Acné

L' acné (d'o griego ἄχνη^[1]) ye una afección d'a piel a luengo plazo que ocurre cuan as celulas muertas d'a piel y la graixa d'a piel obstruyen os foliculos pilosos.^[2] As caracteristicas tipicas de l'afección incluyen puntos negros u blancos, piel graixa y posibles cicatrizas. Afecta sobretot a la piel con una cantidat relativament alta de glandulas sebacias, incluyida la cara, a parti superior d'o tórax y l'esquena. L'apariencia resultant puede provocar manca de confianza, angluzia, reducción de l'autoestima y, en casos extremos, depresión u pensamientos suicidas.^[3]

A susceptibilidat a l'acné ye sobretot chenetica en l'80 % d'os casos. Os rols d'a dieta y lo tabaquismo en a condición no son claros, y ni l'escoscamiento ni l'exposición a la luz solar pareixen chugar un paper. En toz dos sexos, as hormonas clamadas androchens pareixen estar parti d'o mecanismo subchacent, en causar una mayor producción de sebo. Unatro factor común ye lo creiximiento excesivo d'a bacteria Cutibacterium acnes, que ye present en a piel.^[4]

I hai tractamientos disponibles pa l'acné, incluyius cambeos en l'estilo de vida, medecinas y procedimientos medicos. Minchar menos carbohidratos simples como lo zucre puede minimizar l'afección. Os tractamientos que s'aplican dreitament sobre la piel afectada, como l'acido azelaico, o peroxido de benzoílo y l'acido salicilico, se fan servir comunament. Os antibioticos y los retinoides son disponibles en formulacions que s'aplican sobre la piel y se prenen per vía oral pa lo tractamiento de l'acné. Manimenos, se puede desembolicar resistencia a los antibioticos como resultau d'a terapia con antibioticos. Cuantos tipos de pindolas anticonceptivas aduyan a aprevenir l'acné en as mullers. Os profesionals medicos per un regular reservan as pindolas d'isotretinoína pa l'acné severo, a resultas d'os mayors efectos secundarios potencials. Beluns miembros d'a comunidat medica recomiendan o tractamiento temprano y agresivo de l'acné pa disminuyir l'impacto cheneral a luengo plazo en as personas.^[5]

En 2015, l'acné afectó l'arredol de 633 millons de personas en tot o mundo, lo que a converte en a uitena malotía mas común en tot o mundo.^[6] L'acné ocurre comunament en l'adolescencia y afecta aproximadament a lo 80-90 % d'os mocets en o mundo occidental. Cualques sociedaz rurals informan taxas mas baixas d'acné que as industrializadas. Os ninos y adultos tamién pueden veyer-se afectaus antis y dimpués d'a pubertat. Encara que l'acné se torna menos común en a edat adulta, persiste en cuasi a metat d'as personas afectadas dica os 20 y os 30 anyos, y un grupo mas chicot contina tenendo dificultaz a los 40 anyos.