 году), выйшаўшы на замену ў канцы матчу супраць зборнай Эстоніі на Кубку Садружнасьці ў Санкт-Пецярбургу. Пазьней стаў асноўным брамнікам моладзевай зборнай.

9 чэрвеня 2018 году дэбютаваў у складзе нацыянальнай зборнай Беларусі ў таварыскім матчы супраць зборнай Фінляндыі.

БАТЭ:

• Чэмпіён Беларусі: 2017, 2018
• Срэбраны прызэр чэмпіянату Беларусі: 2019, 2020
• Бронзавы прызэр чэмпіянату Беларусі: 2022
• Уладальнік Кубка Беларусі: 2020
• Уладальнік Супэркубка Беларусі: 2017
• Найлепшы брамнік чэмпіянату Беларусі: 2017
• У сьпісе 22 найлепшых футбалістаў чэмпіянату Беларусі: 2017, 2018

• Профіль на сайце БАТЭ (рас.)
• Статыстыка «ПБ-Инфо» (рас.)
• Профіль (анг.) на Transfermarkt
• Профіль (анг.) на Soccerway
• Профіль (анг.) на Worldfootball