Phylloscopus schwarzi

Mide alredor de 14 cm de llargu.^[3] Los adultos tienen les partes cimeres de color pardu llisu y les inferiores ablancazaes. Presenta una prominente llista superciliar ablancazáu amarellentada. El so picu ye apuntiáu, anque más anchu que'l del so similar pariente'l mosquiteru aveséu. Amás les sos pates son más clares que les del visiegu y los sos deos son más grandes, de resultes del so estilu de vida más terrestre. Los dos sexos tienen un aspeutu similar, como ye habitual ente los mosquiteros, pero los xuveniles tienen les partes inferiores más amarellentaes.

La so llamada consiste nun nidiu chick.^[4]

El mosquiteru de Schwarz ye un páxaru migratoriu que cría nel sur de la Siberia central y oriental, el norte de Mongolia, Manchuria, Corea del Norte y l'estremu oriental de Kazakstán y muévense a Indochina y el sureste de China pa pasar l'iviernu. Na so área reproductiva'l mosquiteru de Schwarz vive nos montes caducifolios abiertos con sotobosque y bordiaos per zones de carba, xeneralmente cerca de l'agua. Nos sos cuarteles ivernizos ocupa les llendes del monte, en zones de carba trupa cercanos a los árboles.^[4] N'Europa ye un divagante raru.

Aliméntase principalmente d'inseutos.

Constrúi'l so nial ente les carbes baxes, onde pon alredor de cinco güevos. Los sos güevos son abuxaos densamente motudos en pardu verdosu y miden 17x13 mm.^[4]

• Wikimedia Commons acueye conteníu multimedia sobre Phylloscopus schwarzi .