Azerbeidjanners

Hierdie artikel handel oor die etniese groep. Vir die taal, sien Azerbeidjans.

Die Azerbeidjanners (Azerbeidjans: Azərbaycanlılar, آذربایجانلیلار) of Azeris (Azərilər, آذریلر), ook bekend as Azerbeidjanse Turke^[42] (Azərbaycan Türkləri آذربایجان تورکلری), vorm naas die Turke die tweede grootste Turkse etniese groep, die grootste inheemse etniese groep in die Kaukasus-streek en naas die Perse die tweede grootste etniese groep in Iran.^[43] Hulle vorm die titulêre nasie van Azerbeidjan, waar hulle sowat 91,6% van dié land se bevolking uitmaak, en praat Azerbeidjans, 'n Turkse taal, as moedertaal.

Azerbeidjanners
Totale bevolking:	ca. 28–35 miljoen[1][2]
Belangrike bevolkings  in:	Iran meer as 15 miljoen[3] óf 12,9–18 miljoen[4][5][6][7] óf 18–27 miljoen[8][9][10][11]  Azerbeidjan 8,2 miljoen[12]  Rusland 603 070–1,5 miljoen[13][14]  Turkye 530 000–800 000[14][15]  Georgië 284 761[16]  Kasakstan 85 292[17]  Oekraïne 45 176 [18]  Oesbekistan 44 400[19]  Turkmenistan 33 365[20]  Verenigde State 24 377–400 000[21][22][23]  Nederland 18 000[24]  Kirgisië 17 823[25]  Duitsland 15 219[26]  Verenigde Arabiese Emirate 7 000[27]  Verenigde Koninkryk 6 220[28]  Belarus 5 567[29]  Kanada 4 580[30]  Letland 1 657[31]  Oostenryk 1 000[32]  Estland 923[33]  Litaue 648[34]  Noorweë 501[35]  Australië 290[36]
Taal:	Azerbeidjans
Geloofsoortuiging:	Hoofsaaklik Sjiitiese Islam, minderhede van Soenniete, Baha’i,[37] Zoroastrisme,[38] ongebonde,[39] Christendom[40][41]
Verwante etniese groepe:	Ander Turkse volke soos Basjkiriërs, Gagaoesiërs, Karakalpakke, Kasakke, Kirgisiërs, Oeigoere, Oesbeke, Tartare, Tsjoewasjiërs, Turke en Turkmene; Perse

Wêreldwyd leef tussen 28 en 35 miljoen Azerbeidjanners, waarvan meer as 15 miljoen in Iran en sowat 8,2 miljoen in Azerbeidjan.^[44] In Iran leef hulle veral in die noordooste in die streek Azerbeidjan, saam met minderhede soos Koerde, Armeniërs en Perse. Hulle vorm die meerderheid in die vier Irannese provinsies van Wes-Azerbeidjan, Oos-Azerbeidjan, Ardabil en Zanjan. In Rusland leef tussen 603 070 en 1,5 miljoen Azerbeidjanners, waarvan meer as 130 000 in die Noord-Kaukasiese Republiek van Dagestan. In Turkye leef tussen 530 000 en 800 000 Azerbeidjanners, veral in die oostelike provinsies van Iğdır en Kars. 284 761 Azerbeidjanners leef in die suidooste van Georgië, waar hulle 6,5% van dié land se bevolking uitmaak en die grootste etniese minderheid vorm.