Dieter Thoma (Skispringer)

Dr Thoma isch an dr Skilift ufgwagse, wu syy Vater Franz Thoma z Hinterzarte böue het. Dr Dieter Thoma isch nit dr erscht erfolgryych Skispringer in syre Familie gsi: Syy Unkel Georg Thoma isch in dr 1960er Johr Wältmeischter un Olympiasiger in dr Nordische Kombination gsi.

As 16-jehrige het er zem erschte Mol dr dytsch Meischtertitel gwunne un isch au Juniorewältmeischter wore. Syyni erschte Wältcuppinkt het er am 1. Jänner 1986 z Garmisch-Partenkirche mit eme elfte Platz gholt.

Im Alter vu 19 Johr het dr Thoma syy erschte Wältcup gwunne z Thunder Bay/Kanada. Zwei Johr speter (1990) het er as erschte Weschtdytsche 30 Johr noch em Max Bolkart bi dr prestischträchtige Vierschanzeturnee triumfiert un isch am Änd vu dr Saison au no Skiflug-Wältmeischter im norwegische Vikersund wore. Derno het sich dr Thoma in dr Wältspitze etabliert un isch im Gsamtwältcup in dr Saison 1996/97 uf dr zwet Platz chuu.

Vor dr Saison 1993/1994 het dr Dieter Thoma syy Tächnik umgstellt vum in dr Zwaischezyt iberholte Parallel- uf dr V-Stil un het bi dr Olympische Winterspil 1994 z Lillehammer mit dr dytsche Mannschaft d Goldmedallie im Mannschaftswettbewärb gwunne, derzue uf dr Normalschanze Bronze. Insgsamt het dr Thoma 13 Medallie bi Wältmeischterschaften un Olympische Spil gwunne.

Noch dr Saison 1998/99, wun ere mit dr dytsche Mannschaft d WM-Goldmedallie gwunne gha het, isch dr Dieter Thoma vum Leischtigssport zruckdrätte wäge vile Verletzige un starke Schmärze. Insgsamt acht Chnyyoperatione, zwo komplizierti Oberschänkeloperatione, ei Armbruch un e baar Hiirnerschitterige sin dr Hintergrund gsi.

Am Silvesteroobe 1999/2000 het dr Dieter Thoma syy Laufbahn as Skispringer ändgiltig ufghert gnau um Mitternacht mit em sognännte „Johrdöusertgump“ vu dr Schanze z Garmisch-Partenkirchen.

Wu sich dr privat Färnsehsänder RTL am Aafang vum neje Johrdöusert d Iberdragigsrächt an uusgwehlte Springe gsicheret het, isch dr Thoma as Expärt engagiert wore. Langi Johr het er zämme mit em Günther Jauch d RTL-Skisprungiberdragige moderiert. Mit em Jauch isch er au zweimol fir dr Dytsch Färnsehbryys nominiert gsi. Fir syy Arbet as Expärt het dr Thoma mit dr Guldene Victoria un em Bayrische Färnsehbryys zwe Mediebryys gwunne. Wu sich RTL im Summer 2007 vu dr Iberdragig vu wytere Springe zruckzoge het, isch dr Thoma am Aafang vu dr Saison 2007/2008 as Expärt fir d Skisprung-Iberdragige zue dr ARD gwägslet.

Unter anderem het dr Thoma an verschide Projäkt gschafft (Golf/Skispringe) un är git syy Wisse us 15 Johr Hochleischtigssport un ere johrelange (syt 2000) Färnsehmoderation as Referänt wyter bi Seminare/Incentives/Tagige/Sportlehrgäng unter em Motto: „Wär mit eire Hand an dr Vergangeheit hebt, het nume eini frej fir d Zuechumpft“.

Mit syre Ex-Frau Manuela Thoma-Adofo het dr Thoma zwei Chinder, e Suhn un e Dochter. Mit syre Fryndin Mandana Daub het er e Dochter.

• Dieter Thoma (Skispringer) in dr Datebank vum Internationale Skiverband FIS (änglisch)
• Dieter Thoma uf dr Homepage vum Skiclub Hinterzarte
• Dieter Thoma in dr Datebank vu Sports-Reference.com (änglisch)

Dä Artikel basiert uff ere fräie Übersetzig vum Artikel „Dieter_Thoma_(Skispringer)“ vu de dütsche Wikipedia. E Liste vu de Autore un Versione isch do z finde.