Saldón

Lo toponimo Saldón ye interpretau por Agustín Ventura Conejero como derivau de SALICETUM ("sargueral") con sufixo -ONEM igual como los toponimos de la serie Salcedón^[1].

Manimenos, en las comarcas churras bi ha un microtoponimo El Saldón que s'interpreta a partir de lo latín SABULŌNE,^[2] igual como lo catalán occidental sauló u sabló (arena de meteorización).

Entre los microtoponimos mes interesants de Saldón se troba El Zarinche^[3], (una fuent viella en la mesma plaza con un abrebador), balsa el royo, Canalón Tallar, Suerte el Tallar, Suerte la Mocheta, Calarizo, Calera, Canyo Tio Isidro, Cinajuelo, Las Clafizas, Clocha, Clocha de las Navas, Clochas del Perol, Clochas Eugenio, Solana Coscullo, Gandaya, Refrontón, Refontones, Trascabezo, Travesadas, Los vagos y Los Villares.

Saldón ye situau a piet d'un sinclinal pendiu conoixiu como "El Cabezo", que fa part de las muelas de los Monts Universals. Buena part de lo suyo termin municipal ye en la paramera de Saldón, que tiene los suyos cabos en lo rodenal de la Sierra de Penya Redonda y en las foces fluvio-karsticas de la Fuent d'el Berro^[4]. Los tarabinars d'esta paramera son protechius adintro de la LIC (puesto d'importancia comunitaria) "Sabinars de Saldón y Val de Cuenca"^[5].

Lo termin municipal de Saldón no muga que con Albarracín; por lo sud ye repitiau por una estreita francha u manga de lo termin d'Albarracín que lo desparte de lo termin de Val de Cuenca, por l'ueste una menos estreita francha de terreno d'Albarracín lo desparte de Terrient y Royuela, por l'este un apéndiz d'Albarracín lo desparte de Bezas.

Saldón estió una aldeya de la Sexma de Chabaloyas adintro de la Comunidat d'aldeyas d'Albarracín. Fació part tamién de la Sobrecollida de Teruel por lo menos dende 1446 dica 1495, y de la Vereda de Teruel en lo sieglo XVII. En 1785 prenió la categoría de "lugar"^[6].

• Ilesia de l'Asumpción, sieglo XVI.

• Corpus Cristi.