Mammuthus primigenius

Los restos más antiguos daten posiblemente de fai 150.000 años y provienen de depósitos de la Glaciación Riss, en Eurasia. Descendía del mamut de la estepa (Mammuthus trogontherii).^[16]

Foi'l naturalista francés Georges Cuvier quien en 1796 identificó per primer vegada los restos del mamut llanudu non como d'elefantes modernos tresportaos al Árticu, sinón como una especie dafechu distinta. Más significativamente, él afirmó qu'esta especie estinguiérase y yá nun esistía, un conceutu que nun yera llargamente aceptáu na so dómina.^[17] Siguiendo la identificación de Cuvier, Johann Friedrich Blumenbach dio-y al mamut llanudu'l nome científicu en 1799 d'Elephas primigenius (asitiándolu nel mesmu xéneru que l'elefante asiáticu). Nun foi sinón hasta 1828 que Joshua Brookes reconoció qu'esta especie yera lo bastante distinta como pa merecer un nuevu xéneru, reclasificándola como Mammuthus primigenius.^[18]

Dao que se conocen munchos restos de les distintes especies de mamuts de distintos llugares, foi posible reconstruyir la historia evolutiva d'esti xéneru al traviés d'estudios morfolóxicos. Les especies de mamuts pueden ser identificaes pol númberu de cantos d'esmalte nos sos molares; les especies más primitives teníen pocos cantos, y la so cantidá amontábase gradualmente cuando les nueves especies evolucionaben y reemplazaben a les anteriores. Coles mesmes, les corones de los dientes tornábense más llargues, y los cranios facíense más altos de riba a embaxo y más curtios lateralmente p'afaer a estos dientes. Conócense individuos y poblaciones qu'amuesen carauterístiques morfolóxiques transicionales ente caúna de les especies, y que les especies primitives y avanzaes coesistíen hasta que les primeres sumieron. Les distintes especies y les sos formes entemedies pueden ser denominaes "cronoespecies". Propunxéronse tamién munches subespecies entemedies, pero la so validez ye incierta; estes pueden ser consideraes como formes primitives d'una especie derivada, o formes derivaes d'una especie primitiva.

Los primeros miembros conocíos del xéneru Mammuthus son les especies africanes Mammuthus subplanifrons del Pliocenu y Mammuthus africanavus del Pleistocenu. Camiéntase que la primera ye l'ancestru de les formes posteriores. Los mamuts aportaron a Europa fai cerca de 3 millones d'años, siendo'l so primer tipu conocíu'l denomináu Mammuthus rumanus, que s'estendió per Europa y China. Conócense solo los sos molares, qu'amuesen ente 8-10 cantos d'esmalte. Una población evolucionó ente 12-14 cantos y reemplazó al tipu anterior, derivando en Mammuthus meridionalis. De la mesma, esta especie foi reemplazada pel mamut d'estepa, Mammuthus trogontherii, con 18-20 cantos, qu'evolucionó n'Asia Oriental fai cerca de 1 millón d'años. Los mamuts que derivaron de M. trogontherii evolucionaron molares con 26 cantos fai 200.000 años en Siberia, y convirtiéronse nel mamut llanudu, M. primigenius.^[19]

El mamut colombín (Mammuthus columbi) tamién evolucionó d'una población de M. trogontherii el cual ingresara en Norteamérica. Un estudiu xenéticu de 2011 amosó que M. imperator taba agrupáu dientro d'un subclado de mamuts lanudos. Esto suxer que dambes poblaciones s'entemecieron y produxeron descendencia fértil. Esto tamién suxer que la forma norteamericana conocida como "M. jeffersonii" pue ser un híbridu ente dambes especies.^[20] Adicionalmente, propunxéronse delles subespecies de M. primigenius como M. primigenius primigenius, M. primigenius jatzkovi y M. primigenius fraasi.^[21] Les poblaciones de les islles St. Paul Island y Wrangel fueron consideraes primeramente como variedaes nanes, muncho menores que los mamuts llanudos continentales, inclusive la postrera foi descrita como una nueva subespecie, M. p. vrangeliensis; sicasí investigaciones detallaes amosaron qu'estos mamuts llanudos islleños nun yeren realmente nanos.^[22][23] Los mamuts de Wrangel tuvieron aisllaos por 5.000 años, pero solo esperimentaron una perda llindada de variación xenética.^[24]

La comunidá científica foi esitosa nel estudiu de la filoxeografía del mamut llanudu y determinar la secuencia completa del xenoma mitocondrial de Mammuthus primigenius.^[25][26] L'analís demuestra que la diverxencia del mamut llanudu, los elefantes africanos y l'elefante asiáticu asocedió nun curtiu periodu, y confirma que'l mamut taba más rellacionáu cola especie asiática que coles africanes. Una meyora importante nesta direición dase n'avientu de 2005, cuando un equipu d'investigadores estauxunidenses, alemanes y británicos fueron capaces d'axuntar un perfil d'ADN mitocondrial completu del mamut, lo cual dexó deliniar la cercana rellación evolutiva ente los mamuts y los elefantes asiáticos. Los elefantes africanos xebráronse del mamut llanudu fai cerca de 6 millones d'años, más o menos pola mesma dómina en que se produxo la separción evolutiva ente los chimpancés y los humanos. Enantes de la publicación del xenoma del Neandertal, munchos investigadores esperaben que'l primer xenoma nuclear totalmente secuenciáu d'una especie estinguida fuera'l del mamut.

En payares de 2008, dos profesores de la Universidá Estatal de Pennsylvania – Stephan Schuster, profesor de bioquímica y bioloxía molecular, y Webb Miller, profesor de bioloxía y ciencia ya inxeniería computacional – reportaron que mapearan la mayor parte del ADN del mamut. La so investigación afayó qu'había dos grupos distintos de mamuts llanudu: unu que s'estinguió fai 45.000 años, y unu distintu que s'estinguiría alredor de fai 10.000 años. Especúlase qu'estos grupos son lo suficientemente diverxentes como para ser carauterizaos como subespecies. El grupu que s'estinguió enantes permaneció nel mediu del Árticu, ente que l'otru grupu tenía un rangu muncho más ampliu.^[27] La ponte de Beringia probablemente xugó un importante rol estructurando les poblaciones de mamuts, actuando como una barrera ecolóxica.^[28] Estudios recién d'isótopos estables de mamuts siberianos y del Nuevu Mundu amosaron que tamién había diferencies nes condiciones climátiques en dambos llaos de la ponte de Beringia, siendo Siberia más uniformemente fría y seca a lo llargo del Pleistocenu tardíu.^[29]

La so investigación tamién amuesa que l'ADN del mamut llanudu y el del elefante africanu son ente 98.55% a 99.4% idénticos.^[30][31]Anque los autores almiten nun conocer el tamañu enteru del xenoma, calculen que secuenciaron cerca del 50% a partir de fragmentos aleatorios.^[32] L'equipu mapeó la secuencia del xenoma nuclear del mamut estrayendo l'ADN de folículu de pelo d'un mamut de 20.000 años recuperáu del permafrost y d'otru mamut que morrió hai unos 60.000 años. Usar l'ADN del pelo evita los problemes de contaminación causaos por bacteries y hongos. Los folículos del pelo caltienen l'ADN por cuenta de la so proteición similar a la del plásticu qu'ufierta'l material capilar.^[33]

El so nome provién de la so gruesa capa de pelo llanudo d'hasta 90 cm de llargu, dispuestu en forma similar al pelame del actual güe almizcleru. Baxo la piel tenía una capa de grasa de 8 a 10 cm d'espesura que fortalecía la so adautación al fríu. Les sos oreyes de 30 cm de llargor, yeren muncho más pequeñes que les de los elefantes actuales (les d'un elefante africanu algamen 180 cm). Presentaben una abombadura en forma de cúpula sobro'l craniu y una alta gorrumba sobro los costazos. Los machos adultos algamaben 2,80 a 3,40 m d'alzada y 6 tonelaes de pesu. Los caniles atopaos algamen hasta 4,2 m de llargor y 84 kg de pesu, pero en permediu tienen 2,5 m y 45 kg.

Los sos dientes taben afechos a les plantes de la tundra, pero habitaba tamién la estepa yerbosa y la presencia de cañes d'árboles nos estómagos de los exemplares atopaos, indica que tamién percorríen los montes.^[34]

La estinción del mamut llanudu ye posiblemente la meyor estudiada dientro del Eventu d'estinción del Cuaternariu que supunxo la estinción de dos tercios de tolos xéneros de mamíferos y la metá de la megafauna terrestre. La so estinción foi gradiada y produxóse miles d'años enantes nes árees continentales que nes islles, nun procesu llargu nel tiempu qu'empezó a finales del Pleistocenu y terminó bien entráu l'Holocenu, colos restos más recién de la especie dataos yá en tiempos históricos. El mamut llanudu esapaeció d'Europa escontra'l 10000 a. C., ente que nel sur de Siberia entá subsistía nel 8000 a. C..^[35] La so estinción nes islles non colonizaes pol ser humanu producióse muncho más tarde: na isla de Saint Paul (Alaska) tuvo presente siquier hasta'l 6000 a. C. El postreru remanente conocíu d'esta especie sobrevivió na isla de Wrangel hasta aproximao 1700 a. C., más de 6000 años dempués de la so estinción nos continentes.^[36]

Los mamuts llanudos qu'aportaren a América del Norte per Beringia esapaecieron xunto al mamut colombín y la mayor parte de la megafauna norteamericana de la dómina ente'l final del Pleistocenu y l'entamu del Holocenu.^[37] Los restos de mamuts más recién que fueron dataos nel continente americanu tienen alredor de 11,000 años.

Estes estinciones encuádrense güei dientro del eventu d'estinción masiva del Cuaternariu, qu'afectó de forma casi esclusiva a la megafauna y empezó hai más de 40.000 años n'Oceanía, teniendo la so puxanza entre fai 14,000 a 11,500 años nel Holártico.^[38] Demientres esti periodu, decenes d'especies de grandes mamíferos esapaecieron de Eurasia y Norteamérica, casi toes con un pesu cimeru a los 40 kilogramos. La estinción de los mamuts llanudos nun puede, por tanto, esplicase aislladamente sinón como parte d'un procesu d'estinción masiva muncho mayor.

Anque munchos científicos siguen estremaos sobro si foi la caza escesiva, los cambeos climáticos, o una combinación de dambes, lo que llevó a la estinción a los mamuts llanudos, anguaño la hipótesis de la caza escesiva ye la que presenta una mayor consistencia y gocia de mayor aceptación, ensin que se refugara definitivamente'l posible efeutu sinérxicu del cambéu climáticu como factor secundariu.

Alcordies con la hipótesis del cambéu climáticu, dominante demientres la primer metá del SXX, el clima más templáu conduciría al amenorgamientu del hábitat apropiáu pa los mamuts, que camudaría de praderíes a montes con una vexetación menos diversa. Sicasí los últimos estudios sobro l'impautu de la perda de megafauna indiquen qu'esti tresformamientu foi en realidá la consecuencia, y non la causa, de la estinción del mamut y el restu de grandes mamíferos qu'habitaben la estepa del mamut.

La hipótesis del cambéu climáticu presenta amás dellos puntos débiles que tán siendo señalaos por numberosos científicos nos últimos años, destacando nel casu particular del mamut llanudu dellos fechos qu'esta hipótesis nun puede esplicar:

• La megafauna terrestre esapaeció a lo llargo de los postreros 55.000 años de la mayor parte del planeta, pero foi faciéndolo enantes nunos continentes que n'otros, y enantes nos continentes que nes sos islles, con diferencies oldeaes de dellos miles d'años nel casu de los mamuts llanudos ente Siberia/Alaska y les sos respeutives islles. Esti fechu non solo nun cuadra con un cambéu climáticu, sinón que se contradiz colo esperao para esti tipu d'eventos: a menor espaciu para migrar a climes más favorables, y a menor tamañu de les poblaciones insulares, y por tanto menor variedá xenética p'afaese a los cambeos, la probabilidá d'estinción de la especie ye enforma mayor. Nuna estinción provocada por un cambéu climáticu, los mamuts llanudos de la isla de Sant Paul y de la isla de Wrangel en Siberia tuvieron d'escastase primero que los continentales, y sicasí sobrevivieron 5000 y 8200 años más respeutivamente, coincidiendo en datación los últimos restos de mamuts lanudos colos primeros restos humanos conocíos nes islles.

• El segundu fechu carauterísticu y únicu de les estinciones masives del Cuaternariu, ye que les estinciones afecten de forma bien específica a la megafauna. Los mamuts llanudos yeren capaces de percorrer enormes distancies a lo llargo de la so vida, y entá ye más nel casu de les poblaciones norteamericanes y l'estremu oriente asiáticu (que seríen los más afeutaos pol cambéu de ciclu glacial d'alcuerdu a esta hipótesis), porque tolos grandes cordales americanos y del Estremu Oriente van de norte a sur y dexaben perfectamente la migración (esta ye la causa de que dellos xéneros de plantes que s'estinguieron n'Europa demientres los ciclos glaciales, colos sos cordales d'oeste a este torgándo-yos el pasu, sobrevivieren en Norteamérica y Asia oriental).

• Esta selectividá de tamañu ensin precedentes nel rexistru fósil contradiz la estinción del mamut llanudo por causes climátiques una y bones los estudios desenvueltos na última década revelaron que son les especies más pequeñes les más vulnerables y les que s'estinguen en mayor proporción so perturbaciones medioambientales provocaes pol clima.

• Un cambéu climáticu natural dura usualmente miles d'años y ye gradual, polo que difícilmente puede esplicar por sí solo la capacidá d'estinguir a por casu el 73% de les especies de megafauna de Norteamérica cuando tendríen tanto tiempu pa emigrar o afaese.

• Nel casu del mamut llanudu norteamericanu, compartía continente con otres cuatro especies de proboscídeos que s'estinguieron con él, el mamut colombín, el mastodonte y dos especies de gonfotéridos. Estes cinco especies cubríen nel so conxuntu un perampliu rangu de climes, polo que ye abegoso d'esplicar que toes elles s'estinguiesen al empar por un cambéu climáticu y que nenguna fuera capaz d'afaese al cambéu de clima.

• Hubo más de 30 ciclos glaciales a lo llargo del Pleistocenu con al menos la mesma intensidá que la del últimu ciclu, sicasí nengunu d'ellos presenta estinciones masives asociaes nin de proboscídeos nin de megafauna polo xeneral nel rexistru fósil.

• Los fósiles de mamuts llanudu amuesen nel periodu darréu anterior a la estinción una amenorgamientu drásticu na edá de maduror sexual, que nun se correspuende colo rexistrao n'estinciones debíes a factores ambientales, pero que sí ye carauterística de poblaciones de grandes mamíferos suxetos a una escesiva presión cinexética.

Asina l'únicu factor conocíu común a toes estes estinciones de mamuts llanudos a lo llargo de más de 8000 años aparentemente sería la irrupción gradiada del Homo sapiens nos sos distintos territorios. Basándose nestos datos, la hipótesis de la caza escesiva o hipótesis de les causes antrópiques atribúi la estinción del mamut llanudu a la depredación per parte de los humanos.

Esta idea foi propuesta primeramente por Paul S. Martin en 1967 cuando espunxo la so hipótesis basándose en qu'había una correllación temporal cada vegada más evidente ente la espansión del Homo sapiens pol planeta y los eventos d'estinción masiva qu'afectaben de forma casi esclusiva a la megafauna, daqué que nun asocediera nunca con anterioridá al eventu d'estinción del Cuaternariu.^[39] Les investigaciones a lo llargo del SXX y principios del XXI sobre esti asuntu variaron nes sos conclusiones, pero la hipótesis de la caza escesiva ta siendo defendida cada vez de forma más categórica por un creciente númberu de científicos, especialmente nesta última década, a midida que les investigaciones basaes en modelos matemáticos y analises comparativos de los xacimientos avancen, evidenciando la correlación ente la espansión del ser humanu modernu y los eventos d'estinción de megafauna.^[40]

Un artículu de 2002 concluyía que'l rexistru arqueolóxicu nun sofitaba la hipótesis de la sobrecaza, dao que de 76 sitios clovis esaminaos, 14 (12 con restos de mamuts y dos con restos de mastodonte) presentaben evidencies sólides de cacería de proboscídeos.^[41] A xuiciu de los autores esta proporción yera pequeña. La refutación de la supuesta rareza d'esti tipu de restos llamada nel so día "crítica de l'asociación" (Meltzer, 1986), espónla con detalle l'ecólogu Santos Fernández en 2016: el periodu de convivencia de mamuts y seres humanos, hasta que los mamuts s'estinguieron, constitúi una parte bien pequeña del ampliu rangu xeolóxicu en qu'apaecen los restos de mamuts. Dambes especies conviviríen alredor de venti sieglos n'América del Norte , pero nuna llocalidá concreta la convivencia foi muncho más corta entá. Poro, ye bien complicáu atopar restos arqueolóxicos que sían precisamente de les poques décades o sieglos en que los mamuts y los seres humanos coesistieron nuna llocalidá en concretu. En cualesquier otru casu, namái se van atopar mamuts ensin seres humanos (antes de la coesistencia) o humanos ensin mamuts (dempués de la coesistencia). El patrón esperáu ye qu'una fracción menor de sitios megafaunales (el 18% nel casu del estudiu de 2002), tendría restos arqueolóxicos con evidencies de cacería, y eso ye lo que s'atopa. Amás, refutando les conclusiones del artículu de 2002, un estudiu de 2008 sobre esos mesmos restos clovis aplicó modelos matemáticos pa ellaborar un analís comparativu y poder asina cuantificar qué suponía esi 18% de restos con evidencies de caza activa en comparanza con otros afayos en xacimientos de tol planeta. L'analís afayó que'l rexistru de los clovis amosaba de fechu que estos cazadores teníen la frecuencia más alta rexistrada hasta la fecha d'esplotación prehistórica de proboscídeos como fonte d'alimentu de tol mundu, xunto colos cazadores de la península ibérica, resultancies que reforzaben claramente la hipótesis de la sobrecaza como causa de la estinción de los mamuts y otros proboscídeos.

En Eurasia los restos que demuestren un usu intensivu del mamut como fonte d'alimentu son bien abondosos y dan una idea d'hasta qué puntu esti animal foi cazáu a gran escala. Hai más de 70 xacimientos a lo llargo y anchu de la llanura rusa, onde non yá s'atoparon cases individuales, sinón comunidaes enteres que se construyeron esencialmente con güesos de mamuts, onde esos güesos de mamuts fueron tamién usaos como combustible (y pare ello teníen que ser relativamente frescos), y onde hai enormes trampes escavaes nel permafrost, con restos de carne y restos óseos de mamuts .^[42]

El Homo sapiens yera capaz de matar exemplares adultos de megafauna utilizando llances y fleches, nel casu de los paleomaericanos inclusive se toparon nicios de qu'usaben puntes envelenaes, armes como les qu'utilicen entá güei los furtivos para ablayar grandes machos adultos d'elefante de sabana en Kenia.^[43][44] Una fema de mamut colombín foi topada nel Naco-Mammoth Kill Site en Arizona, xunto con ocho puntes clovis cerca del so craniu, omóplatu, costielles y otros güesos. Nos esperimentos modernos, los retruques de llances prehistóriques fueron perfectamente capaces d'enfusar les caxes toráciques d'elefantes africanos y amás reusarse, causando'l so usu repitíu escasa gastadura o dañu a les puntes. Per otra parte los mamíferos grandes son xeneralmente muncho más vulnerables que los pequeños a una caza escesiva por cuenta de les sos baxes tases de reproducción. Arriendes d'ello, en 2009 Surovell atopó evidencia de que los mamuts sufrieron un llargu procesu de progresivu enrarecimiento hasta la estinción, correlacionado col aumentu de les densidaes humanes.^[45]

A too esto habría qu'añader que les especies qu'habitaben la rexón holártica non coevolucionaron col home modernu, polo que ye bastante posible que presentaren inxenuidá ecolóxica (o inxenuidá insular) ante l'acabante llegar Homo sapiens procedente d'África, entá más marcada probablemente nes poblaciones americanes, que nun tuvieren contautu con nenguna especie d'homínidu. La inxenuidá ecolóxica consiste na ausencia d'una respuesta defensiva (fuxida o ataque) ante depredadores desconocíos. Ye la que presenten ensame d'especies insulares o la fauna del continente antárticu, onde los animales son incapaces de reconocer al home como potencial depredador, pero sí desenvolvieron un fuerte instintu defensivu ante el so depredadores naturales (como los pingüinos antárticos frente a la foca lleopardu, el so principal predador).

Esta posibilidá vese reforzada pol fechu de que n'Estaos Xuníos hai más allugamientos de descuartizamiento de proboscídeos que d'elefantes en toa África, una masa de tierra que ye enforma mayor qu'Estaos Xuníos. Non yá ye destacable el fechu de qu'África ye muncho más grande qu'EEXX, sinón que la so presencia d'homínidos remóntase siquier 100 vegaes más tras que'l ralu cronoestratográfico de presencia humana n'América del Norte. Sicasí, n'África hai menos d'una docena de sitios de descuartizamiento probables, que tomen un rangu de tiempu de coexisntencia bien de más ampliu, dende'l Plio-Pleistocenu hasta l'actualidá. Esta diferencia tan evidente ente la bayura de sitios de descuartizamiento n'África y EEXX paez indicar que l'elefante africanu, al haber coevolucionado col nuesu xéneru y otros homínidos anteriores mientres millones d'años, desenvolvió respuestes bien eficientes énte la nuesa presencia (comportamientu evasivu y respuesta agresiva si ye necesaria), que-y convirtieron nuna presa muncho más difícil que los proboscídeos holárticos.

La mayoría d'especies estintes conócense por mediu de restos fosilizaos o güesos calteníos en circunstancies particulares. Nel casu del mamut llanudu, atopáronse amás restos conxelaos, por cuenta de la persistencia por milenios de climes con temperatures bien baxes y glaciares o árees conxelaes y amás, al gran tamañu de los especímenes. Anque los casos de conxelamientu de cuerpos fueren inusuales, asocedieron mientres miles d'años. Pa qu'un eventu d'esti tipu se presentara, riquíase que l'animal quedara atrapáu o sapozáu rápido nun líquidu xelao, comúnmente l'agua o en semi-sólidos tales como fango o maratana, que dende entós se conxelaron. Los restos asina calteníos dexaron estudiar la piel, pelo, músculos y ensame de texíos y órganos del animal.

Estos mamuts pudieron quedar atrapaos en banzaos, llamargues o sables moventibles. Dalgunos pudieron morrer d'inanición en quedando atrapaos, pero la evidencia del alimentu indixeríu poco primero de morrer y qu'entá s'atopa nos sos estómagos ya inclusive de grana nes boques de dellos de los especímenes, suxer que nin la fame nin la esposición paez causes probables de la so muerte. Los animales pudieron cayer al quebrase dalgún cachu de xelu sobro una pequeñu fontán o furacu o pudieron ser abasnaos per inundaciones. Asina, nun paraxe cercanu al ríu Berelekh en Yakutia, atopáronse más de 9.000 güesos de siquier 156 mamuts concentraos nun solu puntu, al paecer conducíos pola corriente d'un hinchente.

Al primer mamut conxeláu documentáu pola ciencia, atopáu en 1806, conozse como'l Mamut d'Adams, pol apellíu del botánicu Mikhail Adams, que supo de la so esistencia cuando s'atopaba en Yakutsk. Él identificó los restos y fixo la so descripción científica. Créese que primeramente al so descubrimientu, los afayos fueren mordíos por llobos en dómines bien posteriores al so conxelamientu.^[46]

En 1977, foi atopada perbién caltenida, el cuerpu d'un mamut llanudu, de 7 a 8 meses d'edá, al que se-y dio'l nome de Dima. Esti afayu alcontróse nel permafrost sobro un afluente del Ríu Kolyma nel nordeste de Siberia. El pequeñu exemplar tuvo de pesar aproximao 100 kg y midir 104 cm altor y 115 cm de llargor. La datación de radiocarbono determinó que vivió fai 40.000 años. Los sos muérganos internos son similares a los de los elefantes actuales, anque les sos oreyes tienen apenes la décima parte del tamañu de les d'un elefante africanu de la mesma edá.

Nel branu de 1997, una familia Dolgan d'apellíu Jarkov, afayó una parte d'un canil igante de mamut que sobresalía del suelu de la tundra na Península de Taimir, en Siberia. Ente setiembre y ochobre de 1999, un cuerpu de mamut de 20.380 años d'edá y el sedimentu circundante estrayóse d'esi llugar y fueron tresportaos per vía aérea hasta una cueva xelada en Khatanga, Taimiria. N'ochobre de 2000, realizáronse cuidadoses operaciones con secadores de pelo pa caltener los texíos, la piel y el pelo del animal, intactos.^[47][48]

Demientres l'añu 2002, una espedición rusa, dirixida por Vladimir Repin (direutor del Centru de Viroloxía y Bioteunoloxía de Novosibirsk) y Piotr Lazariev (direutor del Muséu del Mamut en Yakutia), atopó conxelaes dos estremidaes de mamuts lanudo (una trasera y una delantrera) en perfectu estáu de caltenimientu xunto al llechu xeláu d'un ríu, cerca de Yakutsk, Siberia.^[49]

En 2003, en Yukagir, Yakutia, unos cazadores atoparon conxeláu un mamut machu adultu, d'unos 40 a 50 años d'edá nel momentu de la so muerte, 2,8 m d'altor y más de 4 tonelaes de pesu, que data de fai 18.000 años.^[50][51]

En 2004, los restos conxelaos d'otru cachorru de mamut llanudu fueron afayaos polos obreros d'una mina d'oru en Ust-Nero, Yakutia. la cabeza, la trompa, parte del llombu y dellos texíos fueron llevaos a una cueva xelada en Yakutsk y hasta una instalación especial en Tokiu, pal so estudiu detalláu.^[52]

En mayu de 2007, el pastor de renos Yuri Khudi atopó en Yamalo-Nénets, Siberia, otra cría de mamut conxelada, una fema de 3 a 4 meses d'edá, que vivió fai 37.000 años a la que se-y dio'l nome de Lyuba, n'honor de la esposa del so descubridor.^[53][54] El cuerpu del ñácaru mamut caltién los güeyos y la trompa intactos; "los sos muérganos internos tán toos calteníos, el corazón tien distinguíos tolos sos ventrículos, según el fégadu y les venes", declaró Alexei Tikhonov, del Institutu rusu de Ciencies Zoolóxiques.^[55] Según los científicos ye l'exemplar meyor calteníu de tolos topaos hasta la fecha.

La posibilidá de revivir la especie por aciu la clonación (en femes d'elefante asiáticu), podría tar más cerca acaldía a midida que s'avanza na capacidá pa clonar distintes especies. Los paleobiólogos, entá los más escépticos, creen probable agora la renacencia" del mamut llanudu. Los científicos seique podríen superar les torgues gracies a los especímenes apocayá atopaos, a posteriores afayos y a les nueves meyores teunolóxiques nel estudiu del ADN.N'avientu de 2008 científicos descifraron la primer secuencia del xenoma del mamut llanudu.

Plantéguense dos posibilidaes: recuperar el xenoma orixinal d'exemplares bien calteníos, a día de güei la más complicada cola teunoloxía actual, o inxertar xenes de mamuts llanudu nel xenoma d'elefante indiu pa reproducir delles de les sos carauterístiques (grasa subcutáneo, hemoglobina afecha al fríu, pelame trupa, oreyes pequeñes, etc.). Plantegáronse de cutiu duldes étiques o morales sobre la posibilidá de devolver esta especie a la vida, pero a midida qu' aumenten les evidencies del papel que pudo xugar el Homo sapiens na so estinción, son más les voces especializaes que defenden la necesidá de recuperar al mamut y otra megafauna estinguida nel Cuaternariu. Yá que la estinción de la megafauna tuvo consecuencies nefastes pa la diversidá de los ecosistemes terrestres de la mayor parte del planeta, trayer a esta y otres especies de vuelta a la vida podría tener un efeutu beneficiosu nos biomes onde güei tán ausentes.^[56]

• Wikimedia Commons acueye conteníu multimedia sobre Mammuthus primigenius .