The Accidental Tourist

William Hurt ye un home aburríu qu'escribe guíes de viaxe pa homes de negocios, p'aquelles persones que realmente odien viaxar, pero que por motivos llaborales nun-yos queda otru remediu. Pa esos turistes, Hurt pasa la so vida visitando ciudaes, encamentando llugares por que la xente siéntase como en casa. Tou lo qu'un turista accidental precisa, ta na guíes d'esti personaxe.

Kathleen Turner ye la esposa, tamién aburrida, porque nun ye capaz de llevantar un matrimoniu que día tres día va somorguiándose nun abismu que lu dixebra del so home, porque nun ye capaz d'encarar el fechu de que'l so fíu finó, de que-y queda una vida que tien de consiguir sobrollevar. Ensin intentar pescudar cómo ta llevando'l so maríu esti duru trauma, anúncialu que decidió dixebrase d'él.

Ye a partir d'esti momentu, cuando empieza una hestoria, conmovedora, onde los sentimientos de los personaxes ocupen el papel protagonista, pos cobren una fondura casi real, afigurando les sensaciones de murnia y murria nel espectador.La apatía, la soledá, l'arrenunciu a la busca de la felicidá... esi pequeñu mundu nel que Hurt pretende vivir el restu de la so vida, va vese invadíu pola presencia d'una cacipladora adiestradora de perros.Geena Davis encarna a esti encantador personaxe, una chica totalmente opuesta a tou lo qu'arrodia a Hurt: optimista, dulce, faladora... con un calter incompatible al de Hurt, una persona senciello y humilde que va espertar nél eses ganes por siguir viviendo, el demostrase a sigo mesmu, que nun ye necesariu escaecer les males alcordances pa siguir alantre, sinón que ye posible vivir con ellos y ser feliz de nuevu.

Los singulares personaxes secundarios qu'apaecen na película, realicen un trabayu estupendu: los hermanos de Hurt, que nun saben vivir ensin la presencia de la hermana, unos neños atrapaos nel cuerpu de persones adultes con un nulu o escasu sentíu de la orientación, yá que al tar acostumaos a vivir zarraos mientres años nuna casa de la que nunca salen, nun conocen los encantos de la gran ciudá.

Bill Pullman, editor de Hurt, ye'l cobarde mozu que se namora de la hermana d'ésti. Tamién cabe facer mención al perru, esti pequeñu animal que va ser el desencadenante de que les vides de los protagonistes xúnanse. Hurt va vese somorguiáu nuna difícil dulda. Él nun ye un home que sepa tomar decisiones y plantégase-y un importante retu, del que va depender el so destín: volver cola so esposa ya intentar encarar los sos mieos y esmoliciones, procurando ser los dos más comprensivos y comunicativos, o per otra parte, enfusase nesti nuevu mundu qu'hasta agora desconocía, y que una probe moza de los barrios baxos, amosólu.

• Un psicoanalista nel cine - Comentarios sobre la película