George
De George (sin Name wird englisch; Tschortsch usgsproche) isch en Schwizer Mundartsänger us em Bärner Seeland.
Em George sin richtige Name isch Andreas Schwab und er hät Johrgang 1969.[1] Er isch zäme mit drü Gschwüschterte z Chaunech ufeme Buurehof ufgwachse und hät Landschaftsgärtner glärnt.[2] Er wohnt mit sinere Fründin z Sisele.[3]
Musikalischi Kariere
De George Schwab hät vo 1994 bis 1999 bi dä Bänd Stolen Tunes mitgmacht. Im 1999 hät er e aigni Bänd gründet, d George & Hardcore Troubadours. Bis 2002 hänt d Zämesetzig vo dä Bänd öpe gwächslet. 2003 händs de Name uf Georgeband kürzt, di ersti CD «Eifachs Spiel?» usägeh und als Vorgruppeä vo Plüsch, Florian Ast, usw. uufträte. Noch däm, das im 2006 di zwaiti CD «Adrenalin» usecho isch, hät de George ime Interwju zu mundart-rock.ch gsait: In erster Line wollten wir eigene Songs schreiben und für mich war es wichtig in meiner Muttersprache zu singen und texten. Denn nur so schaffe ich es wirklich das auszudrücken was ich will.[4]
Im 2008 isch CD «Härz» i d Läde cho und isch 11 Wuche i de Schwizer Hitparade gsi. Si häts aimol bis uf Platz 18 füre brocht. S vierte Album «Buuregiel» hät d Georgeband mit em Hitproduzänt Roman Camenzind (Baschi, Bligg) produziert.[5] Dia CD isch 16 Wuche i de Schwizer Hitparade gsi und häts uf Platz 6 gschafft.
Im November 2011, noch em Abschluss vo de Buuregiel-Tour, hät sich de George noch 10 Johr vo de Georgeband trännt. Er hät dänn e nöji Bänd zämegsuecht und ab em Mai 2012 wider Konzärt gmacht. Im Augste vom gliche Johr isch di nöi CD «Früschi Luft» usecho und am 23. September uf Platz nüün i de Schwizer Hitparade gstarted.[6]
Mitti Januar 2015 hät de George sini erscht „Best of CD“ usegee. Uf em Ablum «Hie bini deheim – Best of» häts 14 bekannti Titel und zwee nöii druff.
Musiker
I de Bänd, wo de George im Früelig 2012 gründet hät, sind de Basler Michael Chylewski am Bass, de Appezäller Remo Signer am Schlagzüg, de Keyboarder Stefan Bregy us em Wallis und de Zörcher Oliver Keller a de Gitarre. D Rahel Fischer und d Heidy Suter lösed sich als Hindergrund-Sängerinne ab.
Diskografii
Albe
- Eifachs Spiel? (2003)
- Adrenalin (2006)
- Härz (2008)
- Buuregiel (2010)
- Buuregiel Dölüx (2012)
- Früschi Luft (2012)
- Hie bini deheim – Best of (2015)
Weblink
- George Offizielli Website mit Track, Tourdate, Film und Fotene
- Georgeband d Bänd, wo de George bis 2011 däbii gsi isch
- Schwizer Hitparade - Künstlerportal «George»