Real español

El real español yera una moneda de plata de 3,35 gramos qu'empezó a circular en Castiella nel sieglu XIV y foi la base del sistema monetariu español hasta mediaos del sieglu XIX. En 1480, mientres el reináu d'Isabel y Fernando, afitóse'l so valor en 31 maravedinos.^[1] A partir del añu 1497 pasó a valir 34 maravedinos pola Pragmática de Medina del Campo, qu'estableció en detalle'l pesu y la cantidá de plata que tenía de tener el real acuñáu (1 marcu de plata = 67 monedes de real),^[1] amás d'ordenar la presencia de la sigla del ensayador respeutivu en cada moneda, según la sigla de la ceca (Casa de Moneda) onde fuera acuñada. El so cambéu en dómina de Felipe II siguía siendo de 1 real de plata por 34 maravedinos y, de la mesma, 1 escudu d'oru por 16 reales de plata. Mientres el reináu de Felipe II, ente los años 1556 y 1598, acuñáronse escudos con un pesu de 3,4 gramos d'oru, cada unu d'ellos equivalente a 544 maravedinos.

La Pragmática de 1497 definió amás otres dos monedes de plata, submúltiplos del real: el mediu real y l'octavu de real, esti postreru de forma cuadrada.^[1] Nun definió, sicasí, monedes de plata de valor cimeru al real. Estes fueron añadíes nel sieglu XVI polos socesores d'Isabel y Fernando: Carlos I y Felipe II. Los múltiplos yeren les monedes de 2 reales, 4 reales y la conocida y famosa pieza de 8 reales o «real d'a 8».^[2]

Diches monedes fueron producíes en gran cantidá mientres los sieglos XVI, XVII y XVIII, non solo nes cecas de la España peninsular sinón tamién y mayormente nes d'ultramar, como nes cecas de Ciudá de Méxicu, activa dende 1535; Lima, Perú, activa dende 1568; Potosí, Bolivia, activa dende 1574; Bogotá, Colombia, activa dende 1627; Santiago, Chile, activa dende 1749; y Popoyán, Colombia, activa dende 1758. Tal bayura de cecas en diversos llugares y la fayadiza llei de plata de los sos productos xeneró que'l real español fora una moneda frecuente de topar nos mercaos mundiales nel periodu ente 1600 y 1800, al puntu que'l real yera utilizáu comúnmente como dineru circulante, inclusive fora de los territorios de la monarquía hispánica.

Los reales, siempres de plata, fueron emitíos en denominaciones de ¼, ½, 1, 2, 4 y 8 reales.

Esistíen el real, mediu real, cuartu y sestu de real de plata d'once dineros y cuatro granos de llei y talla de sesenta y seis pieces d'un real por un marcu dende don Pedro I. Los reis Enrique II, Xuan I, Enrique III, Xuan II y Enrique IV acuñaron los suyos a la mesma llei y talla.

• 
  Anverso de moneda de 2 reales (plata) de Felipe V con «ceca» de Segovia del añu 1723.
• 
  Aviesu de moneda de 2 reales (plata) de Felipe V con «ceca» de Segovia del añu 1723.

Un escudu na dómina de Felipe II tenía 3,4 gramos d'oru, y equivalía 544 maravedinos. Yá que el valor del oru anguaño ronda los 30 euros el gramu, l'equivalente d'un escudu sería d'unos 102 euros actuales, y el del maravedín d'aproximao 0,1875 euros. Un real de plata equivalía a 34 maravedinos, por tanto'l so valor actual n'euros ye de 6,375.^[3]

• Real d'a ocho
• Columnario
• Forgar español

• The Colonial Coinage of Spanish America: An introduction by Daniel Frank Sedwick.
• Krause, Chester L. and Clifford Mishler (1991). Standard Catalog of World Coins: 1801–1991 (18th ed. ed.). Krause Publications. ISBN 0873411501.
• Santiago Fernández, Javier de (20 d'agostu de 2013). «ANTECEDENTES DEL SISTEMA MONETARIU DE LA PESETA». VII Xornaes Científiques Sobre Documentación Contemporánea (1868-2008):  páxs. 22. https://www.ucm.es/data/cont/docs/446-2013-08-22-13%20antecede.pdf. Consultáu'l 2 d'avientu de 2014. 
• http://elsexagenario.blogspot.com/2011/12/intereses-del sieglu-xvi.html

• Wikimedia Commons acueye conteníu multimedia sobre'l Real español.
• Forgar Español. Antiguos Billetes de Dólares con impresos de Reales Columnarios