Dolores Serrat Moré

Dolores Serrat naixió de Ripoll, provincia de Chirona, o 3 d'aviento de 1955.^{[1][2][3][4][5]} En 1973 Dolores Serrat prencipió os suyos estudios de medicina en a Universidat de Zaragoza en o campus de Uesca y los remató en 1979 en o de Zaragoza. Ye doctora en medicina, especialista en psiquiatría y en medicina legal y forense. En 2002 prencipió os suyos estudios de dreito en a facultat de dreito d'a universidat de Zaragoza y se licenció en 2007.

Ye casada y tien tres fillos.

Dolores Serrat ha desarrollau toda a suya actividat universitaria y profesional^[6] en Aragón. En 1983 prencipió como profesora interina de medicina legal y toxicolochía d'a facultat de medicina d'a Universidat de Zaragoza, y dende 1986 como profesora permanent. Obtenió plaza de medico forense por oposición, con destino en Chaca, a on estió entre 1985 y 1986.

En l'ambito d'as responsabilidaz universitarias ha ocupau os cargos de secretaria (1992-1994), vicedegana d'ordenación academica (1994-1997) y degana (1997-2003) d'a facultad de medicina d'a Universidat de Zaragoza.^[7] Ha estau presidenta d'a Conferencia Nacional de Degans de Medicina (2002-2003).^[8] Ha estau vocal d'a Comisión Central de Deontolochía y Visau Medico d'a Organización Medica Colechial (2002-2007), y vicepresidenta d'a Comisión Deontolochica d'o Colechio Oficial de Medicos de Zaragoza (1997-2007).^[9][10]

Miembro d'o Partido Popular de Aragón dende 2003, ha ocupau a Vicesecretaría d'Estudios y Programas.^[11] En 2008, dimpués d'a celebración d'o XIV Congreso Rechional d'o Partido Popular de Aragón, o PP sustituyó a Domingo Buesa en o cargo de portavoz d'o grupo municipal d'o PP en o Concello de Zaragoza, puesto que pasó a ocupar Dolores Serrat,^[12] y en o que más tardi la succedió Eloy Suárez.^[13]

Un día dimpués de que Luisa Fernanda Rudi prenese posesión como presidenta d'o Gobierno de Aragón, o 14 de chunio de 2011, dio a conoixer qui serían os suyos consellers en o nuevo Gubierno. Dolores Serrat^[14] estió a unica muller d'os nueu miembros que formaban o executivo compuesto por o Partido Popular de Aragón, en coalición con o PAR. Mientres ixa lechislatura ocupó o cargo de Consellera d'Educación, Universidat, Cultura y Esporte^[15][16] d'o Gubierno d'Aragón.^[17]

Dolores Serrat se veyió embrecada mientres o suyo cargo como consellera d'Educación, Universidat, Cultura y Esporte en a polemica sobre a denominación d'o catalán en Aragón como luenga aragonesa propia de l'aria oriental, conoixida con l'acronimo «lapao», con l'aprebación d'a Lei de Luengas d'Aragón de l'anyo 2013^{[18][19][20][5][21][4]} y a reforma d'o sistema educativo con a nueva lei LOMCE.^[22][23]

Pa muitos medios de prensa espanyols, Dolores Serrat Moré ye a creyadora u una d'as mayors impulsoras d'ista lei,^[5][24] si bien o suyo papel no ye guaire claro, pues l'unico seguro ye que ella estió qui presentó o prochecto en as Corz d'Aragón.^[25] Un atra d'as controversias ye o nombre de dita lei, ya que ella mesma lo achaquió a la oposición que, seguntes ella, «creyó uns acronimos ficticios».^[26][27][28]

En l'ambito politico ha estau criticada por a privatización y infradotación d'a educación publica, por lo que cuantas personas facioron protestas pacificas en o edificio d'o suyo domicilio.^[29] Amás, dende as asociaciones de vecins como la d'Arcosur, se criticó que no fese un colechio en o centro d'o suyo barrio a on todas as personas lo demandaban y que amás contaba con una financiación privada y gratuita pa o Gubierno d'Aragón de cuantos millons d'euros. En cuentas d'ixo, decidió construyir o colechio en un cabo aleixau d'o barrio a on no daba servicio efectivo y que costó a las arcas publicas muito mas diners. Nunca no fació declaracions publicas sobre iste tema y se desconoixen os motivos de que trigase ixa ubicación. Por ello, dende a-saber-as asociacions le'n criticó ya que en un cargo publico no esfendeba as competencias propias d'a educación ni de prener decisions que estasen menos costosas pa as arcas publicas. También se criticoron as suyas acusacions falsas contra os colectivos que esfendioron a educación publica.^[30]

Asinas mesmo, le'n ha criticau emplegar o suyo puesto de treballo para favoreixer profesionalment a la suya familia. En concreto un d'os suyos fillos fue eslechiu como "asesor" por o consellero d'Economía d'o Gubierno d'Aragón, tamién d'o Partido Popular. O suyo nombramiento fue publicau en o Boletín Oficial d'Aragón, y en destapar-se a relación familiar lo destituyoron como asesor.^[31] Igualment, tamién fue criticada porque dimpués de refirmar a Universidat Sant Chorche pa que implantase Dreito como títol, o fillo de Dolores Serrat remató impartindo clases en dito centro, cuan no teneba ni o perfil academico ni experiencia universitaria previa. Ye por ello que se especuló con que Dolores Serrat heba emplegau o suyo puesto pa promocionar-se instrumentalizando as institucions dende o suyo cargo publico.^[32]