Christian Wilhelm Allers

Allers nació nuna familia de mercaderes. Empezó a trabayar como litógrafo na so ciudá natal, pero en 1877 treslladóse a Karlsruhe. Na Kunstakademie (Academia de Belles Artes) estudió col Prof. Ferdinand Keller.

De 1880 a 1881 foi movilizáu pa la Marina Alemana, en Kiel, onde Anton von Werner foi'l so patrón. Ellí conoció a Klaus Groth, quien se fixo'l so amigu.

Allers fíxose conocíu cola publicación d'una coleición de grabaos denominada Club Eintracht, en 1888. Dellos llibros y coleiciones de grabaos siguiéronlu, por casu, unu sobre Bismarck. L'ésitu financieru cola publicación de la so obra dexó-y, na década de 1890, construyir una villa en Capri, Italia. Ende vivió mientres munchos años, retornando dacuando a Hamburgu y Karlsruhe, y viaxando per tol mundu.

Na seronda de 1902 viose envolubráu nun escándalu. El so amigu Friedrich Alfred Krupp, otru famosu y ricu residente alemán de Capri, foi acusáu por periódicos italianos de homosexual y pederasta. Delles selmanes más tarde, Allers, que «tenía claros enclinos homosexuales y gustába-y d'arrodiase de rapazos, que frecuentemente usaba como modelos»,^[5] foi tamién acusáu, pero ante'l xuez. Krupp morrió pocu dempués. Allers escapó antes de ser xulgáu; fuera condergáu in absentia a 4 años y mediu de prisión.

Allers dexó Capri y viaxó pel mundu mientres más de 10 años, permaneciendo dalgún tiempu en Nueva Zelanda, en Samoa y n'Australia. Nesi periodu usó frecuentemente'l seudónimu «W. Andresen», y ganó dineru pintando semeyes de persones fanegueres.

Morrió en 1915 en Karlsruhe, dellos meses tres el so regresu a Alemaña.

Allers foi un pintor naturalista, que los sos dibuxos yeren ricos en detalles realistes; tantu, que munches vegaes carecíen faltos de calor y emoción. Anque realista, Allers a les veces añadía persones que nun taben presentes nos llugares que pintaba.

Usaba frecuentemente'l llapiceru nos sos dibuxos y les obres coloriaes yeren orixinalmente dibuxos a llápiz, coloriaos depués al oleu o con pastel. Les sos principales temes yeren escenes del día ente día (el Club Eintracht, el Spreeathener o en Hochzeitsreise), viaxes (La Bella Napoli, Rund um die Welt, Unter deutscher Flagge) y semeyes.