Ikaanom na Asesment Report kan IPCC
An Ikaanom na Asesment Report (Ingles: Sixth Assessment Report o AR6) kan United Nations (UN) Intergovernmental Panel on Climate Change (IPCC) iyo an ikaanom sa mga serye nin report na pig-aases an syentipiko, teknikal, asin socio-ekonomikong impormasyon mapadapit sa pagbago nin klima. Pigtatrabaho nin tulong Working Groups (WGI, II, asin III) an minasunod na mga topiko: The Physical Science Basis (WGI); Impacts, Adaptation and Vulnerability (WGII); Mitigation of Climate Change (WGIII). Sa mga ini, an inot na pag-adal napublikar kan 2021, an ikaduwang report kan Pebrero 2022, asin an ikatulo kan Abril 2022. An pinal sintesis report dapat na matapos kan kahurihan nin 2022.
An inot sa tulong working groups nagpublikar kan report kaiyan kan 9 Agosto 2021, Climate Change 2021: The Physical Science Basis.[1][2] Nagsusuma-tutal nin 234 syentista hali sa 66 na nasyon an nagkontribwir sa inot na working group (WGI) report.[3][4] An mga awtor[5] nagtindog sa labing 14,000 na syentipikong papel tanganing gumibo nin 3,949-pahinang report, na inaprubaran kaidto kan 195 gobyerno.[6] An dokumentong Summary of Policymakers (SPM) pigsurat nin mga syentista asin inuyunan linya-por-linya nin 195 gobyerno sa IPCC sa laog kan limang aldaw bago an 6 Agosto 2021.[5]
Segun sa report kan WGI, posible sanang likayan an pag-init nin 1.5 °C (2.7 °F) o 2.0 °C (3.6 °F) kun dakula asin tulos-tulos na mga pagbawas sa greenhouse gas emissions an magibo.[1] Sa sarong front-page story, ilinadawan kan The Guardian an report bilang "its starkest warning yet" nin sarong "major inevitable and irreversible climate changes",[7] sarong tema na ipig-aniningal nin dakol na peryodiko[8] siring man nin mga pulitikal na pamayo asin aktibista sa bilong na kinaban.
