Brinzón
 | Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
- Iste articlo tracta sobre o erizón u arizón que ye una planta punchuda. Ta veyer altros usos d'o termín, se veiga Erizón (desambigación).
En Aragón, se conoix con o nombre chenerico de brinzons, abrizons, erizons u alberizons a un conchunto d'especies diferents de matas con port arbustivo que perteneixen a la familia Fabaceae y tienen per caracteristica comuna a suya gran densidat y ramificación, con brancas curtas y muit punchudas que les dan un aspecto caracteristico de «bola» u «coixín» atipido a la mata. En o caso d'especies como Echinospartum horridum, se'n suele trobar en l'alta montanya, a partir d'os 1000-1200 metros, enradigaus en terrenos deficils, en as penyas y dica en as tarteras, en do resisten a persistencia d'a nieu mas meses que no altras especies de Fabaceae, anque difuera d'o Pireneu la denominación tamién s'aplica a belaltras especies que se i troban con mas frecuencia en ixes territorios, como bellas especies d'o chenero Genista que guardan una forma cacha.
Os brinzons pueden tener fuellas ocasionalment, que son muit menudas y coriacias, anque la mayoría d'eixemplars no en tienen. Igual como as suyas parients as aliagas y as chinestras, floreixen de forma copiosa en primavera, con flors caracteristicament labiadas, de regular amariellas. Reciben ista denominación popular bellas especies que perteneixen a cheneros diferents, como Echinospartum horridum u Genista pumila.
Nombre
O nombre popular que s'emplega ta designar istas plantas varía cuantiosament en pendendo d'os puntos cheograficos en os que se rechistra, u dica con as familias u personas individuals que el digan, pasando que a sobén una mesma persona gosa emplegar una, dos u dica tres variants d'a parola sin sisquiera pensar-ie. Cuasi todas as variants pareix que derivan d'una forma refirmada en a estructura punchuda y arronchada d'as matas d'istes vechetals, talment dimanando de formas relacionadas con o «erinzón» (d'o latín «erinaceus») u «erizón» (d'o latín «ericĭus»). En connexión con tot isto, as formas mas arcaicas podrían estar as que tienen a forma «erinzón», d'as que dimpués s'habrían dido formando ixas altras, como «brinzón» (documentada en a val de Vió,[1] en a val de Broto,[1] en a val de Tella[1] y que tamién s'emplega en Puértolas, en Sobrarbe) y dende ista «abrinzón», con ganancia d'una A popular, que s'ha puesto documentar en a val de Chistau.[1] A forma «abrizón», que pierde a N, s'ha documentau tamién en a val de Chistau.
A denominación «erizón», con a suya variant vocalica «arizón», se documentan en a Chacetania (Chaca,[1] Puent d'a Reina,[1] Fago[1]) y en l'Alto Galligo (Borrés[1]), pero tamién en o Semontano de Balbastro (Salas Altas,[1] Radiquero,[1] Alquezra[1]) y en a part meridional de Sobrarbe (Sasa de Surta,[1] en o Viello Sobrarbe, y Boltanya[1] en a val de l'Ara). A forma «alizón» se documenta en Nocito[1] (Plana de Uesca) y en Oliván[1] (Alto Galligo), pero tamién en Fanlo[1] y en Yeba[1] en a val de Vió (Sobrarbe), en Oto,[1] Torla[1] y Broto[1] en a val de Broto, en as que tamién se i diz indisticntament «brinzón/abrinzón».
A forma «alberizo» ye minoritaria y se'n da treslau d'haber-la sentido en Fosau,[1] en A Fueva, pero en ixa subcomarca de Sobrarbe i ye mas frecuent a forma «alberizón»,[1] que como en altros casos coexiste con as formas «abrinzón» y «brinzón» que se dicen en altros puntos d'a comarca.
Imáchens
Genista germanica
Echinospartum horridum
Ulex parviflorus
Genista pumila
Aspecto tipico d'un abrinzonal mixto, en alta montanya
Ulex gallii
Abrinzonal
Eixemplar viello d'Echinospartum horridum
Echinospartum horridum - Museum specimen
Referencias
Datos: Q3026723
Multimedia: Echinospartum horridum / Q3026723
Especies: Echinospartum horridum
