Bundesstroß 23

D' B 23 fongt an da Bundesstroß 472 (Umgehungsstroß Schongau - Peiting) Ausfahrt Peiting Syd im Landkroas Weilheim-Schogau o und fiahtt znechst noch Rottenbuch. Da Strecknobschnitt woar bis voa wenign Joarn no in am schlechtn Ausbauzuastond, woduach se meahrane, darunta a schwere Unfej eaeignt hom. In de letztn Joar san etliche Teibereiche weita ausbaut worn.

Noch da Ortsduachfoaht Rottenbuch kimmt ma zua Echelsbacha Bruck. Iwa de 183 m longe und 76 m houche Boongbruck iwasponnt se de Ammer. Af da Bruck is de Grenz zum Landkroas Garmisch-Partnkira.

An Bad Bayersoien voabei glongt ma noch Saulgruab. Zuazaid wead um Saulgruab a Umgehungsstroß baut um'n Ort vom Duachgongsvakeah z'entlostn. In Saulgruab trifft d'B 23 zum easchtn Moi af d'Ammergauboh (Murnau/Obaammagau).

Iwa Untaammagau und an Obaammagau voabei eareicht d' B 23 Ettal. Wenn de B 23 an Ort duachqueat hod, eareicht de Bundesstroß mid'm Ettala Sottl (869 NHN) 'n hechstn Punkt vo da Streckn. Nun geht's iwa d'Serpentina owe ins Loisachtoi. Do kimmt ma donn in de Ortschoft Oberau und de Bundesstroß mindt donn in de B 2. Uma sechs Kilometa valafft de B 23 zamm mid da B 2 Richtung Sidn. Noch da Ortsumfoahrung Farchant trenna se de B 23 vo da B 2 und valafft in sidwestlicha Richtung af Garmasch-Partakurch.

Noch'm Ortstei Griesen endt de B 23 on da Grenz zu Estareich (Tirol), wo se in de estareichische B 187 iwageht (Richtung Lermoos, Feanpossstroß, Inntoi).

Bstimmt scho in da Remazeid, owa ollaspadastns zua Zeid vo Ludwig IV. hod's a Vabindung vo da Via Claudia Augusta im Lechtoi zua Brennerstroß im Loisachtoi gem.

Da schwiarigste Obschnitt vo dera Routn hod vo Rottenbuch bis Bad Bayersoien duach de Echelsbacha Schlucht gfiaht. Deshoib is vom 8. Novemba 1928 bis zum 27. Aprui 1930 de „Echelsbacher Bruck“ fia 900 000 RM baut worn.

De Bundesstroß 23 is 1949 aus da Reichsstroß 23 heavoagonga. Domois hod de R 23 in Peiting on da Kreizung Schongauer Stroß / Obere Stroß / Guggenbergastroß on da domoiign R 17 ogfonga und hod in Oberau an da Aimindung in de R 2 geendt. Mid da Aifiahrung vo de Bundesstroßn is de B 23 iwa Farchant noch Garmisch-Partakurch valengat worn. Duat hod se in de B 24 gmindt.^[1]

De Ortsumfoahrung Obaammagau is 1989 am Vakeah iwagem worn.^[2]

De Eaweitarung vo da B 23 vo Garmisch-Partakurch zua estreichischn Grenz bei Griesen is 1991 eafoigt. Dazua is de B 24 integriat worn. Da vableimde Rest im Garmisch-Partakurchna Gmoagebiet is obgstuaft worn.

1991 is zam mid da Vakeahsfreigob vo am Tei vo da Umgehungsstroß Schongau - Peiting da Beginn vo da B 23 on de B 17 Ausfoaht Peiting West valegt worn. De Ortsduachfoaht Peiting is zua Stootsstroß obgstuaft worn. De Valegung zua heitign Stej is noch Featigstejung vo da gsomtn Umgehungsstroß 1997 gmocht worn.

Im Mai 2000 is da Farchanta Tunnel eaeffnt worn.^[3]

Deazeid (Meaz 2010) san foignde Eawaitarunga in Planung oda im Bau:

• Estliche Umfoahrung vo Saulgruab (Baufoatschritt seit Feba 2009 in Bau)^[4]
• Umfoahrung Oberau (voadringlicha Bedoaf im Bundesvakeahsswegeplan 2003)^[5]
• Westliche Umfoahrung Garmisch-Partakurch mid Kramertunnel (Planungsstond: Klog geng'n Planfeststejungsbschluss om 23. Juni 2009 obgwiesn)^[4]

Zwischn da St 2059 (bei Rottenbuch) und Garmisch-Partakurch fihat de Deitsche Oipnstroß entlong vo da B 23.

Zu de Sengswiadigkeitn on da Streckn zejn:

• Augustina-Chorherrnstift in Rottenbuch
• Echelsbacha Bruck zwischn Rottenbuch und Bad Bayersoien
• mid Lüftlmolarei vaziate Fassadn in Obaammagau
• Obaammagauer Passionsspui
• Schloss Linderhof zwischn Obaammagau und Ettal
• Klosta Ettal

De ganze Streckn is londschoftli reizvoi. De Streckn untateit se:

• Oipnvoalond (Peiting bis Saulgrub)
• Ammergauer Oipn (Saulgrub bis Ettal)
• Bayerische Voaoipn und Loisachtoi (Ettal bis Garmisch-Partakurch)
• Wedastoagebiag mid da Zugspitz (Garmisch-Partakurch bis zua estareichischn Grenz)

On da Streckn san de Heijbäda Bad Bayersoien und Bad Kohlgrub sowia da Luftkuaort Ettal.

• Listn vo de Bundesstroßn in Deitschland