Yves Hemedinger
Dr Yves Hemedinger (* 23. Oktoower 1965 z’ Kolmer, Owerelsàss) ìsch a frànzeescher Politiker vu dr Pàrtäi Les Républicains (LR). Ar ìsch vu 2010 bis 2015 Elsassischer Regionààlroot gsìì un ìsch ànna 2015 Mìtglììd ìm owerelsassischa Départementsroot worra. Üsserdam ìsch’r vu 2020 bis 2022 Àbgoordnet’r ìn dr frànzeescha Nàzionààlversàmmlung gsìì.
| Dialäkt: Mìlhüüserdiitsch |
sii Laawa un Kàrriar
Dr Yves Hemedinger ìsch ànna 1965 z’ Kolmer uff d’ Walt kumma. Ar schtàmmt vun’ra Vììhhandler-Fàmìlia-n-üss Màrkelsa.[1] Z’ Kolmer ìsch’r Schialer àn dr Victor-Hugo-Sekundààrschüal un d’rnooh àm Bartholdi-Gümnààsium gsìì. Ànna 1990 hàt’r a Maischterpriafung vum Unternammaracht àn dr Robert-Schuman-Üniwärsiteet vu Schtroossburi bschtànda. Vu 1993 bis 2012 hàt’r ìn dr Pàpiirìndüschtrii gschàfft. Schuu mìt 16 Joohra ìsch dr Hemedinger Wàhlkampfer fìr d’ Rachtspàrtäi Rassemblement pour la République (RPR) gsìì.[1]
Vu 1995 bis 2001 ìsch dr Hemedinger Gmaindaroot vu Kolmer worra. Vu 2001 bis 2008 ìsch’r drìtter biigoordneter Bìrgermaischter vu dr Schtàdt gsìì. Vu 2008 bis 2020 ìsch’r äärschter Biigoordneter vum Bìrgermaischter Gilbert Meyer — àn dara Schtälla-n-ìsch’r veràntwortlig fìr Schtàdtäntwìcklungsprojakter, Kommünikàzioon un Sìcherhait gsìì. Ar hàt làng wälla Kàndidààt àn dr Gmaindawàhl vu 2020 wälla sìì, àwwer ar hàt sìch schliasslig nìt uffgschtällt.[2]
Vu 2010 bis 2015 ìsch dr Yves Hemedinger Elsassischer Regionààlroot gsìì. Zamma mìt’m Bernard Stalter ìsch’r veràntwortlig fìr Hàndwark gsìì. Ànna 2015 ìsch’r ìm Kàntoon Kolmer-1 àls owerlelsassischer Départementsroot gwählt worra.[3] Noh dr Grìndung vu dr Öiropäischa Gebiatskärwerschàft Elsàss ànna 2021 ìsch’r Elsassischer Root worra. Ìm Elsassischa Root ìsch’r Delegiart’r fìr d’ Umschtällung vum Gebiat vum ehamààliga-n-Àtoomkràftwark Fassena gsìì. Ar ìsch àui Vertratter vu dr Öiropäischa Gebiatskärwerschàft Elsàss biim Verain France Hydrogène gsìì.[4]
Bii’ma Nochwàhl ìm 1. Wàhlkrais vum Owerelsàss àm 27. Septamber 2020 ìsch dr Hemedinger àls Àbgoordneter ìn d’ Nàzionààlversàmmlung gwählt worra — doo hàt’r 63,67 Prozant vu da Schtìmma bikumma.[5][6][7] Siina Schtällvertrattera-n-ìsch d’ Christelle Lehry, Regionààlräätin un biigoordneta Bìrgermaischtera vu Munzana. Dr Hemedinger hàt sìch dr Fràkzioon Les Républicains ààgschlossa[8] un ìsch Mìtglììd ìm Üssschuss fìr d’ wìrtschàftliga-n-Ààglaagahaita worra. Üsserdam ìsch’r Mìtglììd vu dr frànzeescha Delegàzioon àn dr Pàrlamäntààrischa Versàmmlung vum Öiropàroot gsìì.
Àn dr Pàrlamantswàhl vu 2022 hàt sìch dr Hemedinger uffgschtällt. Ar ìsch vu da Fràkzioona Les Républicains, UDI un Nouveau Centre so wia vum Verain Mouvement pour l’Alsace unterschtìtzt worra.[9] Ar hàt 49,79 Prozant vu da Schtìmma bikumma un ìsch vu dr Brigitte Klinkert (LREM/Ensemble) gschlààga worra.[10] Dr Hemedinger hàt biim Verfàssungsroot a Iischpruch geega s’ Wàhlärgabniss ghàlta; dr Verfàssungsroot hàt dr Iischpruch üssgwììsa.[11]
Weblìnks
- dr Yves Hemedinger uff LesBiographies.com (frànzeesch)
- dr Yves Hemedinger ìn dr Àbgoordneta-Dàtabànk vu dr Nàzionààlversàmmlung (frànzeesch)
- dr Yves Hemedinger bii NosDéputés.fr (frànzeesch)
- dr Yves Hemedinger bii dr Pàrlamäntààrischa Versàmmlung vum Öiropàroot (frànzeesch, anglisch)
Ainzelnoohwiisa
 | Dä Artikel basiert uff ere fräie Übersetzig vu dere Version vum Artikel „Yves_Hemedinger“ vu de französische Wikipedia. E Liste vu de Autore un Versione isch do z finde. |