Us der alemannische Wikipedia, der freie Dialäkt-Enzyklopedy
S AG im Lemma isch s offiziell Chürzel vom Kanton Aargau und wird bruucht, zum Verwächslige mit Yträäg vom Name Habsburg vermyde, wo öppis anders meined.
De Gmeindsbann het e Flächi vo 223 Hektare, dodervo sind 134 Hektare Wald und 18 Hektare überbaut. Di höchschti Stell isch uf 505 Meter, di tüfschti uf 370 m ü. M..
S erschti Mol taucht Habesburch in ere Urkund us em Johr 1027 uf. Gmeint isch dodermit d Burg uf em Wlpelsbärg. Unden a dere isch s Dorf öppe im 15. Johrhundert entschtande. S Dorf het im Middelalter zum Eigeamt vo de Habsburger ghört und isch en Teil vo ihrem ältischte Bsitz gsi.
Im Johr 1415 hei d Bärner de Aargau eroberet und s Dorf isch en Teil vom Bärner Underaargau worde. D Reformation isch, wi überall im Bärnbiet, im 1528i iigführt worde.
Im März 1798 sin d Franzose in d Schwiiz iimarschiirt u-n-hei di Helvetisch Republik usgruefe. Habsburg ghört sither zum Kanton Aargau.